હ્યુંડઇ (Hyundai) ભારતીય માર્કેટમાં પોતાની પહેલી ઑલ ઇલેક્ટ્રિક કાર હ્યુંડઇ કોના (Hyundai Kona) ને રજૂ કરવા જઇ રહી છે. આ કાર 9 જુલાઇ 2019એ લોન્ચ થશે. આ લોન્ચ પહેલા હ્યુંડઇએ પોતાના સત્તાવાર ટ્વિટર એકાઉન્ટ પર કોનાનું એક ટીઝર જાહેર કર્યું છે. આ ટીઝર વીડિયોમાં દાવો કરાયો છે કે કોના એટલા સમયમાં ચાર્જ થશે જેટલા સમયમાં એક સ્માર્ટફોન ચાર્જ કરવામાં લાગે છે.
ઇન્ટરનેશનલ માર્કેટ્સમાં હ્યુંડઇ કોના ઇવી 39.2 kWh અને 64 kWh બેટરી પેક સાથે અવેઇલેબલ છે. ભારતમાં 39.2 kWh બેટરી પેક વાળી કોના આવવાની સંભાવના છે. 39.2 kWh વેરિએન્ટ સિંગલ ચાર્જ પર 312 કિમી સુધી જવાનો દાવો છે.
કેટલી વારમાં થશે ફુલ ચાર્જ
39.2 kWh વેરિએન્ટની ઇલેક્ટ્રિક મોટર 136 HP પાવર અને 395 Nmનો પીક ટોર્ક જનરેટ કરશે. તેમા સિંગલ સ્પીડ ઓટોમેટિક ટ્રાન્સમિશન હશે. 7.2 kW AC ચાર્જરથી ચાર્જ કરવા પર તેની બેટરી ફુલી ચાર્જ થવામાં 6.5 કલાક લેશે. જ્યારે તેના 100 kW DC ફાસ્ટ ચાર્જરથી ચાર્જ કરવામાં આવે તો માત્ર 50 મિનિટમાં 80 ટકા ચાર્જ થઇ જશે.
ઇન્ટરનેશનલ માર્કેટમાં હાજર 64 kWh બેટરી પેક વાળી હ્યુંડઇ કોનાની વાત કરીએ તો, તેની ઇલેક્ટ્રિક મોટર 203 HP પાવર અને 395 NM નો પીક ટોર્ક જનરેટ કરે છે. સિંગલ ચાર્જ પર તેની રેન્જ 482 Km છે. ડીસી ફાસ્ટ ચાર્જરથી ચાર્જ કરવા પર તે 80 ટકા ચાર્જ થવામાં 54 મિનિટ લેશે. જ્યારે 7.2 kW વૉલ ચાર્જરથી ચાર્જ કરવા પર તે 9.35 કલાકમાં ફુલી ચાર્જ થઇ શકશે.
શું હશે કિંમત
હ્યુંડઇ કોનાની ભારતમાં કિંમત 25 લાખથી 30 લાખ રુપિયા વચ્ચે રહેવાની આશા છે. તેમા LED હેડલેમ્પ્સ અને ટેલ લેમ્પ્સ, ઑટોમેટિક ક્લાઇમેટ કંટ્રોલ, 17 ઇંચ અલોય વ્હીલ્સ જેવા ઘણા ફીચર્ચ રહેશે.