ઠંડી શરુ થઇ ચુકી છે ત્યારે ખજુર ચારે તરફ મળવા લાગશે, લોકો ખજુરનો ભરપુર ઉપયોગ પણ કરશે, પરંતુ ખજુર બીજી કેવી કેવી રીતે ખાઇ શકાય તે પણ જાણી લો. જો તમે ખજુર એમનેમ ના ખાઇ શકતા હોય તો તેના વિવિધ સ્વીટ્સ બનાવીને તે ટ્રાય કરી શકાય. શિયાળામા શાકભાજી અને ફળો ખુબ જ મળે છે અને તે આખા વર્ષની શક્તિ આપે છે તેમ પણ કહેવાય છે. આ ઉપરાંત કેટલાક શિયાળુ પાક પણ શિયાળામાં લોકો મોટા પ્રમાણમાં આરોગતા હોય છે. આવું જ એક ફેમસ ફળ છે ખજુર.
જો તમે ખજુર એમનેમ ના ખાઇ શકતા હોય તો તેના વિવિધ સ્વીટ્સ બનાવીને તે ટ્રાય કરી શકાય
ખજુર મુળ રણપ્રદેશમાં ઉગતો ખોરાક છે
ખજુર ખાવાથી તરસ પણ ઓછી લાગે છે.
ખજુર મુળ રણપ્રદેશમાં ઉગતો ખોરાક છે. તે ખુબ શક્તિવર્ધક હોય છે. ખજુરમાં કુદરતી મીઠાસ હોય છે. આ એક એવું ફળ છે જે શિયાળા કે ઉનાળા ગમે તે સીઝનમાં ખાઇ શકાય છે. તમે બે-ચાર ખજુર ખાઇને ઉપર એક ગ્લાસ પાણી પી જાવ અથવા તો એક ગ્લાસ ખજુરનુ દુધ પી જાવ તો તમને એકાદ કલાક સુધી ભુખ લાગતી નથી. તેથી રણપ્રદેશમાં વસતા આરબો તેનો ભરપુર ઉપયોગ કરે છે. ખજુર ખાવાથી તરસ પણ ઓછી લાગે છે.
ઘી અને ખજુર
ખજુરને ઠળિયો કાઢીને એક તવીમાં ગરમ કરી લેવા. તેને પાંચ મિનિટ હલાવવા. ત્યારબાદ તેને એક વાસણમાં મુકી રાખવા અને ઠંડા પાડી દેવા, ઠંડીમાં તેની પર ઘીનું પડ જામી જશે, પછી તે ખાવાની ખુબ મજા આવશે.
ખજુર-સુંઠ-ગંઠોડાનું દુધ
ખજુરનો ઠળિયો કાઢીને તેના નાના કટકા કરવા અને દુધમાં બેથી ત્રણ વખત ઉભરો આવે ત્યાં સુધી ઉકાળવા. ત્યારબાદ તેમાં સુંઠ, ગંઠોડા અને સુકી વરિયાળીનો પાવડર નાંખવો. આ દુધ ગરમાગરમ પીવાની ખુબ મોજ પડી જાય છે. તે પૌષ્ટિક પણ છે. આ રીતે બનાવેલો ખજુરનો મિલ્કશેક પણ સારો લાગે છે.
ખજુર પાક
ખજુરપાક બનાવવા માટે પહેલા ઘીમાં ગુંદર તળી લેવો અને ત્યારબાદ તેને અધકચરો ક્રશ કરવો. આ રીતે કાજુ, બદામ, પિસ્તા પણ તળી લેવા. ત્યારબાદ ઠળિયા કાઢેલો ખજુર ઘીમાં ગરમ કરી તેમાં ગુંદર અને ડ્રાયફ્રુટ્સ મિક્સ કરી દેવા. પાંચ મિનિટ હલાવવું. ત્યારબાદ તેના લાડુ બનાવી શકાય અથવા થાળીમા પાથરીને ચોસલા પાડી શકાય.
ખજુરની કેક કે શીરો
ખજુરની કેક પણ બની શકે છે. રવાનો શીરો બનાવીને તેને ઠારી લો. ત્યારબાદ ખજુરને છુંદીને ઘીમાં ગરમ કરી લો. ત્યારબાદ કેકનો મોલ્ડ લઇને એક પડ ખજુર અને એક પડ શીરો મુકીને તેને મોલ્ડમાંથી કાઢી લો. પર ડ્રાયફ્રુટ્સથી સજાવીને તેને ખાવાનો આનંદ માણો
ખજુરપોળી
જે રીતે તુવેર દાળ કે ચણાની દાળની વેઢમી કે પુરણપોળી બનાવો છો તે રીતે ખજુરમાંથી પણ પુરણપોળી બની શકે છે. તે પહેલા ખજુરને ઘીમાં શેકીને હલવા જેવું બનાવી લેવું.
ખજુરની ખીર
ખજુરની ખીર પણ બનાવી શકાય છે. એક વાસણમાં દુધ ગરમ કરીને તેમાં બાફેલા ભાત અને ખજુરના કટકા નાંખીને ઉકાળી લેવું. ત્યારબાદ મિક્સરમાં પીસીને જાડી રબડી જેવી ખજુર ખીર સર્વ કરો. મહેમાનોને પણ મજા આવશે અને તમે પણ આંગળા ચાટતા રહી જશો.