ભારતને ત્રીજી વખત વિશ્વ ચેમ્પિયન બનવવાને લઇને પહેલો પડકાર આજે અહીં ઓસ્ટ્રેલિયા સામે મળશે. આઇસીસી વર્લ્ડકપની આ મહત્વપૂર્ણ મેચમાં સુકાની વિરાટ કોહલી અને કોચ રવિ શાસ્ત્રીની રણનીતિઓની સાચા અર્થમાં અગ્નિ પરીક્ષા થશે.
ઉલ્લેખનીય છે કે વિશ્વ કપની પ્રથમ મેચમાં દક્ષિણ આફ્રિકા સામે આસાનથી જીત મેળવી હતી. જ્યારે સામે ઓસ્ટ્રેલિયાએ પોતાની બંને મેચમાં જીત મેળવી છે. જેમાં ઓસ્ટ્રેલિયાની ટીમે અફઘાનિસ્તાન તેમજ વેસ્ટ ઇન્ડિંઝને પરાજય આપ્યો હતો.
ખાસ વાતઃ
વિશ્વકપમાં કુલ 11 વખત આમને સામને
ભારતની ત્રણ મેચમાં જીત
ઓસ્ટ્રેલિયાની આઠ મેચમાં જીત
આમ ત્રીજી વખત વર્લ્ડકપ જીતવાના અભિયાનમાં ભારતીય ટીમનો લંડન ખાતે ઓસ્ટ્રેલિયા સામે રોમાંચક જંગ જામશે. આ મેચમાં ભારતીય ટીમના બેટસમેનો અને બોલરોએ શાનદાર પ્રદર્શન દાખવું પડશે. વર્લ્ડકપની આ 14મી મેચ છે. વર્લ્ડકપ પહેલા ઓસ્ટ્રેલિયાની ટીમના નામે ટૂર્નામેન્ટના ઇતિહાસમાં સૌથી વધારે 26 સદી લગાવાનો રેકોર્ડ હતો.
પરંતુ વર્લ્ડકપની પ્રથમ મેચમાં રોહિત શર્માએ શાનદાર સદી ફટકારી ભારતે સૌથી વધુ સદી લગાવાના રેકોર્ડની બરાબરી કરી લીધી છે. આમ વર્લ્ડકપમાં સૌથી વધારે સદી લગાવનારી બંને ટીમ આમને-સામને હશે ત્યારે આ રેકોર્ડ કોના નામે થશે તેના પર સૌની નજર રહેશે. જો કે ઉલ્લેખનીય છે બંને ટીમ વચ્ચે રમાયેલ છેલ્લી દ્વિપક્ષીય સીરીઝમાં ઓસ્ટ્રેલિયા સામે ભારતને હારનો સામનો કરવો પડ્યો હતો.