ઇલેક્શન 2022 / VIDEO: ભાજપ નેતાએ કહ્યું 5 રૂપિયા આપશો તોય ચાલશે... લોકો 500-500ની નોટ આપવા લાગ્યા

• સાવલીમાં ભાજપ કાર્યકરોનું વિજય વિશ્વાસ સંમેલન યોજાયું
• કેતન ઈનામદારે કાર્યકરો અને જનતા પાસે ફોર્મ ભરવા માંગ્યા નાણાં 
• લોકોએ ચાલુ કાર્યક્રમમાં હજારો રૂપિયા કેતન ઈનામદારને આપ્યા 
• સાવલીની જનતાના રૂપિયાથી આ વખતે ફોર્મ ભરીશઃ કેતન ઈનામદાર

ગુજરાતમાં વિધાનસભા ચૂંટણીમાં હવે માત્ર ગણતરીના દિવસ જ બાકી રહ્યા છે ત્યારે ભારતીય જનતા પાર્ટી દ્વારા ધડાધડ ઉમેદવાર જાહેર કરવામાં આવી રહ્યા છે. ભારતીય જનતા પાર્ટીએ અગાઉ 160 ઉમેદવાર જાહેર કર્યા હતા જેમાં વધુ 6 ઉમેદવારોના નામ આજે જાહેર કરવામાં આવ્યા છે. ભાજપ દ્વારા વડોદરા જિલ્લાની તમામ પાંચ બેઠકો ઉપર ઉમેદવારો જાહેર કરી દેવામાં આવ્યા છે. જેમાં વાઘોડિયા બેઠક ઉપર જિલ્લા ભાજપા પ્રમુખ અશ્વિન પટેલ, કરજણ બેઠક ઉપર વર્તમાન ધારાસભ્ય અક્ષય પટેલ અને પાદરા બેઠક ઉપર પાદરા નગરપાલિકા પ્રમુખ ચૈતન્યસિંહ ઝાલા, સાવલી બેઠક ઉપર કેતન ઇનામદાર અને ડભોઇ બેઠક ઉપર શૈલેષ મહેતા (સોટ્ટા)નું નામ જાહેર કરવામાં આવ્યું છે.

કેતન ઈનામદારે રૂપિયા માંગતા જ લોકો દોડી આવ્યા
સાવલી બેઠકના ભાજપ ઉમેદવાર કેતન ઈનામદારે ચૂંટણી પ્રચારના શ્રીગણેશ કર્યા હતા. ગતરોજ સાવલીમાં ભાજપ કાર્યકરોનું વિજય વિશ્વાસ સંમેલન યોજાયું હતું. આ સંમેલનમાં હજારોની સંખ્યામાં લોકો હાજર રહ્યા હતા. આ દરમિયાન કેતન ઈનામદારે કાર્યકરો અને લોકો પાસે ફોર્મ ભરવા નાણાં માગતા લોકોએ ચાલુ કાર્યક્રમમાં હજારો રૂપિયા કેતન ઈનામદારને આપ્યા હતા. 

ફોર્મ ભરવા માટે એક રૂપિયો ખર્ચ હું મારા ખિસ્સામાંથી નથી કરવાનોઃ ઈનામદાર
વિજય વિશ્વાસ સંમેલનમાં કેતન ઈનામદારે હુંકાર કરતા કહ્યું હતું કે, 'આ વખતે ફોર્મ ભરવા માટે એક રૂપિયો ખર્ચ હું મારા ખિસ્સામાંથી નથી કરવાનો, તમારા આશીર્વાદથી ભગવાને કેતનને ઘણું આપ્યું છે. સાવલી બેઠક નહીં 182 વિધાનસભાના ફોર્મ ભરવાના હોય તો પણ તમારા ભાઈનો હાથ પાછો પડે એમ નથી. પણ આ વખતે મારે લોકોને બતાવવું છે સાવલીની જનતાના રૂપિયાથી આ વખતે મારે ફોર્મ ભરવું છે. મારે તમારો રૂપિયો જોઈએ છે, પાંચ રૂપિયા તો પાંચ રૂપિયા અને 10 રૂપિયા તો 10 રૂપિયા તમારી યથાશક્તિ પ્રમાણે તમારે તમારા ભાઈને આપવા છે. આપશો કે નહીં આપો?' આમ કહેતા જ લોકો તેમને પૈસા આપવા માટે સ્ટેજ પાસે દોડી આવ્યા હતા અને તેમને પૈસા આપવા લાગ્યા હતા. 

જુઓ વીડિયો