રાજ્યમાં નવરાત્રીના સમયગળામાં બે શરમજનક ઘટાનો સામે આવી છે. જેમા સુરતમાં 4 વર્ષની બાળકી સાથે દુષ્કર્મનો બનાવ બન્યો છે અને વડોદરામાં પતિએ તેની પત્ની તેમજ પુત્રીની હત્યા કરી હોવાનો ખુલાસો થયો છે.
સુરતમાં 4 વર્ષની બાળકી સાથે દુષ્કર્મ
વડોદરામાં પતિએ પત્ની અને બાળકીની હત્યા કરી
ગણતરીના સમયમાં હત્યારો પતિ પોલીસ સકંજામાં
એક તરફ રાજ્યમાં નવરાત્રીનો માહોલ ચાલી રહ્યો છે. ત્યારે આવા સમયે સુરત અને વડોદરામાં જે કિસ્સાઓ સામે આવ્યા છે તે સાંભળીને તમારા રૂવાંડા ઉભા થઈ જશે. સુરતના સચિન વિસ્તારમાં 4 વર્ષની બાળકી સાથે દુષ્કર્મનો બનાવ સામે આવ્યો છે. જેમા આરોપીએ પહેલા બાળકીનું અપહરણ કર્યું હતું અને બાદમાં તેની સાથે દુષ્કર્મ આચર્યું હતું.
5 કલાકમાં પોલીસે બાળકીને શોધી
જોકે ઘટનાની ગંભીરતાને ધ્યાનમાં રાખીને સુરત ક્રાઈમબ્રાંચે 10 ટીમો બનાવીને 5 કલાકમાં બાળકીને શોધી કાઢી. આરોપીએ દુષ્કર્મ આચર્યા બાદ બાળકીને ઝાડીમાં ફેકી દીધી હતી. જ્યારે બાળકીને હોસ્પિટલ ખસેડવામાં આવી ત્યારે તેની સાથે દુષ્કર્મ થયા હોવાનું સામે આવ્યું. આ મામલે પોલીસે સીસીટીવીના આધારે આરોપીની ઓળખ કરી લીધી છે. સાથેજ તેની ધરપકડ કરવા તપાસના ચક્રો ગતિમાન કર્યા છે.
શંકાસ્પદ મોત હત્યા નીકલી
બીજી તરફ 2 દિવસ અગાઉ વડોદરાના ન્યૂ સમા રોડ પર માતા અને દિકરીનું શંકાસ્પદ મોત થયું હતું. જે મામલે પોલીસ તપાસમાં એવો ખુલાસો થયો કે પતિએ જ પત્ની અને દીકરીની હત્યા કરી. આરોપી તેજસ પટેલે જ પત્ની અને 6 વર્ષની દીકરીની હત્યા કરી છે. જેમા તેજસે ઝેર આપી પત્ની અને દીકરીને મોતને ઘાટ ઉતારી દીધા.
પત્નીને ઝેર આપી ગળું દબાવીને ઉતારી મોતને ઘાટ
પહેલા માસૂમ દીકરીની હત્યા કરી બાદમાં પત્નીની હત્યા કરી હતી તેમજ પત્નીને ઝેર આપી અને ગળું દબાવી હત્યા કરી હોવાનું સામે આવ્યું છે. પોલીસે હત્યારા પતિ તેજસની ધરપકડ કરી છે. ન્યૂ સમા રોડની ચંદનપાર્ક સોસાયટીમાં રહેતાં 36 વર્ષીય શોભનાબેન તેજસભાઇ પટેલ અને તેમની 6 વર્ષની પુત્રી કાવ્યા પટેલ નવરાત્રિમાં ગરબા રમીને રવિવારે રાત્રે 12 વાગ્યે ઘરે આવ્યાં હતાં અને ત્યારબાદ હત્યારા પતિએ આ હત્યાને અંજામ આપ્યો હતો.
પીએમ રિપોર્ટમાં થયા હત્યાના ખુલાસાઓ
ઉલ્લેખનીય છે કે માતા અને પુત્રીની તબિયત બગડતાં પતિ સારવાર માટે ખાનગી હોસ્પિટલમાં લઇ ગયો હતો, જ્યાં તબીબે બંનેને મૃત જાહેર કર્યાં હતા. માતા-પુત્રીનાં શંકાસ્પદ મોતને પગલે સમા પોલીસ દોડી ગઇ હતી અને તપાસ શરૂ કરી બંનેના મૃતદેહોને પોસ્ટમોર્ટમ માટે સયાજી હોસ્પિટલમાં મોકલી અપાયા હતા. જેમાં સામે આવ્યું કે માતા અને દીકરીની હત્યા કરાઇ છે.