યુટીલીટી / ચેક બાઉન્સ થશે તો હવે કોર્ટના ચક્કર કાપવા નહીં પડે

હવે જો તમને કોઇએ ચેક આપ્યો હોય અને તે બાઉન્સ થાય તો હવે તમારે કોર્ટના ચક્કરો કાપવા પડશે નહીં. સરકાર ચેક બાઉન્સના કેસ માટે એક એપ્લિકેશન પર કામ કરી રહી છે, જેનાથી ચેક બાઉન્સ થવાના કિસ્સામાં મોટા ભાગના મામલાનો ઓનલાઇન નિકાલ આવી શકશે અને લોકો ખાસ કરીને વેપારીઓને કોર્ટ કચેરીના ધક્કા ખાવામાંથી મુક્તિ મળશે.

નેશનલ ઇન્ફર્મેશન સેન્ટર (NIC)ની ડાયરેક્ટર જનરલ ડો. ગીતા વર્માએ આ અંગે જાણકારી આપતાં જણાવ્યું હતું કે અમે એવી ઓનલાઇન સિસ્ટમ લાવી રહ્યા છીએ, જેમાં જો કોઇ ચેક બાઉન્સ થવાની ભૂલ સ્વીકારે તો તેને કોર્ટ જવું પડશે નહીં અને ત્યાં જ પેમેન્ટ કરી દેશે તો કામ સરળ થઇ જશે.

એક અંદાજ અનુસાર અત્યારે કોર્ટમાં પેન્ડિંગ કેસમાં ચેક બાઉન્સ થવાના કેસની સંખ્યા ૩૫ ટકા જેટલી હોય છે. ચેક બાઉન્સ થવાથી સૌથી મોટો ડર ક્રેડિટ સ્કોર ખરાબ થવાનો હોય છે અને તેના કારણે જેલમાં પણ જવું પડે છે. ચેક બાઉન્સ કરવો એ એક અપરાધ છે અને બેન્ક એકાઉન્ટ પણ સીલ થઇ શકે છે. મોબાઇલ એપ્લિકેશન દ્વારા ચેક બાઉન્સના કેસોનો આઉટ ઓફ કોર્ટ નિકાલ થઇ જશે અને અદાલતમાં જવું નહીં પડે. આ માટે જરૂર પડે ઇ-હિયરિંગ હાથ ધરવામાં આવશે.