મહેનતુંના માથે ભાર / IFFCOએ ખાતરની કિંમતમાં કર્યો તોતિંગ વધારો, ફેબ્રુઆરીમાં ભાવ વધારાની ચર્ચા એપ્રિલમાં સાચી પડી

• ખાતર કંપનીએ તોતિંગ વધારો ઝીંક્યો
• ઇફ્કો કંપનીએ ખાતરમાં ભાવ વધારો
• DAP ખાતરમાં 700 રૂપિયાનો ભાવ વધારો

કોરોનાની મહામારી વચ્ચે ખેડૂતો માટે માઠા સમાચાર આવ્યા છે. ઈફ્કો ખાતર કંપનીએ ભાવમાં તોતિંગ વધારો કરી દીધો છે. ઇફ્કો કંપનીએ ખાતરની કિંમતમાં મોટો વધારો ઝીંક્યો છે. DAP ખાતરમાં 1200ની જગ્યાએ 1900 રૂપિયા થયા છે. એક જ ઝટકામાં DAP ખાતરમાં 700 રૂપિયાનો ભાવ વધારો કરી દેવાયો છે. NPKમાં રૂ.1185થી વધારી 1800 રૂપિયા કરાયા છે. NPK 10:26:26 માં રૂ.1175થી વધારી 1775 રૂપિયા કરાયા છે. ASPમાં 975ની જગ્યાએ 1350 રૂપિયા કરાયા છે. 

મહત્વનું છે કે, ફેબ્રુઆરી મહિનામાં ખાતરના ભાવમાં વધારાના કારણે ખેડૂતોની ચિંતામાં વધારો થયો હતો. અને અમરેલીના વડિયામાં ખાતરની ખરીદી વધી હતી. NPK અને DAP ખાતર લેવા ખેડૂતો ડેપો પર પહોંચ્યા હતા. આ સમયે ડેપો મેનેજરે પણ વધુ ખરીદી થઈ હોવાનો સ્વીકાર કર્યો હતો. ખાતરના ભાવ વધારાની જાહેરાતને પગલે ખેડૂતો ખરીદી કરી રહ્યાં છે. જો કે, આ બાબતે રાજ્યના કૃષિ પ્રધાને નિવેદન આપીને ભાવ વધારાના મુદ્દાને નકારી દીધો હતો.

ફેબ્રુઆરીમાં ભાવ વધારાની વાત એપ્રિલ મહિનામાં સાચી પડી 

27 ફેબ્રુઆરીના દિવસે રાજ્યના કૃષિ પ્રધાન આર.સી ફળદુએ એક સ્પષ્ટતા કરી હતી. જેમાં ખાતરના ભાવ વધારાના મામલે નિવેદન આપ્યું હતું. ગુજરાતમાં આ ભાવ વધારો લાગુ પડશે નહીં. ગુજરાતમાં વેચાણ કરતી ખાતરની કંપનીએ ભાવ વધાર્યા નથી. ગુજરાતમાં DAP-NPK ખાતરોમાં કોઈ ભાવ વધારો નથી. બેંગાલુરૂમાં એક કંપનીએ ભાવ વધારો કર્યો છે.