કોરોના વાયરસના કહેરના કારણે દુનિયાનાં દેશોમાં ફફડાટ છે. થોડા મહિના પહેલા જ આ વાયરસ આવ્યો અને આખી દુનિયાને પોતાની ઝપેટમાં લઇ લીધું. એવામાં આ મહામારીની ખેલ જગત પર પણ અસર પડી છે કારણ કે ઘણીબધી ટૂર્નામેન્ટ કોરોનાના કારણે રદ્દ થઇ ગઈ અને કેટલાય ખેલાડીઓ કોરોનાથી પીડાઈ રહ્યા છે. એવામાં ધુરંધર ખેલાડી ઈંગલેન્ડના સ્પિનર જેક લીચે મોટી કબૂલાત કરીછે કે તેમનામાં કોરોના વાયરસ જેવા લક્ષણો દેખાયા હતા જોકે તે સમયે કોરોનાએ મહામારીનું રૂપ લીધું ન હતું.
સાઉથ આફ્રિકાના પ્રવાસ દરમિયાન દેખાયા લક્ષણો
ત્રીજી ટેસ્ટ પહેલા અન્ય કારણોથી સીરીઝ છોડવી પડી હતી
લીચે કહ્યું કે હવે હું સંપૂર્ણ સ્વસ્થ છું
ઈંગલેન્ડના સ્પિનર જેક લીચે સ્વીકાર કર્યો છે કે સાઉથ આફ્રિકાના પ્રવાસ દરમિયાન તેમનામાં કોરોના વાયરસના લક્ષણો દેખાયા છે. ડીસેમ્બર અને જાન્યુઆરી મહિનામાં સાઉથ આફ્રિકાના પ્રવાસમાં લીચ સીરીઝનો હિસ્સો હતા. જોકે ત્રીજા ટેસ્ટ પહેલા તેમણે સ્વદેશ પરત ફરવું પડ્યું હતું કારણ કે તે સેપસિસથી પીડાઈ રહ્યા હતા.
મીડિયા અહેવાલ અનુસાર લીચે કહ્યું કે સાઉથ આફ્રિકા પ્રવાસમાં તેમનામાં જે લક્ષણો દેખાયા તે કોરોના વાયરસ જેવા જ હતા. તેમણે કહ્યું કે હવે તો આપણને ક્યારેય ખબરજ નહીં પડે કે તે લક્ષણો હતા તે નિશ્ચિતરૂપે કોરોનાના જ હતા કે નહીં. જોકે હવે હું સ્વસ્થ છું અને તંદુરસ્ત અનુભવી રહ્યો છું'
આઠ જુલાઈથી શરુ થઇ રહેલા ત્રણ ટેસ્ટ મેચની સીરીઝમાં પણ 30 સદસ્યોની ટીમનો પણ તે હિસ્સો છે. 29 વર્ષીય ખેલાડીએ કહ્યું કે 14 વર્ષની ઉંમરથી તે ક્રોહન બીમારીથી પીડાઈ રહ્યા છે અને તેની દવાઓ પણ લેતા રહે છે.
લીચે કહ્યું કે જે દવા પર હું છું તે મને વધુ જોખમમાં નાખે છે પરંતુ શિયાળામાં હું જે પરિસ્થિતિથી પસાર થયો તેનાથી એક વાત સ્પષ્ટ છે કે હું આ બધાથી કટિબદ્ધતાથી લડી શકું છું. જોકે બીજા કરતા આ દવાથી ખતરો ઓછો છે. તેમણે કહ્યું કે મારું ક્રોહન નિયંત્રણમાં છે જે મારા માટે ખૂબ સારું છે. હું ભાગ્યશાળી છું કે મારી બીમારી હવે સારી થઇ ગઈ છે અને હું સ્વસ્થ-તંદુરસ્ત અનુભવી રહ્યો છું.