અમદાવાદ / જીત નહીં મળે ત્યાં સુધી લડીશ: અમદાવાદ કોર્પોરેશનની ચૂંટણીમાં કિન્નરે નોંધાવી દાવેદારી

• અમદાવાદમાં કિન્નર પણ ચૂંટણીના મેદાને 
• AMCની ચૂંટણીમાં અપક્ષમાંથી ઝંપ્લાવ્યું
• જીત નહીં મળે ત્યાં સુધી ચૂંટણી લડવાનો નિર્ધાર

ગુજરાતની સ્થાનિક સ્વરાજની ચૂંટણીમાં અમદાવાદ કોર્પોરેશન માટે કિન્નર નેતાએ પણ પોતાની ઉમેદવારી નોંધાવી છે. અને લોકોના પ્રશ્નો અને મુદ્દાઓ સાથે તેણે એકલા હાથે પ્રસાર-પ્રચાર પણ શરૂ કર્યો છે. આજે તમને જણાવીશું કે, આ કિન્નર નેતા કોણ છે, કેમ તેણે ઉમેદવારી નોંધાવી છે. 

6 મહાનગરપાલિકાઓની આગામી 21મી ફેબ્રુઆરીએ ચૂંટણી યોજાવાની છે. જેમાં ઉમેદવારી નોંધાવવાની પ્રક્રિયા પણ પૂર્ણ થઈ ચૂકી છે. અને ઉમેદવારોએ પોતપોતાના મતવિસ્તારોમાં મતવિસ્તારમાં પ્રચાર-પ્રસારના કાર્યક્રમો પણ શરૂ કરી દીધા છે. ભાજપ-કોંગ્રેસ સહિતના પક્ષોના  ઉમેદવારો પોત-પોતાના મતદારોને રીઝવવાના પ્રયાસોમાં લાગ્યા છે. ત્યારે આ વખતે AMCની ચૂંટણીમાં એક કિન્નર નરેશ જયસ્વાલ ઉર્ફે રાજુ માતાજીએ પણ ઉમેદવારી નોંધાવી છે. અને જીતના દાવા સાથે ચૂંટણી પ્રચાર પણ શરૂ કર્યો છે. 

સરસપુર-રખિયાલ વોર્ડમાંથી અપક્ષ ઉમેદવાર તરીખે પોતાનું નામ નોંધાવનાર રાજુમાતા આ પહેલા ત્રણ વખત ચૂંટણીમાં ઉમેદવારી નોંધાવી ચૂક્યા છે. તેમજ જ્યાં સુધી જીતશે નહીં ત્યાં સુધી ચૂંટણી લડતા રહેવાનો નિર્ધાર કર્યો છે. આ વખતની ચૂંટણીમાં રાજુમાતાએ પોતાનું ચૂંટણી ચિહન બંગડી રાખ્યું છે. કિન્નર રાજુ માતાજીએ પોતાના વિસ્તારની સમસ્યા અને લોકોની સેવા કરવાના હેતુથી ઉમેદવારી નોંધાવી છે. આ અગાઉ સ્થાનિક સ્વરાજની ચૂંટણી, વિધાનસભા અને લોકસભામાં પણ તેમણે ઉમેદવારી નોંધાવી હતી, જેમાં ઘણા મત પણ મેળવ્યા હતા.

અહીં ઉમેદવાર કોણ છે. તેનાથી ફરક નથી પડતો. કારણ કે, દરેક ઉમેદવાર કોઈને કોઈ લાલચ સાથે રાજનીતિમાં આવતા હોય છે. જનતાની સેવા કરવાનું તો દરેક રટણ કરતા હોય છે. પરંતુ એક કિન્નર ચૂંટણીમાં દાવેદારી કરે તે પણ લોકો માટે સારું છે. હાલ તો રાજૂમાતા લોકોના ઘર-ઘર સુધી જઈને પોતાને મત આપવા માટે અપીલ કરી રહ્યા છે. તેવામાં જોવાનું એ રહેશે કે, ભાજપ-કોંગ્રેસના દાવપેચ વચ્ચે રાજૂમાતા તરફ કેટલા પ્રમાણમાં લોકો આકર્ષિત થાય છે.