આમ આદમી પાર્ટીના નેતા મનીષ સિસોદિયાએ દાવો કર્યો હતો જેમાં તેમને કહ્યું હતું કે ઉત્તરાખંડની આગામી વિધાનસભા ચૂંટણી આમ આદમી પાર્ટી અને ભાજપ વચ્ચે જ લડાશે.
ભાજપ એ આપ નેતાનો ચર્ચા કરવા માટેનો પડકાર સ્વીકારી લીધો હતો
દિલ્હીના નાયબ મુખ્યમંત્રી ચર્ચા માટે દેહરાદૂન પહોંચ્યા પરંતુ BJP તરફથી કોઈ ન આવ્યું
મનીષ સિસોદિયાનો દાવો, હવે ઉત્તરાખંડમાં આપ સરકાર બનવા જઈ રહી છે
દિલ્હીના નાયબ મુખ્યમંત્રી મનીષ સિસોદિયાએ આજે દેહરાદૂનના આઇઆરડીટી ઓડિટોરિયમમાં ઉત્તરાખંડ સરકારના પ્રવકતા અને કેબિનેટ મંત્રી મદન કૌશિકની ઘણા સમય સુધી રાહ જોઈ હતી પરંતુ મદન કૌશિક તે સ્થળે આવ્યા જ નહોતા, મનીષ સિસોદિયાએ આ બાબતે કહ્યું હતું કે મને દુઃખ છે કે હું તેમને ના મળી શક્યો પરંતુ હવે હું 6 તારીખે દિલ્હીમાં તેમની રાહ જોઇશ.
ઉત્તરાખંડની ભાજપ સરકાર અને આપ નેતા વચ્ચે થયો હતો વિવાદ
મહત્વનું છે કે ઉત્તરાખંડની ભાજપ સરકાર અને મનીષ સિસોદિયા વચ્ચે કેટલાક સમય અગાઉ અમુક મુદ્દે ચણભણ થઇ હતી અને આમ આદમી પાર્ટીના નેતાએ ભાજપને ચર્ચા કરવાનો પડકાર ફેંક્યો હતો જેને ભાજપ નેતા મદન કૌશિક દ્વારા સ્વીકારી લેવામાં આવ્યો હતો અને જેને પગલે તેઓ ભાજપના નેતા સાથે ચર્ચા કરવા માટે પહોંચી ગયા હતા પરંતુ ભાજપ તરફથી કોઈ પણ ચર્ચા કરવા માટે ફરક્યું નહોતું.
આ પ્રસંગે મનીષ સિસોદિયાએ જણાવ્યું હતું કે ઉત્તરાખંડમાં આગામી વિધાનસભા ચૂંટણી આપ અને ભાજપ વચ્ચે લડાવા જઈ રહી છે જેને લઈને આપ નેતા અરવિંદ કેજરીવાલ ટૂંક જ સમયમાં ઉત્તરાખંડમાં પાર્ટીનો ચહેરો બહાર લાવશે તેવી તેમણે જાહેરાત કરી હતી.
આપ ઉત્તરાખંડમાં તમામ વિધાનસભા સીટો પર ચૂંટણી લડવા જઈ રહી છે : મનીષ સિસોદિયા
વધુમાં તેમણે કહ્યું હતું કે રાજ્યમાં આપ પાર્ટી બધી જ 70 વિધાનસભા સીટો પર ચૂંટણી લડવા જઈ રહી છે અને આ રાજ્યમાં પ્રજા જે 20 વર્ષથી અલગ અલગ મુદાઓના નિરાકરણ માટે વલખા મારી રહી છે તે તમામ અને શિક્ષા, આરોગ્ય જેવા મુદાઓ પર આમ આદમી પાર્ટી કામ કરશે. તેમણે જણાવ્યું હતું કે ભાજપ ચર્ચા કરવા માટે એટલે તૈયાર નથી કે કેમ કે તેમની પાસે ગણાવવા માટે કોઈ કામગીરી જ નથી. ઉત્તર પ્રદેશમાં પણ પહેલા આજ થયું હતું અને હવે ઉત્તરાખંડમાં પણ આ જ થઇ રહ્યું છે.
ઉલ્લેખનીય છે કે ઉત્તર પ્રદેશની ભાજપ સરકારના શિક્ષણ મંત્રી સાથે મનીષ સિસોદિયાને આવી જ રીતે ચણભણ થઇ હતી જેને લઈને વિવાદ થયો હતો અને આપ નેતાએ ત્યારે પણ કેબિનેટ મંત્રીને ચર્ચાનો પડકાર ફેંક્યો હતો જેમાં મનીષ સિસોદિયા તો પહોંચ્યા હતા પરંતુ ભાજપ તરફથી કોઈ પણ આવ્યું નહોતું.