તેલંગાણાના રંગારેડ્ડી જિલ્લામાં 26 વર્ષીય પશુ ચિકિત્સક પર બળાત્કાર અને હત્યાના કેસમાં મોટો ખુલાસો થયો છે. આ કેસની તપાસ કરી રહેલા અધિકારીએ રિમાન્ડ રિપોર્ટ બનાવ્યો હતો અને તેના અંગે કેટલીક માહિતી આપી હતી.
તેલંગાણામાં 26 વર્ષીય ડોક્ટર પર બળાત્કાર મામલો
આરોપીઓએ જાણી જોઇને સ્કૂટીમાં પાડ્યું હતું પંક્ચર
દેશભરમાં આરોપીઓ સામે રોષ
રિમાન્ડ રિપોર્ટમાં જણાવેલ બાબતો ચોંકાવનારી છે. રિપોર્ટ અનુસાર આરોપીએ મહિલા ડોક્ટર પર બળાત્કારનું કાવતરું ઘડ્યું હતું. તેણે સાંજે જ ડોક્ટરને સ્કૂટી પાર્ક કરતા જોઇ હતી. ત્યારપછી, ઇરાદાપૂર્વક સ્કૂટીને પંક્ચર પાડ્યું હતું. બળાત્કાર પૂર્વે આરોપીઓએ દારૂ પીધો હતો. ત્યાર બાદ મહિલાને વશમાં કરવાના બહાને ગેંગરેપ કર્યો હતો. ગેંગરેપ બાદ મહિલા બેહોશ થઈ ગઈ હતી.
ડોક્ટરને ભાન આવ્યું તો ગળું દબાવીને કરાઇ હત્યા
જ્યારે મહિલાને ભાન આવ્યું ત્યારે તેણીનું ગળું દબાવીને હત્યા કરવામાં આવી હતી. ત્યારબાદ, લાશને ધાબળામાં લપેટીને અન્ડરબ્રીજ પર લાવી પેટ્રોલ નાંખીને શબને સળગાવી દીધું હતું. આપને જણાવી દઇએ કે આ કેસમાં એસઆઈ સહિત ત્રણ પોલીસકર્મીઓને સસ્પેન્ડ કરવામાં આવ્યા છે.
દેશમાં દુ:ખ અને રોષનું વાતાવરણ
આ પોલીસકર્મીઓ પર કેસ નોંધવામાં અને કાર્યવાહી કરવામાં બેદરકારી કરી હોવાનો આરોપ છે. આ મામલે સમગ્ર દેશમાં દુ: ખ અને રોષનું વાતાવરણ છે. રાષ્ટ્રીય મહિલા આયોગની ટીમ પણ શનિવારે તેલંગાણા પહોંચી હતી. ટીમના સભ્યો પીડિતના સબંધીઓને મળ્યા, તેમને દિલાસો આપ્યો. તેમજ કાર્યવાહી કરવાની ખાતરી આપી હતી.
રસ્તામાં અધવચ્ચે બંધ થયું ડોક્ટરનું સ્કૂટી
પીડિત પરિવારજનોએ સમગ્ર મામલામાં પોલીસના વલણ પર સવાલ ઉઠાવ્યા છે. મળતી માહિતી પ્રમાણે, ગુરુવારે રાત્રે મૃતક મહિલા ડોક્ટરનું સ્કૂટી રસ્તામાં ખરાબ થઇ ગયું હતું. સૂમસાન સ્થળે તેનું સ્કૂટી બંધ થઇ જતાં તે ડરી ગઇ હતી. આ અંગે તેણે તેના પરિવારજનોને ફોન કરીને માહિતી આપી હતી.
બળેલી હાલતમાં મળી આવ્યો મૃતદેહ
જો કે, ત્યારબાદ તેનો ફોન સ્વીચ ઓફ આવ્યો હતો અને તેનો મૃતદેહ બળી ગયેલી હાલતમાં મળી આવ્યો હતો. તેલંગાણાના રંગારેડ્ડી જિલ્લામાં ડોક્ટર સાથે થયેલ હેવાનિયતને પગલે દેશભરમાં દેખાવો યોજવામાં આવી રહ્યા છે. હૈદરાબાદ, કોલકાતા, દિલ્હી અને અલીગઢમાં દેખાવો થયા છે.