અમદાવાદમાં સાબરમતી નદીના પટમાં ત્રણ ભાઈ પશુપાલકને ગળા પર છરો લગાવીને, ધમકાવીને અગિયાર ભેંસ તેમજ રોકડ રકમ લૂંટી ફરાર. ભેંસ ખરીદનાર બે શખ્સોની ધરપકડ.
હવે તો ભેંસ લઈને નીકળવું પણ ભારે પડે
છરો બતાવી 6.50 લાખની 11 ભેંસ લૂંટી ગયા
સરખેજ પોલીસ સ્ટેશનમાં લૂંટની ફરિયાદ
અમદાવાદમાં સાબરમતી નદીના પટમાં ત્રણ ભાઈ પશુપાલકને ગળા પર છરો લગાવીને, ધમકાવીને અગિયાર ભેંસ તેમજ રોકડ રકમ લૂંટી ફરાર થઇ ગયા હોવાનો બનાવ સામે આવ્યો છે. માથાભારે ત્રણ ભાઈ અગાઉ ભેંસ ચોરીના ગુનાના ઝડપાયેલા છે. લૂંટારુઓ પાસેથી ભેંસ ખરીદનાર બે શખ્સોની પોલીસએ ધરપકડ કરી છે. જોકે હજુ 13 ભેંસની લૂંટ કરી ગયેલા ત્રણ શખ્સો પોલીસ પકડથી દૂર છે. જેમને પકડવા પોલીસે તપાસ શરૂ કરી છે.
અમદાવાદના ફતેવાડીમાં આવેલ ભરવાડ વાસમાં રહેતા રણછોડ ભરવાડે સરખેજ પોલીસ સ્ટેશનમાં લૂંટની ફરિયાદ નોંધાવી છે. રણછોડ પંદર ભેંસ તથા પાંચ ગાય ધરાવી પશુપાલન વ્યવસાય કરે છે. રણછોડ તેની આસપાસમાં રહેતા બીજા સમાજના છોકરાઓ સાથે ભેંસ ચરાવવા સારું સાબરમતી નદી કિનારે રોજ સવારે જાય છે. સાંજે ગાયો ભેંસો ચરાવીને પરત ઘરે આવે છે.
ઉત્તરાયણના દિવસે રણછોડ એકલો ગાય, ભેંસ ચરાવવા માટે ગયો હતો. રણછોડ સાબરમતી નદીના પટ તરફ બાવળની ઝાડીઓમાં ઢોર ચરાવવા માટે ગયો હતો. આ દરમિયાન બપોરના બે વાગ્યાની આસપાસ ફતેવાડીમાં રહેતો મહંમદ અઝહર ઉર્ફે કાણિયો મણિયાર અને તેના બંને ભાઈ ડીમ અને નદિમ જે આગાઉ ભેંસ ચોરીના ગુનામાં પકડાયેલા છે અને રણછોડ તેમને ઓળખે છે.
તે ત્રણેય ભાઈએ રણછોડ પાસે આવીને કહ્યું કે તું કોને પૂછીને અહીંયા ભેંસો ચરાવે છે? તારે ભેંસો ચરાવવા અમને રૂપિયા આપવા પડશે. તું મને ઓળખતો નથી કે શું ? તમારા જેવાની કેટલીય ભેંસ મેં કાપી નાખી છે. પોલીસ પણ મારું કાંઈ બગાડી શકવાની નથી. આમ કહીને છરો બતાવીને ગાળો બોલવા લાગ્યો હતો, જેથી રણછોડ ડરી ગયો હતો.
કાણિયાના બંને ભાઈએ રણછોડને પકડી લીધો હતો. રણછોડ પાસે રહેલા 1500 રૂપિયા પણ કાઢી લીધા હતા. કાણિયાએ રણછોડના ગળા પર છરો રાખીને કહ્યું કે તું જીવતો રહેવા માગતો હોય તો અહીં તારી બધી ભેંસ મૂકીને એકલો ચૂપચાપ જતો રહે. નહિતર તને કાપી નાખીશ તેમ ધમકી આપતાં રણછોડ ભેંસો મૂકીને જતો રહ્યો હતો. ત્યારબાદ રણછોડે ઘરે જઈને પરિવારને જાણ કરી હતી.
રણછોડ જ્યારે પરિવાર સાથે નદીના પટમાં ગયો ત્યારે ભેંસ જોવા મળી ન હતી. જેથી રણછોડે 6.50 લાખની અગિયાર ભેંસ લૂંટીને ત્રણ ભાઈઓ કટિંગ કરવા બહાને લૂંટી ગયા હોવાથી તેમના વિરુદ્ધ સરખેજ પોલીસ સ્ટેશનમાં ફરિયાદ નોંધાવી છે. પોલીસે લૂંટનો ગુનો નોંધી વધુ તપાસ હાથ ધરી છે.