19 વર્ષીય યુવતી આત્મહત્યા કરવા જઈ રહી હતી. એક જાગૃત નાગરિકે તેને રોકી અને મહિલા હેલ્પલાઈન 181ની મદદ લેવા કહ્યું. યુવતીએ હેલ્પલાઈન 181 પર ફોન કરી કહ્યું બહેન મને નથી જીવવું મારો પતિ છોકરી જેવું વર્તન કરે છે. મને પરિવારમાંથી કોઈ મદદ નથી કરી રહ્યું. મારે મરી જવું છે. અંતે મહિલા હેલ્પલાઈનના કાઉન્સિલર રિટાબહેન તેની મદદે પહોંચ્યા હતા.
માતા પિતાની ખુશી માટે સ્મિત સાથેનું સગપણ સ્વીકારી લીધુ
પરિવારમાંથી કોઈ મદદ નથી કરી રહ્યું
પતિએ કહ્યું, તું કોઈ છોકરા સાથે ભાગી જા.
નડિયાદ જિલ્લાના ગલતેશ્વર તાલુકાના વસો ગામમાં રહેતી બીએસસીનો અભ્યાસ કરી રહેલી સ્વરા(19)ના લગ્ન 7 મહિના પહેલા સ્મિત 27 વર્ષીય એન્જિનિયર સ્મિત સાથે થયા હતા. યુવતીની મોટી બહેને અન્ય જ્ઞાતિમાં લગ્ન કર્યા હતા. જેથી માતાપિતા સ્વરા પણ ભણી ગણીને અન્ય જ્ઞાતિના યુવક સાથે લગ્ન ન કરી લે ડરે સ્વરાની મરજી વિરુદ્ધ તેના લગ્ન સ્મિત સાથે કરાવ્યા હતા.
સ્વરાએ પણ માતા પિતાની ખુશી માટે સ્મિત સાથેનું સગપણ સ્વીકારી લીધું હતુ, પણ નિયતીને કંઈક અલગ જ મંજૂર હતુ. સ્વરા જ્યારે લગ્ન કરી સાસરે ગઈ તો તે તેના પતિના વર્તનને જોઈને સ્તબ્ધ થઈ ગઈ હતી. તેનો પતિ છોકરીની જેમ શણગાર સજતો હતો. તે નેઈલ પોલિશ કરતો હતો. છોકરીની જેમ વાતો કરતો છોકરીની જેમ ચાલતો હતો. સ્વરા સાથે પતિ જેવુ વર્તન પણ નહોતો કરતો. અંતે સ્વરાએ સ્મિતને કહ્યું કે મને તારી સાથે નથી ફાવતું તુ મને છુટાછેડા આપી દે. તો પતિએ કહ્યું કે હું છુટાછેડા નહીં આપું મારા મમ્મી પપ્પા નહીં માને. તું કોઈ છોકરા સાથે ભાગી જા.
સ્વરાએ માતાપિતાને વાત કરી, પણ માતા પિતા તેને મદદ કરવાની જગ્યાએ જબરજસ્તી સાસરે મોકલી રહ્યા હતા. અંતે કંટાળેલી સ્વરા પોતાના તમામ ડોક્યુમેન્ટ લઈ ઘરેથી નીકળી ગઈ હતી. બે દિવસ રોડ પર રાત વિતાવી કંટાળેલી સ્વરા આત્મહત્યા કરવા નદી કિનારે પહોંચી હતી. જ્યાં એક જાગૃત નાગરિકે તેને મદદ કરી, 181 અંગે જાણ કરી હતી.
સ્વરાની મદદે પહોંચેલી મહિલા હેલ્પલાઈન 181ના કાઉન્સિલરે તેની વાત સાંભળીને તેને બાંહેધરી આપી. સ્વરાના માતા -પિતાને બોલાવી તેમનું કાઉન્સેલિંગ કરી તેમની પાસે લખાણ લીધું કે તે દીકરીના છુટાછેડા કરાવી તેનું ભણવાનું ચાલું રાખશે.
(પાત્રોના નામ બદલેલ છે.) સ્ટોરી : ધર્મિષ્ઠા પટેલ, મુંબઈ