અમીરોની યાદી / દેશના ટૉપ 10 ધનકુબેરોમાંથી 5 ગુજરાતી, એકલા મુકેશ અંબાણી પાસે 30 ટકા સંપત્તિ

• હ્યુરુન રીચ લીસ્ટ ૨૦૧૯માં મુકેશ અંબાણીને ૩.૮ લાખ કરોડ રૂપિયાની સંપત્તિ સાથે સૌથી અમીર ભારતીય તરીકે સ્થાન પ્રાપ્ત કર્યું છે. 
• S P હિન્દુજા અને પરિવાર ૧ લાખ ૮૬ હજાર કરોડ સાથે બીજા ક્રમે છે.
• વિપ્રોના સ્થાપક અઝીમ પ્રેમજી ૧ લાખ ૧૭ હજાર કરોડ સાથે ત્રીજા ક્રમે છે.
• સૌથી વધુ અબજોપતિઓ મુંબઈમાં વસે છે.
• ૧૦૦૦ કરોડથી વધુ સંપત્તિ ધરાવતા ૯૫૩ ભારતીયો જેમાંથી ૧૫૨ મહિલાઓ.

ટોપ ૧૦ સૌથી અમીર ભારતીયો 

હ્યુરુન રીચ લીસ્ટ ૨૦૧૯માં મુકેશ અંબાણીને ૩.૮ લાખ કરોડ રૂપિયાની સંપત્તિ સાથે સૌથી અમીર ભારતીય તરીકે સ્થાન પ્રાપ્ત કર્યું છે. S P હિન્દુજા અને પરિવાર ૧ લાખ ૮૬ હજાર કરોડ સાથે બીજા ક્રમે છે. વિપ્રોના સ્થાપક અઝીમ પ્રેમજી ૧ લાખ ૧૭ હજાર કરોડ સાથે ત્રીજા ક્રમે છે.

૨૦૧૮ કરતા સંખ્યા વધી 

૧૦૦૦ કરોડથી વધુ સંપત્તિ ધરાવતા ૮૩૧ અબજોપતિઓમાંથી સંખ્યા વધીને ૯૫૩ ઉપર પહોચી છે. જયારે US ડોલર્સની રીતે અબજોપતિઓની સંખ્યા ૧૪૧થી ઘટીને ૧૩૮ થઇ ગઈ છે. 

GDP ઉપર મહત્વની અસર 

ભારતના ટોપ ૨૫ સૌથી વધુ સંપત્તિઓ ધરાવતી વ્યક્તિઓની સંપત્તિ ભારતના GDPના ૧૦% જેટલી છે અને લીસ્ટના કુલ ૯૫૩ વ્યક્તિઓની કુલ સંપત્તિ દેશના GDPના ૨૭% જેટલી છે. 

હ્યુરુન રીપોર્ટના મુખ્ય રિસર્ચર અનસ રહેમાન જુનેઈદએ જણાવ્યું હતું કે વૈશ્વિક સ્તરે સંપત્તિકારો દેશના અર્થતંત્રની વૃદ્ધિ અને આકારનું નિર્માણ કરવામાં મહત્વનો ભાગ ભજવે છે. ભારત સરકાર તેના ૫ ટ્રીલીયન ડોલર અર્થતંત્રના ધ્યેય તરફ આગેકુચ કરી રહી છે એવા સમયે ભારતનાં સંપત્તિકારોની આગામી યાદી ૫ વર્ષમાં ત્રણ ગણી થાય તેવી સંભાવના છે.   

અમીરોના ફેવરિટ શહેર

યાદીના 26% અમીરો એટલે કે ૨૪૬ વ્યક્તિઓ મુંબઈમાં રહે છે જે સાચા અર્થમાં દેશની આર્થીક રાજધાની છે. દિલ્હીમાં ૧૭૫ વ્યક્તિઓ રહે છે જયારે બેંગલુરુમાં ૭૭ વ્યક્તિઓ રહે છે.

NRIsનો પણ દબદબો 

યાદીમાં કુલ ૮૨ NRIs છે જે પૈકી ૭૬% પોતાની મેળે પગભેર થયેલા એટલે કે સેલ્ફ મેઈડ સંપત્તિકારો છે. સૌથી વધુ ૩૧ સંપત્તિકાર NRIs USAમાં રહે છે. બીજા ક્રમે UAE અને ત્રીજા ક્રમે UKમાં રહે છે. 

સૌથી યુવા સંપત્તિકારો

૭૫૦૦ કરોડની મિલકત સાથે રીતેશ અગ્રવાલ (Ritesh Agrawal)- (OYO) ૨૫ વર્ષની ઉંમરે સૌથી યુવા સેલ્ફ મેઈડ બીઝનેસમેન છે. ૪૦ વર્ષથી નાના સૌથી વધુ સંપત્તિ ધરાવતા વ્યક્તિ ૩૭ વર્ષીય દીવ્યાંક તુરખિયા (Divyank Turakhia) છે જે media.net ના માલિક છે.

મહિલાઓ પણ પુરુષ સમોવડી

આ યાદીમાં ૧૫૨ મહિલાઓનો સમાવેશ થાય છે જેમની સરેરાશ ઉંમર ૫૬ વર્ષ છે. 

HCL ટેકનોલોજીઝની રોશની નાદાર (૩૭ વર્ષ) અને ગોદરેજ ગ્રુપના સ્મિતા ક્રિશ્ના (૬૮ વર્ષ) અનુક્રમે પહેલા અને બીજા સૌથી વધુ સંપત્તિ ધરાવતી મહિલાઓ છે. ૧૮૫૦૦ કરોડની સંપત્તિ સાથે બાયોકોનનાં કિરણ મજુમદાર શો સૌથી અમીર સેલ્ફ મેઈડ મહિલા છે.   

શું આર્થિક અસમાનતા વધી રહી છે?

જો કે નિષ્ણાતોના માટે આ યાદીમાં વર્ષોવર્ષ ઉમેરાતા નામો અને તેમની વધતી સંપત્તિ ચિંતાજનક છે. ભારતના અર્થતંત્રમાં વધતો જતો અબજોપતિઓનો પ્રભાવ ગરીબ અને અમીરો વચ્ચેની ખાઈ વધુ ને વધુ ઊંડી કરી રહ્યો છે. અમીરો માટે વધુ ને વધુ સંપત્તિ મેળવવી સહેલી થઇ રહી છે જયારે ગરીબો માટે પરિસ્થતિ વધુ દુષ્કર બની ગઈ છે. આ વધતી આર્થીક અસમાનતા ગંભીર સામાજિક અને આર્થીક પરિણામો લાવી શકે તેવી સંભાવના છે.