ઈંગ્લેન્ડમાં આગામી ૩૦ મેથી શરૂ થઈ રહેલા ક્રિકેટ વર્લ્ડકપ માટે ટીમ ઇન્ડિયાની જાહેરાત કરી દેવામાં આવી છે. ટીમ ઇન્ડિયાને આ ખિતાબના પ્રબળ દાવેદારના રૂપમાં જોવામાં આવી રહ્યું છે અને વિરાટ કોહલીના નેતૃત્વમાં ટીમ ઇન્ડિયા ત્રીજી વાર આ ખિતાબ હાંસલ કરવા પૂરતું જોર લગાવશે.
12મો ICC વન ડે વિશ્વકપ 14 જુલાઈ સુધી ઈંગ્લેન્ડમાં રમાવાનો છે. ઓસ્ટ્રેલિયાએ સૌથી વધુ પાંચ વાર આ ખિતાબ જીત્યો છે અને તે આ ટૂર્નામેન્ટની ગત વિજેતા ટીમ પણ છે. વિન્ડીઝ અને ટીમ ઇન્ડિયા બે-બે વાર આ ખિતાબ પોતાના નામે કરી ચૂક્યા છે, જ્યારે પાકિસ્તાન, શ્રીલંકા એક-એક વાર ચેમ્પિયન બન્યા હતા. ક્રિકેટનો જનક દેશ ઈંગ્લેન્ડ ત્રણ વાર ફાઇનલમાં પહોંચ્યા છતાં એક પણ વાર આ ખિતાબને હાંસલ કરી શક્યો નથી, પરંતુ આ વખતે ઈંગ્લેન્ડ અને ભારતને આ ખિતાબના પ્રબળ દાવેદાર માનવામાં આવી રહ્યા છે. આ સાથે એ જોવું પણ દિલચસ્પ બની રહેશે કે શું ઈંગ્લેન્ડ પહેલી વાર ચેમ્પિયન બની શકશે કે પછી ભારત ત્રીજી વાર ચેમ્પિયન બનશે.
વર્લ્ડકપમાં ટીમ ઇન્ડિયાની સફર:
ભારતે પહેલી વાર કપિલદેવના નેતૃત્વમાં 1987નો વર્લ્ડકપ જીત્યો હતો. તેનાં 28 વર્ષ બાદ મહેન્દ્રસિંહ ધોનીના નેતૃત્વમાં ભારત બીજી વાર ચેમ્પિયન બન્યું હતું. એ ઉપરાંત ભારત 2003માં રનર-અપ રહી ચૂક્યું છે. એ સમયે ફાઇનલમાં ઓસ્ટ્રેલિયા સામે ભારતને હારનો સામનો કરવો પડ્યો હતો. વિશ્વકપમાં ભારતના પ્રદર્શન પર એક નજર કરીએઃ
• 1975માં ગ્રૂપ રાઉન્ડ સુધી
• 1979માં ગ્રૂપ રાઉન્ડ સુધી.
• 1983માં ચેમ્પિયન બન્યું
• 1987માં સેમિફાઇનલ સુધી
• 1992માં રાઉન્ડ રોબિન સુધી
• 1996માં સેમિફાઇનલ સુધી
• 1999માં સુપર સિક્સ સુધી
• 2003માં રનર-અપ રહ્યું
• 2007માં ગ્રૂપ રાઉન્ડ સુધી
• 2011માં ચેમ્પિયન બન્યું
• 2015માં સેમિફાઇનલ સુધી