ઉત્તરપ્રદેશ / અયોધ્યામાં નદીમાં સ્નાન દરમિયાન પતિએ પત્ની સાથે કર્યું એવું કે પબ્લિકે કરી ધોલાઈ, વીડિયો વાયરલ

• અયોધ્યાની સરયુ નદીનો વીડિયો સોશિયલ મીડિયામાં વાયરલ
• પતિ-પત્નીની હરકતના કારણે પતિને ઢોર માર મરાયો
• લોકો આક્રોશમાં આવી જતા પતિને પત્નીની હાજરીમાં જ ધોઇ નાખ્યો

ભગવાન રામની જન્મભૂમિ અયોધ્યા (Ayodhya) સાથે લોકો એટલી હદે ધાર્મિક રીતે સંકળાયેલા છે કે જો ભૂલથી પણ કોઇનાથી સાર્વજનિક સ્થળે કોઈ પણ પ્રકારનું અણછાજતું વર્તન થઇ જાય તો તેઓ સહન કરી શકે તેમ નથી. એવામાં તાજેતરમાં જ સોશિયલ મીડિયામાં એક એવો વીડિયો વાયરલ થયો છે કે જેમાં અયોધ્યા ઘાટ પર સરયુ નદીમાં એક પતિને પત્નીને જાહેરમાં કિસ કરવું ભારે પડ્યું છે.

સરયુ નદીમાં પતિ-પત્નીની હરકતના કારણે સ્થાનિક લોકો આક્રોશમાં આવી ગયા

સોશિયલ મીડિયા પર એક વાયરલ વીડિયો (Viral video) સામે આવ્યો છે કે જેમાં ઉત્તરપ્રદેશના અયોધ્યામાં સરયુ નદીમાં સ્થાન કરતી વેળાએ એક પતિ અચાનક આવેશમાં આવી જતા જાહેરમાં પોતાની પત્નીને બધાની સામે ચુંબન કરી લે છે. જે જોતા જ ત્યાં હાજર સ્થાનિક લોકો આક્રોશમાં આવી જાય છે. બાદમાં તે સ્થાનિક લોકો પતિને નદીમાંથી બહાર કાઢી બરાબરનો મેથીપાક ચખાડે છે. સરયુ નદીને વોટર પાર્ક સમજી બેઠેલા આ નવદંપતી માટે આ એવો બોધપાઠ બની ગયો છે કે જેને તેઓ જીવનભર ભૂલી નહીં શકે.

યોગ દિવસની આ ઘટના

આ ઘટના મંગળવારે ઘટી હતી. મંગળવારે સરયુ નદીના કિનારે પણ યોગા-દિવસની પ્રેક્ટિસ કરવામાં આવી હતી. આ કાર્યક્રમમાં કેન્દ્રીય મંત્રી ભૂપેન્દ્ર યાદવે હાજરી આપી હતી. એવું જણાવવામાં આવી રહ્યું છે કે મંત્રીના ગયાના બે કલાક બાદ આ ઘટના ઘટી હતી. મોડી રાત્રે તેને લગતા બે વીડિયો પણ સામે આવ્યા છે. જેમાં નહાતી વખતે પતિ તેની પત્નીને કિસ કરતો જોવા મળે છે. બીજામાં તેને માર મારવામાં આવી રહ્યો છે.

આસપાસના અન્ય લોકો પોતાના પરિવાર સાથે સ્નાન કરી રહ્યાં હતા

આ ઘટનાનો વિરોધ કરનારાઓનું કહેવું છે કે તેમના પરિવાર પણ ત્યાં હાજર હતા, આથી તેઓ પતિ-પત્ની દ્વારા આવી અશ્લીલતા ફેલાવવાનું સહન ન કરી શક્યા. આથી લોકોએ વાંધો ઉઠાવ્યો અને કહ્યું કે જાહેર સ્થળોએ આવી અભદ્રતા ન કરવી જોઈએ. જો કે, લક્ષ્મણ ઘાટ ચોકીના પોલીસકર્મીઓએ આ મામલે કંઈપણ કહેવાનો ઈન્કાર કર્યો હતો. આશરે 30 વર્ષની ઉંમરના પતિને કેટલાંક લોકોએ 20 મિનિટ સુધી ઢોર માર માર્યો હતો. જેથી ફરીવાર આ પ્રકારનું વર્તન કરતા પહેલાં લોકો સો વાર વિચારે.