તમારા કામનું / FD માં રોકાણ કરવા માંગતા હોવ તો આટલું ચોક્કસ વાંચજો, ઊંચા વ્યાજ દરે મળશે સારું રિટર્ન

• રેપો રેટમાં વધારો થયા પછી બેંક સ્ટેટ બેંક ઓફ ઇન્ડિયા એ FDના દરમાં વધારો કર્યો
• સ્ટેટ બેંક ઓફ ઇન્ડિયા (SBI) એ 15 બેસિસ પોઈન્ટ્સનો વધારો કર્યો

દેશની સૌથી મોટી સરકારી બેંક સ્ટેટ બેંક ઓફ ઇન્ડિયા (SBI) એ ફિક્સ્ડ ડીપોઝીટ (FD) પર વ્યાજનાં દરમાં વધારો કર્યો છે. રેપો રેટમાં વધારો થયા પછી બેંક સ્ટેટ બેંક ઓફ ઇન્ડિયા (SBI) એ આ દરમાં વધારો કર્યો છે. જો કે બધી ફિક્સ્ડ ડીપોઝીટ (FD) પર વ્યાજનાં દરમાં વધારો નહીં થાય પણ અમૂક જ ફિક્સ્ડ ડીપોઝીટનાં રેટમાં વધારો કરવામાં આવ્યો છે. સ્ટેટ બેંક ઓફ ઇન્ડિયા (SBI) એ 15 બેસિસ પોઈન્ટ્સનો વધારો કર્યો છે અને નવા રેટ 13 ઓગસ્ટ 2022થી લાગુ થઇ ગયા છે. 2 કરોડથી ઓછી રકમની એફડી પર વ્યાજ દરમાં વધારો કરવામાં આવ્યો છે. આ વધારા બાદ SBI સામાન્ય લોકોને ફિક્સ્ડ ડીપોઝીટ (FD) પર 2.90 ટકાથી 5.65 ટકા વ્યાજ આપી રહી છે, જ્યારે વરિષ્ઠ નાગરિકોને ફિક્સ્ડ ડીપોઝીટ (FD) પર 3.40 થી 6.45 ટકા સુધી વ્યાજ આપવામાં આવી રહ્યું છે.

સ્ટેટ બેંક ઓફ ઇન્ડિયા (SBI) એ આ પહેલાં જૂન 2022માં તેના વ્યાજના દરોમાં વૃધ્ધિ કરી હતી. આજથી એસબીઆઇ 180 દિવસથી 210ની એફડી પર  4.55 ટકા વ્યાજ આપી રહ્યું છે. 1 વર્ષથી વધુ અને 2 વર્ષથી ઓછી એફડી પર વ્યાજ દર 5.30 ટકાથી વધારીને 5.45 ટકા કરવામાં આવ્યો છે. 2 વર્ષથી વધુ અને 3 વર્ષથી ઓછી ફિક્સ્ડ ડીપોઝીટ (FD)પર વ્યાજ દર 5.50 ટકા કરવામાં આવ્યો છે. 3 વર્ષથી વધુ અને 5 વર્ષથી ઓછા સમયમાં પાકતી FD પર વ્યાજ દર 5.60 ટકા થઈ ગયો છે. તેવી જ રીતે, 5 વર્ષથી 10 વર્ષની ફિક્સ્ડ ડીપોઝીટ (FD) પરનો વ્યાજ દર હવે 5.65 ટકા કરવામાં આવ્યો છે.

Let your finances do the hard work for you.
Introducing 'Utsav' Deposit with higher interest rates on your Fixed Deposits!#SBI #UtsavDeposit #FixedDeposits #AmritMahotsav pic.twitter.com/seMdVaOz0e

— State Bank of India (@TheOfficialSBI) August 14, 2022

વરિષ્ઠ નાગરિકો માટે, ઓછામાં ઓછા 7 દિવસ અને વધુમાં વધુ 10 વર્ષની ફિક્સ્ડ ડીપોઝીટ (FD)પર 3.40 ટકાથી 6.45 ટકા વ્યાજ ચૂકવવામાં આવે છે. સ્ટેટ બેંકના જણાવ્યા અનુસાર, નવા વ્યાજ દર નવી અને જૂની બંને ફિક્સ્ડ ડીપોઝીટ (FD) પર લાગુ થશે. જો કોઈ વ્યક્તિ 2 કરોડથી ઓછીની FD ખોલે છે, તો તેને પાકતી મુદત અનુસાર નવા દરોનો લાભ મળશે. સાથે જ જૂની એફડીના દરમાં પણ ફેરફાર કરવામાં આવ્યો છે. સ્ટેટ બેંક ઓફ ઇન્ડિયા (SBI) એ ટેક્સ સેવિંગ સ્કીમ, રિટેલ ડિપોઝિટ અને NRO ડિપોઝિટ પર પણ સુધારેલા દરે વ્યાજ આપવામાં આવશે.