વર્લ્ડકપ / ટીમ ઇન્ડિયાની સરેરાશ ઉંમરને જાણી ચોંકી જશો, અનુભવમાં પણ છે સૌથી આગળ

ભારતીય ટીમની સરેરાશ ઉંમર  29.53 વર્ષ છે, જેમાં મહેન્દ્રસિંહ સૌથી (37 વર્ષ) સૌથી મોટી ઉંમરનો ખેલાડી છે, જ્યારે કુલદીપ યાદવ (24 વર્ષ) સૌથી નાની ઉંમરનો ખેલાડી છે. વિશ્વકપમાં ભાગ લઈ રહેલી દસ ટીમોમાં શ્રીલંકા (29.9) અને દક્ષિણ આફ્રિકા (29.5) બાદ ભારતીય ટીમ સૌથી બુઢ્ઢી ટીમ છે.

જો 1975થી અત્યાર સુધીની ભારતીય ટીમો પર નજર કરવામાં આવે તો વિરાટ કોહલીની ટીમ ઉંમરના મામલામાં પાછલી બધી ટીમોને પાછળ છોડી દે છે. આ પહેલાં ભારતે વિશ્વકપમાં સૌથી ઉંમરલાયક ટીમ 2011માં ઉતારી હતી, જેની સરેરાશ ઉંમર 28.3 વર્ષ હતી. ધોનીના નેતૃત્વ હેઠળની એ ટીમ વિશ્વ ચેમ્પિયન બની હતી. 

તો  શું કોહલીની ટીમ 2011ના ઇતિહાસનું પુનરાવર્તન કરી શકશે ખરી? કારણ કે 1983માં કપિલના નેતૃત્વવાળી ટીમ પણ ભારતની એ સમય સુધીની સૌથી ઉંમરલાયક (સરેરાશ ઉંમર 27.10) ટીમ હતી. કપિલી એ ટીમે પણ વિશ્વકપ જીત્યો હતો.

1992માં અઝહરની સૌથી યુવા ટીમ હતીઃ 

ઉલ્લેખનીય છે કે 1975ના વર્લ્ડકપની ટીમની સરેરાશ ઉંમર 26.8 અને 1979ના વર્લ્ડકપની ટીમની સરેરાશ ઉંમર 26.6 વર્ષ હતી. કપિલની 1987ની ટીમની સરેરાશ ઉંમર 26.2 હતી. મોહંમદ અઝહરુદ્દીનના નેતૃત્વવાળી 1992ની ટીમની સરેરાશ ઉંમર ફક્ત 25.4 વર્ષ હતી, જે વર્લ્ડકપમાં અત્યાર સુધીની ભારતની સૌથી યુવા ટીમ હતી, પરંતુ એ ટીમનું પ્રદર્શન બહુ જ નિરાશાજનક રહ્યું હતું.

સૌથી યુવા ટીમ બાંગ્લાદેશનીઃ 

2019ના વિશ્વકપમાં સૌથી યુવા ટીમ બાંગ્લાદેશની છે, જેની સરેરાશ ઉંમર 27.27ની છે. અફઘાનિસ્તાન (27.40) તેનાથી બહુ પાછળ નથી. પાકિસ્તાનની ટીમ 27.333 વર્ષસાથે ત્રીજા સ્થાન પર છે. દક્ષિણ આફ્રિકાનો ઇમરાન તાહિર (40 વર્ષ) વિશ્વકપમાં ભાગ લેનારો સૌથી મોટી ઉંમરનો ખેલાડી છે. અફઘાનિસ્તાનનો મુજીબ ઉર રહમાન (18 વર્ષ) સૌથી નાની ઉંમરનો ખેલાડી છે.

ધોની વિશ્વકપમાં સૌથી અનુભવી ખેલાડીઃ 

મહેન્દ્રસિંહ ધોની આ વિશ્વકપનો સૌથી અનુભવી ખેલાડી છે. તેણે ભારત તરફથી 338 વન ડે (કુલ 341) મેચ રમ્યો છે. ધોની સિવાય આ વર્લ્ડકપમાં અન્ય કોઈ ખેલાડી ૩૦૦થી વધુ વન ડે રમ્યો નથી. ભારતીય ટીમના બધા ખેલાડીઓ કુલ મળીને 1571 વન ડે રમ્યા છે અને આ મામલામાં કોહલીની ટીમ અન્ય બધી ટીમો કરતાં ઘણી આગળ છે. ભારત તરફથી ધોની ઉપરાંત કોહલી (227), રોહિત શર્મા (206), રવીન્દ્ર જાડેજા (151), શિખર ધવન (128) અને ભુવનેશ્વરકુમાર (105) પણ ખાસ્સા અનુભવી છે.

ભારત પછી આ બાંગ્લાદેશી ખિલાડીઓ રમ્યા સૌથી વધારે ODI:

ભારત બાદ બાંગ્લાદેશની ટીમનો નંબર આવે છે, જેના બધા ખેલાડીઓની કુલ મેચની સંખ્યા 1341 થવા જાય છે. બાંગ્લાદેશ તરફથી કેપ્ટન મુશરફે મુર્તઝા (207), મુશફિકુર રહીમ (205), શાકિબ અલ હસન (198) અને તમિમ ઇકબાલ (193) સૌથી વધુ મેચ રમ્યા છે.

ધોની બાદ ક્રિસ ગેલ વિશ્વકપમાં ભાગ લેનારો બીજો સૌથી વધુ અનુભવી ખેલાડી છે. આ 39 વર્ષીય ખેલાડી અત્યાર સુધીમાં 289 મેચ રમ્યો છે. ગેલ ઉંમરના મામલે પણ તાહિર બાદ સૌથી મોટી ઉંમરનો ખેલાડી છે.
 
વિશ્વકપમાં ભાગ લઈ રહેલી ટીમોમાં સૌથી વધુ 90 સદી ભારતીય ખેલાડીઓ દ્વારા ફટકારવામાં આવી છે. એમાં સૌથી વધુ કેપ્ટન વિરાટ કોહલીના નામ પર 41 સદી નોંધાયેલી છે, જ્યારે રોહિતે 22, ધવને 16 અને ધોનીએ 10સદી ફટકારી છે.