વર્ષ 2022માં દુનિયાનાં કુલ અરબપતિઓની સંખ્યા 3384 હતી જે હવે ઘટીને 3112 છે. ભારતમાં 16 નવા અરબપતિઓનાં નામ લિસ્ટમાં શામેલ થયાં છે.
વર્ષ 2023માં અરબોપતિની કુલ સંખ્યામાં ઘટાડો
ભારતનાં 16 નવા અરબપતિઓનાં નામ શામેલ
ભારતીય રેખા ઝુનઝુનવાલા ટોપ પર
ગ્લોબલ ઈકોનોમીમાં ઉથલ-પાથલનાં કારણે દુનિયામાં અરબપતિઓની સંખ્યામાં 8%નો ઘટાડો આવ્યો છે. પરંતુ ભારત પર તેની ઓછી અસર જોવા મળે છે. ભારતમાં કુલ અરબપતિઓની સંખ્યા ઘટવાની જગ્યાએ વધી છે. M3H Hurun Global Rich Listમાં આ વાતનો ઉલ્લેખ કરવામાં આવ્યો છે. ભારતમાં જે નવા 16 અરબપતિઓનાં નામ સામે આવ્યાં છે તેમાં શેર બજારનાં Big Bull કહેવાતાં રાકેશ ઝુનઝુનવાલાની પત્ની રેખા ઝુનઝુનવાલા ટોપ પર છે.
દુનિયામાં ઘટી અરબોપતિઓની સંખ્યા
હુરનની રિપોર્ટ અનુસાર વર્ષ 2022માં દુનિયાનાં કુલ અરબપતિઓની સંખ્યા 3,384 હતી જે 2023માં અત્યારસુધી આ આંકડો ઘટીને 3112 થયો છે. નવા અરબપતિ બન્યાની લિસ્ટમાં 2023માં દુનિયાનાં 99 શહેરોમાં 176 નવા અરબપતિ બન્યાં છે. જો ભારતની વાત કરીએ તો દેશમાં કુલ 187 અરબપતિઓ રહે છે જ્યારે ભારતીય મૂળનાં કુલ અરબપતિઓની સંખ્યા 217 છે. આ આંકડો અમેરિકા અને ચીન બાદ તૃતીય સૌથી મોટો છે. લિસ્ટમાં એ અમીરોનાં નામ શામેલ કરવામાં આવ્યાં છે જેમની નેટવર્થ 8000 કરોડ રૂપિયાથી વધારે છે. મુંબઈમાં 66 અરબપતિઓનું ઘર છે.
રેખા ઝુનઝુનવાલાનું નામ ટોપ પર
સ્ટોક માર્કેટનાં જાણીતા રોકાણકાર અને બીગબૂલનાં નામે જાણીતા રાકેશ ઝુનઝુનવાલાનાં નિધન બાદ તેમનો વ્યાપાર તેમની પત્ની રેખા ઝુનઝુનવાલા સંભાળી રહી છે અને તેને સતત આગળ વધારી રહી છે. તેમને હુરેનની અરબોપતિઓની નવી લિસ્ટમાં પહેલા નંબર પર રાખવામાં આવ્યું છે. એટલે કે નવા શામેલ થેયલા અરબપતિઓની લિસ્ટમાં તેમની સંપત્તિ સૌથી વધારે છે.
ભારતીયોનો છે દબદબો
કમાણીનાં મામલામાં પણ ભારતીય અરબપતિઓનો દબદબો દુનિયાભરમાં છે. ભલે આ વર્ષે ગૌતમ અદાણી સહિત અન્યોની સંપત્તિમાં ઘટાડો થયો હોય પરંતુ પાંચ વર્ષનાં આંકડાઓ પર ધ્યાન આપીએ તો ભારતીય અમીરોની સંપત્તિ ઝડપથી વધી રહી છે. હુરન અનુસાર ભારતનાં તમામ અરબપતિઓએ પાંચ વર્ષમાં કુલ 360 અરબ ડોલર એટલે કે આશરે 30 લાખ કરોડ રૂપિયાની કમાણી કરી છે જે HongKongની GDP જેટલી છે.
અરબપતિઓની સંપત્તિમાં નોંધાયો ઘટાડો
આ રિપોર્ટ અનુસાર જે અરબપતિઓએ પોતાની સૌથી વધારે સંપત્તિ ઘુમાવી છે તેમાં એમેઝોનનાં જેફ બેજોસ પહેલાં સ્થાન પર છે જ્યારે ભારતનાં ગૌતમ અદાણી દ્વિતીય ક્રમ પર છે. બેજોસની સંપત્તિમાં આ વર્ષે 70 અરબ ડોલરનો ઘટાડો નોંધ્યો છે. તો ગૌતમ અદાણીની નેટવર્થમાં 60%નો ઘટાડો નોંધાયો છે.