તાપસી પન્નુએ પોતાની ફિલ્મી કારકિર્દી 2010માં તેલુગુ ફિલ્મ 'ઝુમંદી નાદમ'થી કરી હતી. ત્યારબાદ તે સાઉથની ઘણી ફિલ્મોમાં જોવા મળી. ડેવિડ ધવનની કોમેડી ફિલ્મ 'ચશ્મે બદ્દુર'થી તેણે બોલિવૂડમાં પગ મૂક્યો તો 'બેબી'માં જબરદસ્ત એક્શન કરીને તેણે સાબિત કર્યું કે તે કંઇ પણ કરી શકે છે. ત્યારબાદ તેણે 'પિંક', 'નામ શબાના', 'જુડવા-2', 'મૂલ્ક', 'મનમર્જિયા' જેવી ઘણી હિટ ફિલ્મો આપી.
તાપસી કહ્યુ કે,''હું મારી અત્યાર સુધીની કારકિર્દીને લઇ ખૂબ જ ખુશ છું. મેં મારી કરિયરને લઇ જે વિચાર્યું હતું તેવી સફળતા મને મળી ગઇ છે. ફિલ્મ 'પિંક' આવી ત્યારે અચાનક લોકોને લાગ્યું કે તાપસી સારી એક્ટિંગ કરી શકે છે. આ મારી કરિયરનો ટર્નિંગ પોઇન્ટ હતો, પરંતુ તે મારી કરિયરની સૌથી બેસ્ટ ફિલ્મ સાબિત થઇ.''
'મૂલ્ક' ફિલ્મ બાદ દર્શકોને તાપસી પરનો વિશ્વાસ થોડો વધારે વધી ગયો. 'જુડવા-૨'ની સુપર સફળતાએ તાપસીને 100 કરોડની ક્લબમાં પહોંચાડી દીધી. 'બદલા' ફિલ્મ દર્શકોને ખૂબ જ પસંદ પડી. હવે લોકોને લાગવા લાગ્યું છે, કે તાપસી દરેક પાત્રને અલગ રીતે પરદા પર નિભાવી શકે છે.
તાપસીએ કહ્યુ કે,'' મારી લાઇફમાં ફિલ્મો કરતાં વધારે વસ્તુઓ હોવી જોઇએ. માત્ર ફિલ્મોમાં જ મારે મારી આખી જિંદગી વીતાવવી નથી. હું ઇચ્છું છું કે મારું કામ માત્ર ફિલ્મો સુધી સીમિત ન રહે. ફિલ્મોમાં હું અલગ અલગ પાત્ર ભજવવા ઇચ્છું છું. ક્યારેક મારી પાસે જે અપેક્ષા ન થઇ હોય અને દર્શકોને મારું પાત્ર સરપ્રાઇઝિંગ લાગે તો મને ખૂબ મજા આવશે. ''