પ્રેમસંબંધ / મને મારા પ્રેમીની નવી પ્રેમિકાની ચિંતા છે, છોકરીને બચાવી લો નહીંતર...

• HIVગ્રસ્ત યુવકે અન્ય પાંચ જિંદગીઓને જોખમમાં મૂકી
• પ્રેમિકાને પ્રેમીની અન્ય પ્રેમિકાની ચિંતા થઈ અને 181માં પહોંચી
• યુવતીએ પતિ અને બાળકોનું જીવન બચાવવા છૂટાછેડા લીધાં

અમદાવાદના સોલા વિસ્તારમાં રહેતી 37 વર્ષીય દિપાનાં લગ્ન પ્રકાશ સાથે થયાં હતાં. બન્ને વચ્ચે મનમેળ નહોતો. તે દરમિયાન દિપા તેની ઓફિસમાં કામ કરતાં મીતનાં પ્રેમમાં પડી હતી. બન્ને છેલ્લાં 12 વર્ષથી એકબીજાનાં પ્રેમમાં હતાં. આ દરમિયાન બન્ને શારીરિક સંબંધથી પણ જોડાયાં હતાં. બીજી તરફ દિપા પતિ પ્રકાશથી બે બાળકોની માતા બની હતી. 

પ્રેમીને HIV હતો

દિપાની તબિયત ખરાબ થતાં તેણે 5 વર્ષ પહેલાં મેડિકલ ટેસ્ટ કરાવતાં માલુમ પડ્યું કે તેને HIV પોઝિટીવ છે. જ્યારે તેને ખબર પડી ત્યાં સુધીમાં ઘણું મોડું થઈ ગયું હતું. તેણે પ્રેમીને હેલ્થનાં ઈસ્યૂ હોવાનો થોડો અંદાજ હોવાથી સીધું જ પ્રેમીને પુછ્યું કે તને HIV છે? તેણે કહ્યું હાં, મને HIV છે. આ જાણી મહિલાનાં મનમાં તેનાં બે બાળકો અને પતિની ચિંતા સતાવવા લાગી. તેનાં મનમાં અનેક સવાલો થયાં કે બાળકો થયા તે અગાઉથી પ્રેમી સાથે સંબંધ હતાં. તો શું બાળકો અને પતિને પણ આ બિમારી લાગી હશે? 

પત્નીએ પતિથી પોતાને HIV હોવાની વાત છૂપાવી છૂટાછેડા લીધાં

દિપાએ પતિ પ્રકાશ અને બાળકોની ચિંતા હોઈ તેમનાંથી અલગ થવાનું નક્કી કર્યું. દિપાએ પતિ પ્રકાશને કહ્યું કે આપણાં બન્ને વચ્ચે સંબંધો સારા નથી તો છૂટાછેડા લઈ લેવાં જોઈએ. પ્રકાશ પણ આ વાત સાથે સહમત થયો અને 5 વર્ષ પહેલાં બન્નેએ છુટાંછેડાં લઈ લીધાં. જોકે દિપાએ પ્રકાશને પોતાના HIV ગ્રસ્ત હોવાની વાત નહોતી જણાવી. 

પ્રેમી પહેલાથી પરણિત હોવાનું ખૂલ્યું

દિપા પ્રકાશથી અલગ થઈ ગઈ અને મીતનાં અતિતને ફંફોળતાં તેને માલૂમ પડ્યું કે મીત પહેલાંથી પરણિત હતો. મીતને  HIV  હોવાથી તેની પત્નીએ છૂટાછેડાનો કેસ કર્યો છે. જે કોર્ટમાં ચાલું છે. ત્યારે મીતે દિપાને કહ્યું કે તું આ વાત કોઈને નહીં કહે તો હું તારું આખી જિંદગી ભરણપોષણ કરીશ. દિપાનાં છૂટાછેડા બાદ મીત તેનું ભરણપોષણ કરતો હતો. જોકે છેલ્લાં એક અઠવાડિયાથી તેણે દિપાને અવોઈડ કરવાનું અને તેનાં ફોન નહીં ઉપાડવાનું શરુ કર્યું હતું.

દિપાનો પ્રેમી હજુ એક યુવતીનાં પ્રેમમાં હતો

દિપાએ મીત તેને કેમ અવોઈડ કરે છે તે જાણવાનો પ્રયાસ કરતાં તેને ખબર પડી કે મીતને અન્ય એક યુવતી સાથે પ્રેમ સંબંધ છે. ત્યારે દિપાને મીતની બેવફાઈ પર ગુસ્સો ન આવ્યો પરંતુ મીતની પ્રેમિકા માટે ચિંતા થઈ. અંતે તેણે મહિલા હેલ્પલાઈન 181ની મદદ માંગી. મહિલા હેલ્પલાઈનનાં કાઉન્સેલર દિપીકાબહેન તેમની મદદે પહોંચ્યાં. તેમણે દિપાનું કાઉન્સેલિંગ કર્યું તેમજ તેમને HIV માટે કામ કરતી સંસ્થાઓ સાથે મુલાકાત કરાવી. 

HIVગ્રસ્ત પ્રેમી સામે ફરિયાદ કરી

દિપાએ 181નાં કાઉન્સેલર કહ્યું બહેન મીતને HIV છે. તેની પ્રેમિકાને ન થાય એ માટે તમે તેને સમજાવો. વારંવાર મીતને મળવા ગયેલી 181ની ગાડીને મીતનાં માતા પિતા મીત નથી કહીને પાછી મોકલતાં રહ્યાં. મીત પણ ભાગતો ફરતો હોઈ દિપીકાબહેને દિપાને તેની સામે પોલીસ ફરિયાદ કરવાની સલાહ આપી . અંતે દિપાએ મીત સામે બિમારી છુપાવી શારીરિક સંબંધ બાંધી છેતરપિંડી કર્યાંનો ગુનો દાખલ કરાવ્યો હતો. 

(પાત્રોનાં નામ બદલેલ છે.)