હેરાફેરી / મધ્યપ્રદેશથી ગુજરાતમાં લવાઇ રહ્યા છે ગેરકાયદે હથિયારો, દાહોદમાં છ પિસ્ટલ સાથે બે ઝડપાયા

જિલ્લા પોલીસ તથા એસ.ઓ.જી. શાખાને મળેલી સીધી સૂચના મુજબ ગેરકાયદે હથિયારોની હેરફેરીના રૂટ તથા એમ.પી. સરહદને અડીને આવેલ ગામડાના રસ્તાઓ ઉપર સરપ્રાઇઝ ચે‌કિંગ રાખવા તેમજ બાતમીદારો રોકી આવા કેસ શોધી કાઢવા સૂચના આપી હતી.

દરમ્યાન કતવારા પો.સ્ટે. વિસ્તારના આગાવાડા-ગુલબાર ચોકડી રોડ ઉપર અંગત બાતમી રાહે એક નંબર વગરની મોટર સાઇકલ સાથે મધ્યપ્રદેશના મનાવરના પ્રહ્લાદસિંહ ગુલઝારસિંહ ચીખલીગર (ભા‌ટિયા) તથા કાલસિંગ તારાસિંગ ચીખલીગર (બાવરી) નામે બે યુવકો પાસેથી રૂ.પ૦,૦૦૦ની કિંમતની દેશી હાથ બનાવટની ‌પિસ્ટલ ૬ તથા જીવંત કારતૂસ ર૦ અને નંબર વગરની પેશન-પ્રો મોટર સાઇકલ મળી રૂ.૯ર૦૦૦નો મુદ્દામાલ જપ્ત કરવામાં આવ્યો હતો. આ બાબતે કતવારા પોલીસ મથકે ગુનો દાખલ કરાયો છે.

મ.પ્ર.ના સિંઘાના ગામે દેશી તમંચા, ‌પિસ્ટલ, માઉઝર બનાવવાનો ગૃહ ઉદ્યોગ ચાલતો હોવાનું જાણવા મળ્યું છે. હથિયારો સાથે પકડાયેલા બંને યુવકોની પૂછપરછમાં તેમણે જણાવ્યું હતું કે એક દેશી ‌પિસ્ટલ બનાવવામાં આઠ દિવસનો સમય લાગે છે. ૧ ‌પિસ્ટલ બનાવવામાં પ૦૦૦નો ખર્ચ થતો હોય છે. વેચાણ મામલે ગ્રાહકને મોઢું જોઇને થપ્પડ મારવામાં આવે છે. ઓછામાં ઓછા ૧૦,૦૦૦ની કિંમતે આ ‌પિસ્ટલ વેચવામાં આવે છે. ‌પિસ્ટલ કે તમંચામાં વપરાતા કારતૂસ પણ આ યુવકો દ્વારા બનાવાતા હોવાનું જાણવા મળ્યું છે.

મનાવરના પ્રહ્લાદસિંહ અને કાલસિંગ પોતે જ હથિયારો બનાવતા હોવાની માહિતી મળી છે. મધ્યપ્રદેશના સિંઘાના ગામમાં આ હથિયારો બનાવવામાં આવ્યાં હતાં. બંને યુવકો હથિયાર બનાવીને વેચતા હોવાની વાત સામે આવી હતી.

દાહોદ બોર્ડર નજીક હથિયારો સાથે ઝડપાયેલા પ્રહ્લાદસિંહ અને કાલસિંગ સામે હથિયારો રાખવાના ગુનામાં મધ્ય પ્રદેશના વિવિધ પોલીસ મથકે પણ ગુના દાખલ થયેલા છે. જેલમુક્ત થયા બાદ આ બંને ફરીથી આ હથિયાર બનાવીને વેચવાનો વેપલો શરૂ કરી દેતા હતા.