ગોવા સરકારે પ્રવાસીઓ માટે એડવાઈઝરી જારી કરી છે. હવે અહીં ખુલ્લામાં દારૂ પીનારા કે રસોઇ કરનારાઓને ભારે દંડ થઈ શકે છે. પ્રવાસન વિભાગની નોંધાયેલ હોટેલમાં રહેવાની સલાહ આપવામાં આવે છે.
ગોવા સરકારે પ્રવાસીઓ માટે નવી એડવાઈઝરી જાહેર કરી
ખુલ્લામાં દારૂ પીનાર સામે થશે કાર્યવાહિ
ખુલ્લામાં જમવાનું બનાવવા બદલ 50,000 રૂપિયાનો દંડ
ગોવામાં પ્રવાસીઓની ગોપનીયતા અને સલામતીને ધ્યાનમાં રાખીને, સરકારે એક નવી એડવાઇઝરી બહાર પાડી છે. લોકો માટે આવા ઘણા નિયમો બનાવવામાં આવ્યા છે, જેના ઉલ્લંઘન પર હજારો રૂપિયાનો દંડ ભરવો પડી શકે છે. જેમ કે બીચ પર દારૂ પીનારાઓ સામે કડક કાર્યવાહી કરવામાં આવશે. ખુલ્લામાં જમવાનું બનાવવા બદલ 50,000 રૂપિયાનો દંડ ભરવો પડી શકે છે.
પ્રવાસીઓ સાથે કે એકલા ફોટોગ્રાફ લેતા પહેલા તેમની પરવાનગી લેવી જરૂરી
ગોવા સરકારની નવી એડવાઈઝરીમાં કહેવામાં આવ્યું છે કે પ્રવાસીઓ સાથે કે એકલા ફોટોગ્રાફ લેતા પહેલા તેમની પરવાનગી લેવી જરૂરી છે, ખાસ કરીને જ્યારે તેઓ તડકામાં સૂતા હોય અથવા દરિયામાં મજા કરતા હોય. સરકારનું કહેવું છે કે આ સાથે પ્રવાસીઓની ગોપનીયતાનું સન્માન થશે. આ ઉપરાંત, ઓવરચાર્જિંગ ટાળવા માટે, પ્રવાસીઓને ટેક્સીનું મીટર જોઈને ભાડું ચૂકવવા માટે પણ કહેવામાં આવ્યું છે.
અકસ્માત રોકવા માટે પણ એડવાઈઝરીમાં પગલા લેવાયા
ગોવા સરકારની એડવાઈઝરીમાં પ્રવાસીઓને ખડકો અને ખતરનાક જગ્યાઓ પર સેલ્ફી ન લેવા માટે કહેવામાં આવ્યું છે, જેથી અકસ્માતોને રોકી શકાય. આ સિવાય ગોવા સરકારે પણ પ્રવાસીઓને ગોવાની ઐતિહાસિક ઈમારતોને નુકસાન ન પહોંચાડવાની અપીલ કરી છે. એડવાઈઝરી અનુસાર, ગોવામાં આવતા પ્રવાસીઓને પણ ટૂરિસ્ટ ડિપાર્ટમેન્ટમાં નોંધાયેલી હોટલમાં રહેવાની સલાહ આપવામાં આવી છે, આ કોઈ વિવાદને ટાળવા માટે કરવામાં આવ્યું છે. નોંધણી વગરની હોટલોમાં રહેવું ઘણા પ્રવાસીઓ માટે મોંઘું બની જાય છે.