એક તરફ સરકાર દ્વારા નવા ટ્રાફિક નિયમોનું કડક પાલન કરવાને લઇને દંડ વસૂલવામાં આવે છે ત્યારે બીજી બાજુ રાજ્યમાં બોગસ PUC કેન્દ્ર બનાવી લોકોને ખોટી રીતે સર્ટિફિકેટ આપી નોટો છાપવાનો ગેરકાયદે ધંધો કરી રહેલા બે આરોપીને પોલીસે કચ્છમાંથી ઝડપી લીધા છે.
સરકારના કડક નિયમને લઇને કૌભાંડીને મળ્યો મોકો
સરકારી માન્યતા ન હોવા છતાં ખોલ્યું PUC સેન્ટર
અમદાવાદમાં બનાવાયું PUC સોફ્ટવેર
પોલીસે બે આરોપીને ઝડપ્યાં
સરકારે ટ્રાફિકના નવા નિયમો અમલી બનાવ્યા છે જેમાં PUC સર્ટિફિકેટ ફરજિયાત બનાવ્યું છે. જેના કારણે રાજ્યમાં કૌભાંડીઓને પણ તક મળી ગઈ છે. ભુજ LCBએ બોગસ PUCના 1.20 લાખના સાધન સાથે બે આરોપીને ઝડપી લીધા છે.
સરકારી માન્યતા ન હોવા છતાં ખોલ્યું PUC સેન્ટર
રાજ્ય સરકારની કોઈ માન્યતા ન હોવા છતાં ભુજમાં વાહનોના PUC સર્ટીફિકેટ ખોલી આપવાની દુકાન શરૂ કરનારા યુવક અને તેની દુકાનમાં કામ કરતા ઓપરેટરની LCB દ્વારા ધરપકડ કરવામાં આવી છે. ભુજના RTO સર્કલ પાસે કતિરા કોમ્પલેક્ષમાં શ્રીજી ઓટો એડવાઈઝર નામની ઓફિસમાં ગેરકાયદે PUC કાઢી આપવામાં આવતું હતું.
અમદાવાદમાં બનાવડાવ્યું PUC સોફ્ટવેર
આરોપીએ અમદાવાદમાં એક વ્યક્તિ પાસે PUCનું સોફ્ટવેર બનાવડાવ્યું હતું. જેમાં PUC કેન્દ્રનો ખોટો રબર સ્ટેમ્પ બનાવીને લોકોને PUC સર્ટિફિકેટ આપવામાં આવી રહ્યા હતા. જેમાં વાહનોની વાસ્તાવિક ચકાસણી કર્યા વિના જ અધ્ધરતાલે નંબર પ્લેટના આધારે જ PUC આપીને નોટો છાપવાનો ગેરકાયદે ધંધો શરૂ કરી દીધો હતો. આ કૌભાંડમાં અન્ય કેટલાક લોકોના પણ નામ ખુલે તેવી શક્યતા છે.