ક્રિકેટ / 'હું મારા સપનામાં પણ સૂર્યકુમારની જેમ બેટિંગ કરી શકતો નથી', ન્યુઝીલેન્ડના બેટ્સમેને કરી ભારતીય ખેલાડીની પ્રશંસા

• ભારતીય ખેલાડી સૂર્યકુમાર યાદવની દિગ્ગજ દ્વારા પ્રશંસા
• ન્યુઝીલેન્ડના બેટ્સમેન ગ્લેન ફિલિપ્સે કર્યા 360 મેનના વખાણ
• સુર્યા જે કામ કરે છે, તે સપનામાં પણ નથી કરી શકતો: ફિલિપ્સ

ભારતીય ખેલાડી સૂર્યકુમાર યાદવના 360 શોટ લોકોને ખુબ પસંદ આવી રહ્યા છે ત્યારે ઘણા દિગ્ગજ ખેલાડીઓ પણ આ રમતને જોઇને મોહી ગયા છે ત્યારે ન્યુઝીલેન્ડના બેટ્સમેન ગ્લેન ફિલિપ્સે શનિવારે કહ્યું કે તે સપનામાં પણ આ ભારતીય દિગ્ગજ ખેલાડીની જેમ શાનદાર શોટ રમી શકતો નથી. સૂર્યકુમાર T20 રેન્કિંગમાં વિશ્વનો ટોચનો બેટ્સમેન છે અને જ્યારે ભારતીય ટીમ ન્યૂઝીલેન્ડ સામે માઉન્ટ મૌંગાનુઈના 'બે ઓવલ' મેદાન પર ઉતરશે ત્યારે ગ્લેન ફિલિપ્સને રોકવાનો પડકાર હશે. ફિલિપ્સે આ મેદાન પર 46 બોલમાં સદી ફટકારી છે.

આવી પ્રતિભા ભાગ્યે જ જોવા મળે
ફિલિપ્સે એક મીડિયા પ્રેસને કહ્યું, "તે (સૂર્યા) એકદમ અવિશ્વસનીય છે. તે જે કામ કરે છે, હું સપનામાં પણ નથી જોઈ શકતો. મને પ્રયાસ કરવાનું ગમશે પરંતુ મારી રમત તેના કરતા ઘણી અલગ છે. કાંડાની શક્તિથી સિક્સર મારવાની ક્ષમતા તેને ખાસ બનાવે છે. તમે આવી પ્રતિભા ભાગ્યે જ જોશો. ફિલિપ્સે કહ્યું કે તે અને સૂર્યકુમાર જે રીતે રમે છે, વિરોધી બોલરોને પણ વિકેટ લેવાની વધુ તક મળે છે.

પોત પોતાની શક્તિ અલગ અલગ છે
તેણે કહ્યું, “મારી પાસે મારી શક્તિ છે અને તેની પાસે તેની શક્તિ છે અને અમે અમારું કામ અલગ-અલગ રીતે કરીએ છીએ. અમે બંને જે રીતે રમીએ છીએ તેનાથી વિરોધીને પણ અમને આઉટ કરવાનો મોકો મળે છે. આ વસ્તુ T20માં જોખમ અને પુરસ્કારનો એક ભાગ છે. સૂર્યકુમારે આ કેલેન્ડર વર્ષમાં 43ની એવરેજ અને 186ના પ્રભાવશાળી સ્ટ્રાઈક-રેટથી 1040 રન બનાવ્યા છે. તે આ વર્ષે T20 ફોર્મેટમાં વિશ્વનો સૌથી વધુ રન બનાવનાર ખેલાડી છે. ફિલિપ્સ ICC બેટ્સમેનોની યાદીમાં આઠમા ક્રમે છે. આ દરમિયાન તેણે 158થી વધુની સ્ટ્રાઈક રેટથી 650 રન બનાવ્યા છે.