અમદાવાદ / હવે ગાડી સ્પીડમાં ચલાવી તો ગયા સમજો! અમદાવાદના આ રસ્તાઓ પર સ્પીડગનથી સજ્જ હશે પોલીસ

• સ્ટંટ કરતા વાહનચાલકો સામે ટ્રાફિક પોલીસ કરશે કાર્યવાહી
• ઇન્ટરસેપ્ટર વાન અને હાઇવે પેટ્રોલ કારનો કરાશે ઉપયોગ
• નહેરૂનગરથી ઇસ્કોન ચાર રસ્તા સહિતની જગ્યાએ ચેકિંગ

અમદાવાદમાં અવાર નવાર અકસ્માતની ઘટનાઓ સામે આવતી હોય છે જેમાં વધુ પડતી સ્પીડ માર્ગ અકસ્માતમાં કારણરૂપ માનવામાં આવે છે, ત્યારે હવે હાઈ સ્પીડ વાહન ચાલકો માટે તલાઈ બોલાઈ શકે છે. કેમ કે અમદાવાદ શહેર પોલીસને રાજ્ય સરકાર દ્વારા 4 ઈન્ટરસેપ્ટર વાન આપવામાં આવી છે, આ વાનમાં લગાવેલી સ્પીડ લેઝર ગન સહિતનાં આધુનિક કેમેરા વાહનોની ગતિ માપવા માટે ઉપયોગ થનાર છે. 

સ્ટંટ કરતા વાહનચાલકો સામે ટ્રાફિક પોલીસ કરશે કાર્યવાહી

મહત્વનું છે કે આ વાનમાં લાગેલા હાઈટેક કેમેરામાં વાહનચાલકોનાં નંબર પ્લેટનાં ફોટો પરથી વાહન માલિકની તમામ વીગતો આંગળીનાં ટેરવે ઉપલબ્ધ કરાશે, જેથી નિયમોનો ભંગ કરનારા વાહનચાલકો સામે તાત્કાલિક દંડનીય કાર્યવાહી કરવાનું શક્યા બનશે સાથે જ અમદાવાદ શહેર પોલીસને એક હાઈવે વાન પણ સરકાર દ્વારા ફાળવવામા આવી છે જે અકસ્માતનાં સમયમાં વાહનમાં ફસાઈ જનારા લોકોને મદદ રૂપ થવા સહિતની મહત્વની કામગીરી કરશે.

ઇન્ટરસેપ્ટર વાન અને હાઇવે પેટ્રોલ કારનો કરાશે ઉપયોગ

શહેરમાં અકસ્માતની અને રોડ પર ટ્રાફિકજામ જેવી પરિસ્થિતિ સર્જાતી હોય છે, ત્યારે શહેરમાં ટ્રાફિક પોલીસ દ્વારા ટ્રાફિક નિયમોનો ભંગ કરનાર વાહન ચાલકો સામે કડક કાર્યવાહી કરવાની ઝૂંબેશ હાથ ધરવામાં આવી રહી છે. એટલું જ નહીં ટ્રાફિક નિયમ ભંગ કરીને ઓવર સ્પીડમાં વાહન ચલાવનાર સામે પણ પોલીસ લાલ આંખ કરવા તૈયાર છે. આ માટે ઓવર સ્પીડ વાહન ચલાવતા વાહન ચાલકો સામે ટ્રાફિક પોલીસ કાર્યવાહી કરશે.જેના માટે પોલીસ ઈન્ટરસેપ્ટ વાન અને હાઇવે પેટ્રોલ કારનો ઉપયોગ કરાશે. 

નહેરૂનગરથી ઇસ્કોન ચાર રસ્તા સહિતની જગ્યાએ ચેકિંગ

રાજ્ય સરકાર દ્વારા ફાળવવામાં આવેલી ઈન્ટરસેપ્ટર વાન થકી કેશવબાગથી સિંધુ ભવન, સરદાર પટેલ બાવલા થી એસ જી હાઇ વે , નહેરૂનગરથી ઇસ્કોન ચાર રસ્તા અલગ અલગ જગ્યાએ આ કાર્યવાહી કરાશે. તો આ ઉપરાંત મેમ્કો થી એસ પી રીંગ રોડ, નરોડાથી નારોલ સુધી પણ કાર્યવાહી કરાશે.એટલું જ નહીં રાત્રી દરમિયાન ધૂમ સ્ટાઈલથી વાહન ચલાવતા લોકોની ફરિયાદ આવશે તો પણ કાર્યવાહી કરાશે. ઉલ્લેખનિય છે કે રોડ પર અકસ્માતમાં વાહનોમાં ફસાયેલ વ્યક્તિને બહાર કાઢવા તેમજ લાઈટ ન હોય તેવા વિસ્તારમાં લાઈટની વ્યવસ્થા કરવા તેમજ રસ્તામાં પડેલ ઝાડ કાપવા સહિતના કામો માટે આ કારનો ઉપયોગ કરાશે.