ખુલાસો / ભારતનાં મંકીપોક્સનાં દર્દીઓ પર ICMRએ કર્યો સ્ટડી, દર્દીઓનાં શારીરિક સંબંધો મુદ્દે કર્યો મોટો દાવો

• દુનિયાભરમાં મંકીપોક્સના કેસ જોવા મળ્યા
• માત્ર સમલૈંગિક લોકોને જ થાય છે તેવી અટકળો હતી
• ભારતમાં કરેલ રિસર્ચે સમલૈંગિક અટકળોને ખંડિત કરી

દુનિયાભરમાં મંકીપોક્સના કેસ જોવા મળી રહ્યા છે. આ સાથે જ કેટલીક અટકળો લગાવવામાં આવી રહી હતી કે આ બીમારી માત્ર સમલૈંગિક લોકોને જ થાય છે. પરંતુ ભારતમાં 5 બીમાર લોકો પર અભ્યાસ કરવામાં આવ્યો. જેમાં જાણવા મળ્યું છે કે, આ બીમારી કોઇને પણ થઇ શકે છે, પછી તે સમલૈંગિક હોય કે ના હોય અને ખાસ વાત એ છે કે જે પાંચ દર્દીઓનો અભ્યાસ કરવામાં આવ્યો હતો તે વિદેશ પણ ગયા ન હતા.

5 લોકો પર સર્વે કરવામાં આવ્યો
તાજેતરના સમયમાં ઇન્ડિયન કાઉન્સિલ ઓફ મેડિકલ રિસર્ચ (ICMR) અને નેશનલ ઇન્સ્ટિટ્યૂટ ઓફ પુણેએ દિલ્હીમાં મળી આવેલી પાંચ મંકીપોક્સ દર્દીનો અભ્યાસ કર્યો હતો. જેમાં જાણવા મળ્યું હતું કે, પાંચમાંથી ત્રણ લોકોના 21 દિવસ પહેલા અન્ય કોઇ સાથે સંબંધ બાંધ્યો હતો, જ્યારે બે લોકોના કોઇ સાથે સંબંધ નહોતા. અને આ મંકીપોક્સના પાંચ દર્દીઓએ સમલૈંગિક હોવાનું સ્વીકાર્યું ન હતું.

સમલૈંગિક હોવા સાથે કોઈ સંબંધ નથી
ગયા મહિને વર્લ્ડ હેલ્થ ઓર્ગેનાઇઝેશન (WHO) ના વડા ટેડ્રોસ ઘેબ્રેયેસસે જણાવ્યું હતું કે મે મહિનામાં મંકીપોક્સનો પ્રથમ કેસ નોંધાયો હતો. ત્યારથી અત્યાર સુધીમાં 98 ટકા કિસ્સાઓ બાયસેકસ્યુઅલ અથવા પુરુષો સાથેના સંબંધો ધરાવતા પુરુષોમાં જોવા મળ્યા છે. પરંતુ, ભારતમાં પાંચ દર્દીઓના અભ્યાસ પરથી જાણવા મળ્યું છે કે, મંકીપોક્સને બાયસેક્સ્યુઅલ કે સમલૈંગિક હોવા સાથે કોઈ સંબંધ નથી.

આ જાણકારી પ્રાપ્ત થઇ

• દર્દીને સમલૈંગિક અથવા બાયસેક્સ્યુઅલ સંબંધો નહોતા.
• તેમની કોઈ ટ્રાવેલ હિસ્ટ્રી પણ નહોતી.
• મંકીપોક્સ રોગ જાતીય ટ્રાન્સમિશન દ્વારા ફેલાતો નથી
• એક દર્દીને જાતીય સંપર્ક દ્વારા હિપેટાઇટિસ બી વાયરસ (HBV) ચેપ લાગ્યો હતો.
• દર્દીને શીતળા અથવા મંકીપોક્સની રસી આપવામાં આવી ન હતી.
• ચેપ લાગ્યાના 5 થી 14 દિવસ પછી મંકીપોક્સના લક્ષણો નોંધાયા હતા.
• પાંચમાંથી ત્રણ પુરુષો અને બે મહિલાઓ હતી.

મંકીપોક્સ રોગ કેવી રીતે ફેલાય છે
મંકીપોક્સ એક વાયરલ રોગ છે, જે ચેપગ્રસ્ત વ્યક્તિના સંપર્કમાં આવવાથી ફેલાય છે. જો તમે ચેપગ્રસ્ત વ્યક્તિના સીધા સંપર્કમાં આવ્યા છો, અથવા તેના ઘાના સંપર્કમાં આવ્યા છો, તો તમે મંકીપોક્સનો ચેપ લગાવી શકો છો. આ સિવાય સંક્રમિત વ્યક્તિના કપડાં, ટુવાલ કે ચાદરનો ઉપયોગ કરીને પણ આ વાયરસ ફેલાય છે. સેક્સ કરવાથી પણ ફેલાઈ શકે છે. આ સિવાય જો ઘરમાં કોઈ વ્યક્તિ સંક્રમિત હોય તો તેના ઉપયોગના કપડાને બિન સંક્રમિત લોકોના કપડાથી ધોવાથી પણ તેનો ફેલાવો થઈ શકે છે.

મંકીપોક્સના સામાન્ય લક્ષણો

• તાવ
• ત્વચા પર ફોલ્લીઓ. આ ચહેરાથી શરૂ થઈને હાથ, પગ, હથેળી અને તળિયા સુધી જઈ શકે છે.
• લસિકા ગાંઠમાં સોજો આવે છે. એટલે કે, શરીરમાં ગઠ્ઠો હોવો.
• માથાનો દુખાવો, માંસપેશીઓમાં દુખાવો અથવા થાક.
• ગળામાં દુખાવો અને ઉધરસ

1958 માં આ વાયરસ જોવા મળ્યો હતો
યુએસ સેન્ટર્સ ફોર ડિસીઝ કંટ્રોલ અનુસાર, આ રોગની પ્રથમ જાણ 1958 માં કરવામાં આવી હતી. ત્યારે રિસર્ચ માટે રાખવામાં આવેલા વાંદરાઓમાં આ ઇન્ફેક્શન જોવા મળ્યું હતું. આથી તેનું નામ મંકીપોક્સ રાખવામાં આવ્યું છે. આ વાંદરાઓમાં શીતળા જેવી બીમારીના લક્ષણો જોવા મળ્યા હતા. તે એક દુર્લભ રોગ છે, જે મંકીપોક્સ વાયરસના ચેપને કારણે થાય છે. આ વાયરસ એ જ વેરિઓલા વાયરસ પરિવારનો ભાગ છે, જે શીતળાનું કારણ બને છે. મંકીપોક્સના લક્ષણો શીતળા જેવા જ છે. મંકીપોક્સ બહુ ઓછા કિસ્સાઓમાં જીવલેણ સાબિત થાય છે.