ઓક્ટોબરમાં ઓસ્ટ્રેલિયામાં યોજાનારા આઇસીસી ટી 20 વર્લ્ડ કપમાં એક અજીબ પરિસ્થિતિ ઊભી થઈ છે. એક તરફ, આઇસીસી કોઈપણ સ્થિતિમાં આ ટુર્નામેન્ટનું આયોજન કરવા માંગે છે, તો બીજી તરફ યજમાન દેશના અધિકારીઓ અને ખેલાડીઓ સતત એવી વાતો કરી રહ્યાં છે કે, એવું લાગે છે કે તેઓ આ ટૂર્નામેન્ટ રમવા જ નથી માંગતા. કોરોના વાયરસને કારણે ક્રિકેટ જગત થંભી ગયું છે અને આવી સ્થિતિમાં આ ટૂર્નામેન્ટ પર સંકટના વાદળો ઘેરાયા છે, પરંતુ આઈસીસીના એક અધિકારીએ એક ઈન્ટરવ્યૂમાં કહ્યું કે ટી 20 વર્લ્ડ કપ માટેની યોજનાઓ ચાલી રહી છે અને તેના વિશે કોઈ નવી માહિતી હાલ મળી નથી.
આઈસીસી ટી 20 વર્લ્ડ કપ પર ઘેરાયા સંકટના વાદળો
ઓક્ટોબરમાં ઓસ્ટ્રેલિયામાં યોજાનારા આઇસીસી ટી 20 વર્લ્ડ કપને લઈને હાલ કોઈ સ્પષ્ટતા થઈ નથી
જોકે, ખેલાડીઓ વર્લ્ડ કપ યોજવાની વિરૂદ્ધમાં જોવા મળી રહ્યાં છે
ઓસ્ટ્રેલિયાના ખેલાડીઓ નથી ઈચ્છતા ટી 20 વર્લ્ડ કપ?
બીજી તરફ ઓસ્ટ્રેલિયાના ઘણાં મોટા ખેલાડીઓ આઇસીસી ટી -20 વર્લ્ડ કપને લઈને ઉત્સાહિત નથી. તેઓ વારંવાર કહેતા હોય છે કે, આ ટૂર્નામેન્ટ મુલતવી રાખવી પડી શકે છે. તાજેતરમાં જ ઓસ્ટ્રેલિયાના ઓપનર ડેવિડ વોર્નરે રોહિત શર્મા સાથેની એક ઈન્સ્ટાગ્રામ ચેટમાં કહ્યું હતું કે હાલની પરિસ્થિતિમાં આઇસીસી ટી -20 વર્લ્ડ કપનું આયોજન થાય તેની શક્યતા ઓછી છે. વોર્નરના મતે 16 ટીમોને એકસાથે લાવવી ખૂબ જ મુશ્કેલ રહેશે.
માત્ર વોર્નર જ નહીં, ઓસ્ટ્રેલિયન કેપ્ટન એરોન ફિંચે એમ પણ કહ્યું હતું કે, તે ટી -20 વર્લ્ડ કપ સ્થગિત થવા પર માનસિક રીતે તૈયાર છે. ફિંચે સેન રેડિયોને કહ્યું હતું કે, મને લાગે છે કે ટી-20 વર્લ્ડ કપ 2-3 મહિના માટે સ્થગિત કરવામાં આવે તો પણ આપણે માનસિક રીતે તૈયાર રહેવું જોઈએ. ક્રિસ લિન, એલેક્સ કેરીને પણ લાગે છે કે આ ટૂર્નામેન્ટનું આયજન નહી થવાની શક્યતા ઓછી છે. ક્રિસ લિને કહ્યું કે, જો બધી ટીમો ઓસ્ટ્રેલિયા આવે તો પરિસ્થિતિ ખૂબ ખરાબ થઈ શકે છે. જ્યારે કેરીએ કહ્યું કે, જો બધી ટીમો આવી પણ જશે તો પણ ખાલી સ્ટેડિયમમાં ટી 20 વર્લ્ડ કપ રમવાની મજા નહીં આવે.
ઓસ્ટ્રેલિયાનું ધ્યાન ભારત સામેની સીરિઝ પર
તમને જણાવી દઈએ કે, ઓસ્ટ્રેલિયા ક્રિકેટ બોર્ડ અને તેના ખેલાડીઓનું સંપૂર્ણ ધ્યાન ભારત સામેની ટેસ્ટ શ્રેણી, વનડે શ્રેણી અને ટી 20 શ્રેણી પર છે. ડિસેમ્બરમાં ભારત ઓસ્ટ્રેલિયાના પ્રવાસે જવાનું છે. આ શ્રેણીની મદદથી ક્રિકેટ ઓસ્ટ્રેલિયા લોકડાઉન દરમિયાન થયેલા આર્થિક નુકસાનમાંથી બહાર નીકળી શકે છે. જ્યારે ટી 20 વર્લ્ડ કપનું આયોજન કરવાથી તેને આર્થિક રીતે વધારે ફાયદો થશે નહીં.