અમદાવાદ / પતિએ કરેલી આત્મહત્યાના 13 દિવસ બાદ થયો ઘટસ્ફોટ, યુવકે મરતા પહેલા માતાને આપેલી આ વસ્તુથી થયો પર્દાફાશ

• પત્નીની બેવફાઈથી પતિનો આપઘાત
• પત્નીનુ મિત્ર સાથે જ હતા અનૈતિક સંબંઘ
• પતિને મિત્ર અને પત્નીના સંબંધની જાણ થતા લીધુ અંતિમ પગલુ

દોસ્ત દોસ્ત ના રહા પ્યાર પ્યાર ના રહા... આવો જ કિસ્સો અમદાવાદના કાગડાપીઠ વિસ્તારમા સામે આવ્યો છે. જેમાં પત્ની અને મિત્ર વચ્ચે પ્રેમ સંબંધની જાણ થતા પતિએ આપઘાત કર્યો. ઘટનાની વિગત એવી છે કે કાગડાપીઠ વિસ્તારમાં રહેતા ભરત મારુ નામના યુવકે 13 દિવસ પહેલા આત્મહત્યા કરી લીધી હતી. તે સમયે પોલીસે અકસ્માતે મોતનો ગુનો નોંધ્યો હતો. જો કે, મરતા પહેલાં યુવકે બે મોબાઇલ અને પેન ડ્રાઇવ માતાને આપી હતી. જે પરિવારના સભ્યોએ ચેક કરતા ભરતની પત્ની દક્ષા મારુને મૃતકના મિત્ર જિગ્નેશ સાથે પ્રેમ સબંધ હોવાનું રેકોર્ડિંગ બહાર આવ્યું હતું. જેથી આ મામલે મૃતકની માતાએ પુત્રવધૂ દક્ષા અને પ્રેમી જિગ્નેશ વિરુદ્ધ દુષ્પ્રેરણાની ફરિયાદ નોંધાવી હતી. જેથી કાગડાપીઠ પોલીસે પુરાવા એકઠા કરી આરોપીની તપાસ શરૂ કરી છે.
 
આ પેન ડ્રાઇવ અને મોબાઇલ ફોન દિપકને આપી દેજેઃ ભરત

આશરે 8 વર્ષ પહેલા ભરતએ દક્ષા સાથે પ્રેમલગ્ન કર્યા હતા. બન્નેનો 3 વર્ષનો પુત્ર છે. દક્ષાના અગાઉ ભરતના પાડોશમાં રહેતા એક વ્યકિત સાથે લગ્ન થયા હતા. પરંતુ તેને ભરત સાથે પ્રેમ થઈ જતા બન્ને લગ્ન કરી લીધા હતા. અઢી મહિના પહેલા દક્ષા પોતાના સંતાનને લઇ પિયર જતી રહી હતી. જેથી ભરત દુઃખી રહેતો હતો અને કોઇની સાથે વાતચીત પણ કરતો ન હતો. 7 સપ્ટે.ના રોજ ભરતે માતાને એક પેન ડ્રાઇવ અને બે મોબાઇલ ફોન આપ્યા હતા અને કહ્યું હતું કે, દિપકને આપી દેજે. ત્યારબાદ ભરત સુઇ ગયો હતો. જો કે, બીજા દિવસે ઉઠતા ભરત ત્યાં હતો નહીં. બાજુની રૂમમાં જોતા ભરતે આત્મહત્યા કરી લીધી હતી. પરંતુ પેન ડ્રાઇવની તપાસ કરતા પત્નીને તેના જ વિસ્તારમાં રહેતા પ્રેમી જીગ્નેશ ઉર્ફે કાલુ સાથે સબંધ હતો. જેથી જ ભરતે આત્મહત્યા કરી લીધી હતી. 

મારે કોઇ સબંધ રાખવો નથી અને મારે આવવું પણ નથી: પત્ની

ઉલ્લેખનીય છે કે પતિની અંતિમવિધીમાં પણ દક્ષા ન આવતા પરિવારને શંકા ઉપજી હતી. ભરતના મોત બાદ તેની પત્ની સાથે પરિવારે ફોન કરી વાત કરી હતી. પરંતુ તેણે કહ્યું હતું કે, મારે કોઇ સબંધ રાખવો નથી અને મારે આવવું પણ નથી. તેથી અંતિમ વિધીમાં પણ પત્ની હાજર રહી ન હતી અને સંતાનને પણ આવવા ન દીધો હતો. પોલીસ તપાસમા એ વાત સામે આવી છે કે દક્ષાના અગાઉ પણ લગ્ન થયા હતા. જેથી પોલીસે પૂર્વ પતિનુ નિવેદન મેળવીને આરોપીની ધરપકડને લઈને કાર્યવાહી શરૂ કરી છે.