મહેસાણામાં છૂટાછેડા નહીં આપનારી પત્ની પર પતિએ એસિડ છાંટી દીધું હોવાની હડકંપ મચાવતી ઘટના સામે આવી છે. જેને લઈને મહિલાને સારવાર અર્થે ખસેડી પોલીસ ફરિયાદની તજવીજ હાથ ધરાઈ છે.
મહેસાણામાં પતિએ કર્યો પત્ની પર એસિડ એટેક
બંને વચ્ચે કડી કોર્ટમાં છુટાછેડા તેમજ દહેજનો કેસ ચાલતો હતો
મહેસાણાના કડીમાં છત્રાલ રોડ પર બની ઘટના
મહેસાણા જિલ્લામાં ચોંકાવનારો કિસ્સો સામે આવ્યો છે. જેમાં છૂટાછેડા નહિ આપનાર પત્ની ઉપર પતિએ એસિડ એટેક કર્યો હોવાનું સામે આવતા સનસનાટી મચી જવા પામી છે. મહેસાણાના કડીમાં છત્રાલ રોડ પર રિલાયન્સ પેટ્રોલ નજીક બનેલી આ ઘટનાને લઈને લોકોના ટોળે ટોળા ઉમટી પડ્યા હતા.
લગ્ન જીવનમાં ખટરાગ થતાં પરિણીતા કડી પિયરમાં રહેતી હતી
આ અંગેની પ્રાથમિક વિગત એવી છે કે થોડા સમય અગાઉ બરોડા વ્યવસાય કરતા યુવક સાથે યુવતીના લગ્ન થયા હતા. ત્યારબાદ લગ્ન જીવનમા ખટરાગ થયો હતો અને બન્ને વચ્ચે ઝઘડાઓ પણ થતા હતા. જેને પગલે કંટાળી ગયેલી પરિણીતા પોતાના પિયર કડી ચાલી ગઈ હતી. ત્યારબાદ બંને વચ્ચે કડી કોર્ટમા છુટાછેડા અન તેમજ દહેજનો કેસ હાલ ચાલી રહ્યો છે. આ દરમિયાન પત્ની છુટાછેડા ન આપતી જોવાની રાવ સાથે પતિએ ઝઘડો કર્યો હતો.
પરિણીતાને સારવાર અર્થે હોસ્પિટલમાં ખસેડવામાં આવી
ત્યારબાદ પરણીતા અને તેનો ભાઈ ઘરે જતાં હતા આ વેળાએ ઉશ્કેરાઈ ગયેલા પતિએ એસિડ ભરેલી બોટલ પત્ની પર નાંખી દીધી હતી.જેથી એસિડના છાંટા મહિલાના શરીરના ભાગે ઉડયા હતા. જેની પીડાથી મહિલાએ બુમાબુમ કરી હતી. જેને પગલે લોકો એકઠા થઈ ગયા હતા. આ હુમલો કરી આરોપી નાશી છૂટ્યો હતો. બીજી બાજુ ભોગગ્રસ્ત પરિણીતાને સારવાર અર્થે તાત્કાલીક હોસ્પિટલમાં ખસેડવામાં આવી હતી. આ મામલે પરણીતાના નિવેદન આધારે પોલીસ ફરિયાદ લેવા પોલીસે તજવીજ હાથ ધરી છે.