ઝુંબેશ / ગેરકાયદે જાહેરાતનાં બોર્ડ બદલ ટ્યૂશન કલાસીસ અને ઓફિસને સીલ મરાયાં

શહેરના ઉત્તર પશ્ચિમ ઝોન અને દ‌િક્ષણ પશ્ચિમ ઝોનના એસ્ટેટ વિભાગના સત્તાવાળાઓ આજે સવારે સેટેલાઇટ વિસ્તારમાં આવેલા એનિમેશન, ટીઆઇએમઇ, સાયબર ઓફટેક, યુવા જિમ, ન્યૂ ટચ સ્કિન કેર, ક્લિયર ઝોન પેસ્ટ કંટ્રોલ, શિવમ ઇન્સ્ટિટ્યૂૂટ તેમજ પરાેઠાં કાફે, નવરંગપુરામાં જે.કે. શાહ કલાસીસ, એસજી હાઇવેની વાયએમસીએ ક્લબ પાસેે સર્કલ ઓન, ભૂયંગદેવ પાસે પાસવર્ડ એજ્યુકેશન, મેથ્સ એન્ડ સાયન્સ કલાસીસ, ખ્યાતિ મિનોઝ પ્રી સ્કૂલ, ઘાટલોડિયામાં કર્મયોગી કલાસીસ, સતાધારમાં સનફોર્ટ સમર કેમ્પ, સૂરધારા સર્કલ પાસે અમિતસર ઇન્સ્ટિટ્યૂટ એમ કુલ ૧૬ યુનિટને મ્યુનિસિપલ મિલકતમાં બીપીએમસી એકટ, ૧૯૪૯ની કલમ-ર૪પની જોગવાઇ હેઠળ તાળાં મરાયાં છે.

સત્તાવાળાઓ દ્વારા સીલિંગ કરતાં પહેલાં જે તે યુનિટને નોટિસ ફટકારીને પેનલ્ટી કરાઇ હતી, જોકે નિયત સમયમર્યાદા સુુધીમાં પેનલ્ટીની રકમ મ્યુનિસિપલ તંત્રમાં જમા ન કરાતાં આ યુનિટને તાળાં મરાયાં છે.

અત્રે ઉલ્લેખનીય છે કે અગાઉ શાળાઓમાં વેકેશન પડવાના સમયગાળામાં સત્તાવાળાઓએ ર૦ ટ્યૂશન કલાસીસને તાળાં માર્યાં હતાં, જે બાદમાં પેનલ્ટીની વસૂલાત બાદ બેનર કે બોર્ડ સ્વયંભૂ હટાવાયા બાદ ખોલાયાં હતાં, પરંતુ તે વખતે લોકસભાની ચૂંટણીનો માહોલ હોઇ ભારે ઊહાપોહ મચ્યો હતો અને સીલિંગ ઝુંબેશ સ્થગિત કરાઇ હતી.

ત્યારબાદ ગત રર મે, ર૦૧૯એ સેટેલાઇટ અને જોધપુર વિસ્તારમાં તંત્ર ત્રાટક્યું હતું અને પાંચ  ઓફિસ અને ટ્યૂશન કલાસીસને સીલ કરાયાં હતાં. હવે આજે ફરીથી ૧૬ દુકાનને સીલ કરીને તંંત્રે ગેરકાયદે જાહેરાત કરનારા ઓફિસ અને ટ્યૂશન કલાસીસના સંચાલકોમાં ફફડાટ ફેલાયો છે.