કેન્દ્ર સરકારે એક પરિપત્ર જાહેર કરીને સત્તાવાર જાહેરાત કરી દીધી છે કે દેશના IFSC ઓથોરિટીનું હેડક્વાર્ટર ગુજરાત રાજ્યની રાજધાની ગાંધીનગરના ગિફ્ટ સીટીમાં બનશે. આ સાથે દેશના આર્થિક પાટનગર ગણાતા મુંબઈમાં આ હેડક્વાર્ટર બનશે તેવી અટકળોનો અંત આવ્યો છે.
ગુજરાતના અર્થતંત્ર અને રોજગારને મોટો ફાયદો મળશે તેવી અપેક્ષા
નોંધનીય છે કે 2006માં વડાપ્રધાન મનમોહન સિંહનો ઈરાદો મુંબઈની ભૌગોલિક સ્થિતિનો લાભ લઇને ત્યાં IFSC શરુ કરવાનો હતો કારણ કે મુંબઈ એ વિશ્વના અન્ય બે IFSC સિંગાપોર અને લંડનની બરાબર વચ્ચે આવેલું છે. આ માટે દેશના જાણીતા ઇન્વેસ્ટમેન્ટ બેન્કર પર્સી મિસ્ત્રી પાસેથી સૂચનો લેવામાં આવ્યા હતા પણ આખરે તેમની ઉપર કોઈ અમલીકરણ થયું નહોતું.
ત્યાર બાદ મહારાષ્ટ્રની ભાજપ સરકારે મુંબઈની IFSC હેડક્વાર્ટરને ફાળવાયેલી જગ્યામાં બાંદ્રા કુર્લા બુલેટ ટ્રેઈન ટર્મિનલ બનવાની શરૂઆત કરી દેવાઈ હતી. આ મુદ્દે મુંબઈના બિઝનેસમેન અને નિષ્ણાતો મોદી સરકારથી નારાજ હોય એમ જણાય છે.
PM મોદી ગુજરાત રાજ્યને વધુ ફેવર આપી રહ્યા હોવાનો આક્ષેપ
એક બિઝનેસમેને નામ ન આપવાની શરતે PM મોડી ઉપર આક્ષેપ મુક્યો હતો તેઓ ગુજરાતી હોવાથી ગુજરાત રાજ્યને વધુ ફેવર આપી રહ્યા છે. અન્ય એક બેન્કરે જણાવ્યું હતું કે મુંબઈમાં RBI, SEBI, BSE, NSE અને અન્ય નાણાકીય સંગઠનોના હેડક્વાર્ટર છે અને એટલે જ આ શહેર દેશની આર્થિક રાજધાની ગણાય છે. આ તમામ પરિબળોને અવગણીને ગુજરાતની પસંદગી કરવી એ અન્યાય છે.
ગુજરાતમાં ISFC આવવાની સાથે ગુજરાતના અર્થતંત્ર અને રોજગારને મોટો ફાયદો મળશે તેવી અપેક્ષા રખાય છે. આ ઉપરાંત કંપનીઓ અને વિદેશની સરકારો માટે ગુજરાતમાં રોકાણ કરવાની ઉજળી તકો ઉભી થશે તેવું માનવામાં આવે છે.
IFSC શું છે?
IFSC એ એક એવી સંસ્થા છે જે વ્યાપારીઓને ખાસ કરીને વિદેશના બિઝનેસમેનને, તેમની કંપનીઓને અને સરકારોને બિઝનેસ કરવામાં સરળતા રહે તે માટે એસેટ મેનેજમેન્ટ, વેલ્થ મેનેજમેન્ટ, વિવિધ ફંડમાં રોકાણ, રિસ્ક મેનેજમેન્ટ, ઇન્શ્યોરન્સ વગેરે જેવી નાણાકીય સેવાઓ આપે છે.