અમદાવાદ / હું IPS છું અધિકારી છું, તમે મારું નામ કેવી રીતે પૂછી શકો છો?’ નકલી IPS મહિલાની ધરપકડ

માધવપુરા પોલીસ સ્ટેશનની સર્વેલન્સ સ્ક્વોડના પીએસઆઇ એ.એન. દેસાઈ અને સ્ટાફના માણસો પેટ્રોલિંગમાં હતા તે દરમિયાન પોલીસ કંટ્રોલરૂમમાંથી મેસજ મળ્યો કે મીનાક્ષી રાવજીભાઈ પટેલ પોલીસ કમિશનર કચેરી ખાતે આવેલ છે. પોલીસ કંટ્રોલરૂમમાં આવીને તેણે જણાવ્યું હતું કે હું ર૦૦રની બેન્ચની આઇપીએસ ઓફિસર છું, મારી બદલી રાજકોટથી અમદાવાદ ખાતે થઇ છે. 

ત્યારબાદ પોલીસ કંટ્રોલરૂમના પોલીસ કર્મચારીઓએ મહિલા પાસે આઈકાર્ડ કે બીજા કોઈ ડોક્યુમેન્ટ બાબતે પૂછતાં તે મહિલાએ તેની પાસે કોઈ ડોક્યુમેન્ટ ન હોવાનું કહ્યું હતું અને મહિલા ખોટું બોલતી હોવાથી તે અંગે માધવપુરા પોલીસને જાણ કરાઈ હતી.

માધવપુરા પોલીસ કંટ્રોલરૂમમાં પહોંચી ત્યારે ત્યાં મહિલા હાજર હતી. માધવપુરા પોલીસે મહિલાને તેનું નામ પૂછતાં અને તે આઇપીએસ હોવાનું આઇકાર્ડ માગતાં તે અકળાઈ ગઈ હતી અને તેણે કહ્યું કે, હું આઈપીએસ અધિકારી છું, તમે મારું નામ કેવી રીતે પૂછી શકો છો, હું આઇપીએસ અધિકારી છું, તમારી જોડે મારું નામ પૂછવાની સત્તા નથી તેમ કહીને તેણે દમ માર્યો હતો.