ટી20 વર્લ્ડકપ / ICCનો મોટો નિર્ણય: ઈંગ્લેન્ડ-પાકિસ્તાનની ફાઇનલ મેચના નિયમો બદલાયા, આ રીતે થશે મુકાબલો

• ટી20 વર્લ્ડકપની ફાઇનલ મેચનાં નિયમોમાં થયો બદલાવ
• હવામાનની અનિશ્ચિત પરિસ્થિતિઓને લીધે લેવાયો નિર્ણય
• જરૂરત પડતાં ICC આ નિયમો ચાલુ મેચમાં કરશે લાગૂ

PAK vs ENG: ટી20 વર્લ્ડકપ હવે છેલ્લા સ્ટેજ એટલે કે ફાઇનલ મેચ માટે તૈયાર છે. આ વર્લ્ડકપ 2022ની આ ફાઇનલ મેચ પાકિસ્તાન અને ઇંગ્લેન્ડની વચ્ચે મેલબર્નનાં ક્રિકેટ ગ્રાઉન્ડમાં રવિવારે 13 નવેમ્બરનાં રોજ થવાની છે. આ મેચમાં એક મોટો વિધ્ન આવી શકે છે. હવામાન વિભાગનાં પૂર્વાનુમાન ક્રિકેટ ફેન્સની આશાઓને નિરાશામાં બદલી શકે છે. આ પરિસ્થિતિને ધ્યાનમાં લેતાં આઇસીસીએ ક્રિકેટ ઓસ્ટ્રેલિયા અને મેલબર્ન ક્રિકેટ ગ્રાઉન્ડ મેનેજમેન્ટ સાથે વાત કરી છે જેના પછીથી ફાઇનલ મેચનાં નિયમોમાં કેટલાક અગત્યનાં ફેરફારો કરવામાં આવ્યાં છે. જરૂરત પડશે તો મેચ દરમિયાન આ નિયમોનો ઉપયોગ કરવામાં આવશે.

ફાઇનલ મેચનાં નિયમો બદલાયા
પાકિસ્તાન અને ઇંગ્લેન્ડની વચ્ચે થનારી ફાઇનલ મેચ ભારતીય સમયાનુલાપ બપોરે 1.30 વાગ્યે શરૂ થશે. મેલબર્નમાં થનારી આ મેચ દરમિયાન 90% થી વધુ સંભાવના છે કે વરસાદ પડશે. આવા સમયે મેચને પૂર્ણ થવામાં વધુ સમયની જરૂરત પડી શકે છે. નિયમોમાં બદલાવ બાદ મેચ શરૂ થવાની ટાઇમિંગ એ જ રહેશે પરંતુ પૂર્ણ કરવા માટે નિર્ધારિત સમયથી આગળ પણ લઇ જઇ શકાશે.

નિર્ધારિત સમયથી આગળ રમી શકાશે મેચ
ફાઇનલ મેચ માટે એક દિવસ રિઝર્વ રાખવામાં આવ્યો છે. એટલે કે જો 13 નવેમ્બરનાં વરસાદ પડે છે તો 14 નવેમ્બરનાં મેચ રમવામાં આવશે. નિયમમાં આવેલા બદલાવ અનુસાર આ દિવસે પણ જરૂરત પડશે તો મેચને નિર્ધારિત સમયથી પહેલાં પણ શરૂ કરી શકાશે. પરંતુ તે ફ્રેશ સ્ટાર્ટ નહીં રહે. પાછળનાં દિવસની મેચ જ્યાં અટકી હતી ત્યાંથી જ મેચ આગળ વધશે. 

ફાઇનલ મેચનાં નિર્ધારિત સમયમાં વધુ 2 કલાક ઉમેરાયા
ઓસ્ટ્રેલિયામાં થઇ રહેલી ટી20 વર્લ્ડકપની મેચ દરમિયાન 4-5 મેચોમાં વરસાદ પડ્યો હતો. આઇસીસી નથી ઇચ્છતી કે ફાઇનલ મેચમાં પણ આ જ સંજોગો રહે. તેથી તેમણે 2 કલાક વધુ ઉમેર્યાં છે. જો વરસાદને લીધે વધારાના 2 કલાકની જરૂરત પડે છે તો તેનો ઉપયોગ કરવામાં આવશે. 

રિઝલ્ટ માટેનાં નિયમોમાં કોઇ બદલાવ નહીં
આ બધી બાબતો માટે કરવામાં આવેલા નિયમોમાં ફેરફાર પછી પણ ફાઇનલ મેચનાં રિઝલ્ટ માટે મેચ ઓછામાં ઓછી 10-10 ઓવરની હોવી આવશ્યક છે. એટલે કે બંને ટીમોએ ઓછામાં ઓછી 10 ઓવરની મેચ રમવી પડશે જેના લીધે મેચનું રિઝલ્ટ આવી શકે.