ટ્રેનિંગ / હોર્સ રાઇડિંગનો શોખ હોય તો અહીં પહોંચી જાઓ, જુઓ કેવી રીતે કરાવવામાં આવે છે ઘોડેસવારીની ટ્રેનિંગ

• ભાવનગરમાં હોર્સ રાઈડિંગની ટ્રેનિંગ માટે લાઈનો લાગી
• આર.ડી. ઝાલા હોર્સ રાઈડિંગ ક્લબમાં ટ્રેનિંગ
• 10થી વધુ ઉંમરના બાળકો, યુવાનોની ટ્રેનિંગ

યુવાનોથી માંડી અનેક લોકોને હોર્સ રાઈડિંગનો શોખ હોય છે. હોર્સ રાઈડિંગનો શોખ તો સૌને હોય છે પણ અશ્વને કઈ રીતે સમજવો અને કઈ રીતે ઘોડેસવારી કરવી તે મુશ્કેલ હોય છે. કેટલાક લોકો જાતે જ ઘોડે સવારી શિખતા હોય છે. ત્યારે ભાવનગરમાં આર.ડી. ઝાલા હોર્સ રાઈડિંગ ક્લબ ફરી શરૂ થઇ છે જ્યાં આસાનીથી હોર્સ રાઈડિંગ શીખવવામાં આવે છે. જોકે હાલ યુવાનોમાં હોર્સ રાઈડિંગનો ભારે ક્રેઝ જોવા મળી રહ્યો છે જેંને પગલે આ રાઇડિંગ કલબમાં 150થી વધુ યુવક-યુવતીઓનું વેઈટિંગ લિસ્ટ જોવા મળી રહ્યું છે. 

અનેક યુવતીઓ પણ લઈ રહી છે ટ્રેનિંગ
ભાવનગર માઉન્ટેડ પોલીસ ગુજરાતમાં સારી નામના ધરાવે છે. અનેક ડીજી કપ ભાવનગર માઉન્ટેડ પોલીસને ફાળે ગયા છે. અહીં 35થી વધુ અશ્વો છે જેમાંથી 10 અશ્વને રાઈડિંગ ક્લબ માટે ફાળવવામાં આવ્યા છે. જ્યાં10 વર્ષથી ઉપરના યુવક-યુવતીઓને હોર્સ રાઈડિંગ શિખવાડવામાં આવે છે. તો કેટલાક લોકો એવા પણ છે જેમની પાસે પોતાના અશ્વ છે અને ટ્રેનિંગ લેવા માટે અહીં અશ્વ સાથે આવે છે. અશ્વ સાથે કેવી રીતે વર્તન કરવું તેને કેવી રીતે સમજવો સહિતની તમામ ટ્રેનિંગ અહીં આપવામાં આવે છે. તો ટ્રેનિંગ લઈ રહેલા યુવક-યુવતીઓ પણ ખુશી વ્યક્ત કરી રહ્યા છે. 

માઉન્ટેડ પોલીસ દ્વારા અશ્વોની સારી રીતે માવજત
ભાવનગર માઉન્ટેડ પોલીસ દ્વારા અશ્વોની સારી રીતે માવજત કરવામાં આવે છે. જેને પગલે પણ અહીં યુવક-યુવતીઓ ઘોડેસવારી શીખવા માટે પ્રેરાય છે.અહીં લોકોને તમામ પ્રકારની ઘોડેસવારી શીખવાડવામાં આવે છે. હાલ અહીં 36 યુવાનો અને 14 યુવતીઓ ઘોડેસવારીની ટ્રેનિંગ લઈ રહી છે. 2004માં શરૂ થયેલી આ ક્લબમાં 15 હજાર લોકો બેઝિક અને 7 હજાર લોકો એડવાન્સ તાલિમ લઈ ચૂક્યા છે. અહીંના પોલીસ જવાનો પણ બેસ્ટ રાઈડર તરીકે અવોર્ડ મેળવી ચૂક્યા છે.  બેઝિક કોર્સ 3 મહિના અને એડવાન્સ કોર્સ પણ 3 મહિના સુધીનો હોય છે. ભાવનગર માઉન્ટેડ પોલીસમાં તૈયાર થયેલા ઘોડેસવારો રાષ્ટ્રીય કક્ષાની પોલોની રમતમાં પણ ભાગ લઈ ચૂક્યા છે. અને હવે ઘોડેસવારીનો શોખ પૂરણ કરીને સ્પર્ધામાં ભાગ લેતા પણ થયા છે. હાલ આ સેન્ટરમાં ઘોડેસવારી કરવા માટે વેઈટિંગ ચાલી રહ્યું છે.