ઉનાળાની સીઝન પુરી થવાનું નામ લેતી નથી. ગરમીનો પારો રોજ ઉંચો જઇ રહ્યો છે. તેની સાથે સાથે બ્લડપ્રેશર લો થવાના ચાન્સ પણ વધે છે. જેથી તમે હાર્ટ પેશન્ટ હોવ તો તમારે આવી ગરમીમાં થોડું ધ્યાન રાખવું જરૂરી છે.
અમેરિકન હાર્ટ એસોસિએશને ચેતવણી જારી કરી હતી કે હાર્ટ ફેઇલ્યોરની તકલીફ હો તો ગરમીને હળવાશથી ના લેતા. ગરમીનો પારો ઉંચો જવાની સાથે સાથે હાર્ટના મસલ્સને મળતો લોહીનો પુરવઠો તેમજ હાર્ટથી શરીર તરફ જતો લોહીનો પ્રવાહ બંનેમાં તકલીફ ઉભી થાય છે. હ્યુમિડિટી ધરાવતા વિસ્તારોમાં તો હાર્ટ એટેકના કિસ્સા પણ વધી જાય છે.
હાર્ટ પેશન્ટે આટલું ધ્યાન રાખવું
- હાર્ટની હેલ્થને જાળવવા ઉનાળામાં પુરતુ પાણી પીવું એ એકમાત્ર ઉપાય છે. શરીરનું તાપમાન જળવાય તે માટે ગરમીમાં ખુબ જ પરસેવો થાય છે. આ કારણે ફ્લુઇડ પણ પરસેવામાં નીકળી જાય છે. ડીહાઇડ્રેશનના કારણે લોહીનો પ્રવાહ અવરોધાય નહીં તે માટે શરીરને પુરતું ફ્લુઇડ મળે તે જરુરી છે.
- જેમને પહેલેથી જ હાર્ટની તકલીફ હોય તેમણે ગરમીને હળવાશથી ન લેવી. બપોરના આકરા તાપમાં શક્ય હોય ત્યાં સુધી બહાર જવાનું ટાળવું.
- ડાયરેક્ટ હીટ ટાળવી. જો બહાર જવું જ પડે એમ હોય તો લીંબુ, સાકર અને સહેજ મીઠું નાંખેલું પાણીબોટલમાં ભરીને સાથે જ રાખવું.
- હાર્ટ પેશન્ટના દર્દીઓને શરીરમાં ફ્લુઇડની માત્રા જાળવવાની હોવાથી તેમને ઓછુ પાણી પીવાનું કહેવામાં આવે છે. તેઓ વધુ પાણી પીવે તો પણ તકલીફ અને ઓછુ પાણી પીવે તો હીટ સ્ટ્રોક આવી શકે છે. તેથી તેમણે રોજિંદા વોટર ઇનટેક કરતા માત્ર દસ ટકા જ પાણી વધુ પીવું.
- જે વ્યક્તિને આખો દિવસ એસીમાં બેસવાનું હોય તેને વધુ પાણીની જરુર પડતી નથી, તરસ લાગે ત્યારે જ અને આખો ગ્લાસ ગટગટાવવાના બદલે ઘુંટડે ઘુંટડે પાણી પીઓ.