ગુજ'રાજ'2022 / જો જો ક્યાંક તમારી સાથે કીર્તીદાન ગઢવી જેવુ ન થાય! વોટ આપવા જાઓ ત્યારે આ વસ્તુ છે જરૂરી

• રાજકોટમાં કિર્તીદાન ગઢવીને માધાપર મતદાન મથકે કિર્તીદાનને અટકાવ્યા
• આધારકાર્ડની હાર્ડ કોપી સાથે ન હોવાથી કિર્તીદાનને મત આપતા અટકાવ્યા
• કિર્તીદાન ગઢવીએ જિલ્લા કલેક્ટરની કરી રજૂઆત
• કલેક્ટરને રજૂઆત બાદ કિર્તીદાન ગઢવી આપી શક્યા મત

ગુજરાત વિધાનસભાની ચૂંટણીને લઈ હાલમાં પ્રથમ તબક્કાનું મતદાન ચાલુ છે. આ દરમ્યાન રાજકોટથી એક મોટા સમાચાર સામે આવ્યા છે. મત જાગૃતિ અભિયાનના બ્રાન્ડ એમ્બેસેડર અને લોક ગાયક કીર્તીદાન ગઢવીને મત આપતા અટકાવવામાં આવ્યા હતા. જોકે એનું કારણ એ હતું કે, કીર્તીદાન ગઢવી પાસે આધારકાર્ડની હાર્ડ કોપી ન હતી. જે બાદમાં કીર્તીદાન ગઢવીએ કલેકટરને રજૂઆત કર્યા બાદ તેઓ મત આપી શક્યા હતા.

રાજકોટમાં આજે પ્રથમ તબક્કાના મતદાન દરમ્યાન કીર્તીદાન ગઢવીને મત આપતા અટકાવવામાં આવ્યા હતા. વાત જાણે એમ છે કે, મત જાગૃતિ અભિયાનના બ્રાન્ડ એમ્બેસેડર અને લોક ગાયક કીર્તીદાન ગઢવી આજે માધાપર મતદાન મથકે  મત આપવા પહોંચ્યા હતા. જ્યાં ફરજ પરના અધિકારીએ તેમનું આઈડી પ્રૂફ માંગતા આધારકાર્ડની હાર્ડ કોપી ન હોઇ તેમણે મત આપતા અટકાવવામાં આવ્યા હતા. 

કલેકટરને કરી રજૂઆત 

મત જાગૃતિ અભિયાનના બ્રાન્ડ એમ્બેસેડર અને લોક ગાયક કીર્તીદાન ગઢવીને મત આપતા અટકાવ્યા બાદ કીર્તિદાને કલેકટરને આ બાબતે રજૂઆત કરી હતી. કલેક્ટરને રજૂઆત બાદ કિર્તીદાન ગઢવી મત આપી શક્યા હતા. 

ગુજરાત વિધાનસભા ચૂંટણીનું આજે પ્રથમ તબક્કાનું મતદાન

વિધાનસભા ચૂંટણીના પ્રથમ તબક્કાની 19 જિલ્લાની 89 બેઠકો પર મતદાન શરૂ થઈ ચૂક્યું છે. આજે કચ્છ, સૌરાષ્ટ્ર અને દક્ષિણ ગુજરાતની બેઠકો પર મતદાન ચાલુ છે. જેમાં મતદાનનો સમય સવારના 8થી સાંજના 5 વાગ્યા સુધીનો છે. મહત્વનું છે કે, ગુજરાતમાં પ્રથમ તબક્કાની ચૂંટણીમાં 89 બેઠક પર કુલ 788 ઉમેદવારો મેદાનમાં છે. જેમાં 39 રાજકીય પક્ષોના ઉમેદવારો મેદાનમાં છે. તો વળી આજે 2,39,76,670 મતદારો મતદાન કરશે. જેમાં 1,24,33,362 પુરૂષ મતદારો, 1,15,42,811 મહિલા મતદારો અને 497 અન્ય મતદારો મતદાન કરશે.