વિદેશમાં વસતા ભારતીય ડોક્ટરો જ્યારે વતનનું ઋણ અદા કરવા જ્યારે કોઈ પ્રવૃત્તિ આરંભે છે. ત્યારે આ પ્રવૃત્તિ અનેક ગરીબ દર્દીઓ માટે સહારો બની જાય છે. ગણદેવી રોટરી ક્લબ અને અમેરિકન સંસ્થા "ઈપનો' દ્વારા દક્ષિણ ગુજરાતના ગરીબ દર્દીઓની આંગણે જઈને ખરા અર્થમાં મેડિકલ યાત્રાનો આરંભ કરવાં આવ્યો છે. અમેરિકાથી ખાસ 22 ડોક્ટરોની ટીમ દ્વારા ગરીબ આદિવાસી દર્દીઓને વિનામૂલ્યે ઓપરેશન કરીને સેવાની લહેર ચલાવી છે.
રાજ્યના નવસારી ડાંગ અને તાપી જિલ્લાના અંતરિયાળ વિસ્તારમાં મોટી સંખ્યામાં આદિવાસી લોકો વસે છે. આ આદિવાસી લોકો મોટેભાગે ગરીબી અને બીમારીમાં જીવન વ્યતીત કરતા હોય છે. તેઓ ગંભીર રોગની સારવાર કરવા આર્થિક રીતે અસમર્થ હોવાના કારણે જીવન ગુમાવતા હોય છે. આવી સ્થિતિમાં તેમનો સાદ છેક અમેરિકામા વસતા ભારતીય ડોક્ટરોને સંભળાયો હોય તેવું લાગે છે અને એટલે જ નવસારી ડાંગ અને તાપી જિલ્લામાં કાર્યરત રોટરી ક્લબના આયોજનથી અમેરિકાની ઈપનો સંસ્થા સાથે જોડાયેલા 22 એક્સપર્ટ ડોક્ટરોની ટીમ કેટલાક દિવસોથી દક્ષિણ ગુજરાતમાં ધામા નાખીને ગરીબ દર્દીઓની સેવા કરવા ધૂણી ધખાવી રહી છે. 22 જેટલા એકસપર્ટ ડોક્ટરોની ટીમ મેડિકલ યાત્રામાં આવી પહોંચીને દદીના નાના રોગથી લઈને હૃદય કે મગજના મોટા ઓપરેશનો વિનામૂલ્યે કરી રહી છે.
અમેરિકાના ઈપનો સંસ્થા અને સ્થાનિક રોટરી ક્લબ દ્વારા 22 તજજ્ઞ ડોક્ટરોની ટીમ દક્ષિણ ગુજરાતમાં વિવિધ જગ્યાએ વિનામૂલ્યે આરોગ્ય કેમ્પનું આયોજન કરી રહી છે. જેમાં દદીને તપાસવાનું કામ અને સ્થળ પરથી જ દવાઓ પણ મળી રહે તે પ્રકારનું આયોજન કરવામાં આવ્યું છે. આ સેવાયજ્ઞમાં ગણદેવી રોટરી ક્લબ તરફથી રૂ.72 લાખનું ફંડ આપવામાં આવ્યું છે. જેની મદદથી આ કેમ્પ હેઠળ 4000થી વધારે દર્દીઓની તપાસ અને 150 જેટલા દર્દીઓ ખર્ચાળ ઓપરેશન કરવામાં આવ્યા છે.. આ સેવાયજ્ઞ માટે નવસારી જિલ્લાની ત્રણ અલગ અલગ હોસ્પિટલો સાથે ટાઈ-અપ કરવામાં આવ્યું છે.
પોતાના વિસ્તારમાં આ પ્રકારની આરોગ્ય સેવા ઉપલબ્ધ થતાં ગરીબ દર્દીઓ પરમ સંતોષનો ભાવ વ્યકત કરી રહ્યા છે. પોતાની મોંઘીદાટ સારવાર કરાવવા અસમર્થ ગરીબ દર્દીઓને ઘર આંગણે નિશુલ્ક સારવાર મળતાં તેઓ અંતરમનથી વિદેશથી આવેલા ડો~ટરો અને રોટરી ક્લબની જહેમતને હૃદયથી વધાવી રહ્યા છે.
પૂરેપૂરા સમર્થ અને દેશમાં જ રહેતાં હોવા છતાં વતન અને સમાજનું ઋણ ચૂકવવામાં કેટલાક લોક પાછળ હટી રહ્યા છે. કેટલાક લોકો વતનમાંથી છેતરશપડીથી લૂંટ ચલાવી પરદેશમાં છૂપાઈ જાય છે તેવા સંજોગોમાં વિદેશમાં વસતા આવા લોકો દેશ અને વતન ની સેવા કરી રહ્યા છે અને માનવતાની મહેક પ્રસરાવી રહ્યા છે જે ખૂબ ખૂબ અભિનંદનને પાત્ર છે.