અમદાવાદ / જુનિયર ક્લાર્કની પરીક્ષા આપવા જતાં હોય તો વૈકલ્પિક મુસાફરીનો પ્લાન પણ કરી લેજો, એસટી બસનું બુકિંગ ફુલ

• જુનિયર ક્લાર્કની પરીક્ષામાં એસટી બસનું બુકિંગ ફુલ
•  રાજ્યની ૬૫૦૦ જેટલી એસટી બસ ફાળવવામાં આવી
• વધુ એક્સ્ટ્રા બસની જરૂર પડશે તો વધુ બસ દોડાવવામાં આવશે

 આગામી નવ એપ્રિલ રવિવારે રાજ્યભરમાં લેવામાં આવી રહેલી જુનિયર ક્લાર્કની પરીક્ષાને લઈને પંચાયત મંડળની સાથે સાથે એસટી નિગમ પણ તડામાર તૈયારી કરી રહ્યું છે. અમદાવાદ જિલ્લા સહિત રાજ્યભરમાં નવ લાખથી વધુ પરીક્ષાર્થીને પરીક્ષા સ્થળે પહોંચાડવા અને ત્યાંથી પરત લઇ આવવા માટે રાજ્યની ૬૫૦૦ જેટલી એસટી બસ ફાળવવામાં આવી છે.

પંચાયત બોર્ડ ઉમેદવારના ખાતામાં રૂ.૨૫૪ આપશે
મોટાભાગનાં ઉમેદવારનાં પરીક્ષા કેન્દ્ર અમદાવાદ, ગાંધીનગર, ભાવનગર, અમરેલી ફાળવાયાં છે. ટ્રાફિકથી બચવા ઉમેદવારોએ અગાઉથી જ એસટી બસમાં એડ્વાન્સ બુકિંગ કરાવી લેતાં ૯મીએ અમદાવાદ, ગાંધીનગર, ભાવનગર આવતી જતી એસટી બસ હાઉસફુલ થઇ ગઈ હોવાનું જાણવા મળે   છે, જેના કારણે એસટી તંત્ર હવે ઉમેદવાર માટે ૩૫૦થી વધુ  એક્સ્ટ્રા બસ દોડાવશે. જે ઉમેદવારોએ એડ્વાન્સ બુકિંગ નહીં કરાવ્યું હોય તો તેમને પણ બસપોર્ટ પરથી   જે તે રૂટની બસ મળશે. હાલમાં મોટા ભાગના રૂટની બસ ફુલ થઇ ગઈ છે. હજુ પણ ઉમેદવારોનું એડ્વાન્સ બુકિંગ કરાવવાનું ચાલુ જ છે. એસટી તંત્રના જણાવ્યા અનુસાર વધુ એક્સ્ટ્રા બસની જરૂર પડશે તો વધુ બસ દોડાવવામાં આવશે. ઉમેદવારોએ નિયત ભાડું ચૂકવવું પડશે, પંચાયત બોર્ડ ઉમેદવારના ખાતામાં રૂ.૨૫૪ આપશે.
એસટી નિગમે ઉમેદવાર સાથે વાલીઓને શક્ય હોય ત્યાં સુધી સાથે નહીં આવવા અનુરોધ કર્યો છે, કારણ કે, બસમાં ઉમેદવાર સાથે જેટલા વાલી વધુ હશે તેટલા અન્ય ઉમેદવારને સીટ ઓછી મળશે. રૂટ પ્રમાણે બસની વિગતો વેબસાઈટ પર અપલોડ કરવામાં આવી રહી છે. ઉમેદવારોએ એડ્વાન્સ બુકિંગ નહીં કરાવ્યું હોય તો પણ જે તે રૂટની બસ મળશે.