ભારત દ્વારા વારંવાર ચાઇનીઝ એપ્સ પર પ્રતિબંધ લગાવવાને કારણે ચીન પરેશાન છે. ચીને ભારતના નિર્ણય સામે વાંધો ઉઠાવતા કહ્યું છે કે રાષ્ટ્રીય સુરક્ષાના આવરણ હેઠળ ભારતે આવા પગલાં ન લેવા જોઈએ.
ભારતના ચીની એપને બેન કરવાના પગલાંથી ચીન નારાજ
ચીને કહ્યું," રાષ્ટ્રીય સુરક્ષાના બહાના હેઠળ આ યોગ્ય નથી"
ભારત આ પહેલા પણ ઘણી ચીની એપ્સને બેન કરી ચૂક્યું છે
ભારત દ્વારા વારંવાર ચાઇનીઝ એપ્સ પર પ્રતિબંધ લગાવવાને કારણે ચીન પરેશાન છે. ચીને ભારત ના નિર્ણય સામે વાંધો ઉઠાવતા કહ્યું છે કે રાષ્ટ્રીય સુરક્ષાના આવરણ હેઠળ ભારતે આવા પગલાં ન લેવા જોઈએ.
ચીને બુધવારે ચીની એપ પર પ્રતિબંધ મૂકવાના મોદી સરકાર ના નિર્ણય પર વાંધો વ્યક્ત કર્યો છે. સુરક્ષાના કારણોને ધ્યાનમાં રાખીને ભારત એ મંગળવારે વધુ 43 ચીની એપ્સ પર પ્રતિબંધ મૂક્યો હતો. ચીને ભારતના આ પગલાને WTO નિયમોનું ઉલ્લંઘન ગણાવ્યું છે
મે મહિનામાં લદ્દાખ માં ભારત અને ચીની સૈન્ય વચ્ચે ઘર્ષણ થયા પછી ભારત એ ચીની મૂળની એપ પર પ્રતિબંધ મૂક્યો હોવાથી ચીન નારાજ થયું હતું, જો કે ત્યાર પછી આ ચોથી વાર છે જ્યારે મોદી સરકારે ચીની એપ્સ પર પ્રતિબંધ મૂક્યો છે. અત્યાર સુધીમાં ભારત 267 ચાઇનીઝ એપ્સ પર પ્રતિબંધ મૂક્યો છે.
'ભારતે રાષ્ટ્રીય સુરક્ષાનું બહાનું બનાવવાની જરૂર નથી': ચીન
ભારત ખાતે ચીની દૂતાવાસના પ્રવક્તા ઝી રોંગે કહ્યું હતું કે, ચીન સંબંધિત મોબાઇલ એપ્સ પર પ્રતિબંધ મૂકવા માટે ભારત સતત રાષ્ટ્રીય સુરક્ષાનો આશરો લે છે. અમે તેનો સખત વિરોધ કરીએ છીએ.
ઝીએ ભારત ને ચીની એપ્લિકેશન પરનો પ્રતિબંધ હટાવવા કહ્યું છે અને કહ્યું છે કે આ પગલું વિશ્વ વેપાર સંગઠન WTO ના નિયમોની વિરુદ્ધ છે. તેમણે કહ્યું કે, અમને આશા છે કે ભારતીય પક્ષ ચીન સહિતના તમામ દેશો માટે ભેદભાવ વિના બજારમાં પ્રવેશની ખાતરી કરશે અને WTO નિયમોનું ઉલ્લંઘન કરનારા પગલા પાછા ખેંચશે.ઝીએ કહ્યું, ચીની સરકારે સતત પુનરાવર્તન કર્યું છે કે ચીની કંપનીઓ આંતરરાષ્ટ્રીય નિયમોનું પાલન કરે છે અને કાયદો અને નૈતિકતાના ક્ષેત્રમાં કામ કરે છે.
'ભારત અને ચીન એક બીજા માટે ખતરો નથી'
ચીની દૂતાવાસીના પ્રવક્તાએ કહ્યું કે " ભારત અને ચીન એ એકબીજા માટે ખતરો નથી, પરંતુ વિકાસ માટેના પર્યાય છે, બંને દેશોએ વાતચીતના માધ્યમથી એકબીજા માટે સકારાત્મક માહોલ બનાવવું જોઈએ."
નોંધનીય છે કે ગલવાન ઘાટીના લોહિયાળ સંઘર્ષ પછી બંને દેશો વચ્ચે લદ્દાખ બોર્ડર ખાતે તણાવનો માહોલ છે, બંને દેશોની સેના શિયાળામાં પણ ત્યાં તૈનાત છે અને ભારતે પણ સૈનિકો માટે ગરમ અને અત્યાધુનિક આવાસોની વ્યવસ્થા કરી છે.
250થી વધુ ચીની એપ્સ પર મૂકાયો પ્રતિબંધ
ભારત એ પહેલા 29 જૂને 59 ચાઇનીઝ એપ્સ પર પ્રતિબંધ મૂક્યો હતો, ત્યારબાદ 28 જુલાઈએ તેણે અન્ય 47 એપ્સ પર પ્રતિબંધ લાદયો હતો. 118 એપ્સ પર 2 સપ્ટેમ્બર અને 24 નવેમ્બરના રોજ 43 પર પ્રતિબંધ મૂક્યો હતો. આમ લગભગ 250થી વધુ ચીની એપ્સ પર મોદી સરકાર પ્રતિબંધ લાદી ચૂકી છે.