ઈસરો પોતાના પહેલા માનવરહિત ગગનયાનમાં 'લેડી રોબોટ' વ્યોમ મિત્રને આવતા વર્ષના ડિસેમ્બરમાં મોકલવાની તૈયારી કરી રહ્યું છે તો બીજી બાજુ આઇઆઇઆઇટી (ઈન્ડિયન ઈન્સ્ટિટ્યૂટ ઓફ ઈન્ફર્મેશન ટેક્નોલોજી)એ બેસતો, ચાલતો અને વાતો કરતો રોબોટ તૈયાર કર્યો છે. આ રોબોટ નૃત્ય કરવાની સાથે-સાથે વૃદ્ધની દેખભાળ પણ કરી શકે છે. ખૂબ જ જલદી આ રોબોટ બજારમાં ઉતારવાની તૈયારી ચાલી રહી છે.
વાસ્તવિક જીવનમાં રોબોટ હજુ એટલા વિકસિત નથી. ટેક્નોલોજી આ ક્ષેત્રમાં ઝડપથી આગળ વધી રહી છે. રજનીકાંતની સુપરહિટ ફિલ્મ 'રોબોટ' કે પછી વિજ્ઞાનના ક્ષેત્રમાં તમામ રોબોટ એ બધાં જ કામ કરવા લાગે છે, જે માણસ કરે છે. 'રોબોટ' ફિલ્મનો રોબોટ તો હીરોઇનને પ્રેમ પણ કરવા લાગે છે. આઇઆઇઆઇટીમાં તૈયાર કરાયેલા રોબોટની વાત અનોખી છે. તે તમારી એકલતા દૂર કરવાની સાથે દરેક આદેશનું પાલન કરે છે.
રોબોટિક્સ વિભાગના પ્રોફેસર જી.સી. નંદીના નિર્દેશનમાં વિદ્યાર્થીઓએ મળીને આ રોબોટ તૈયાર કર્યો છે. પ્રોફેસર નંદીએ જણાવ્યું કે હવે તે આ રોબોટને સામાન્ય માણસની જેમ બનાવવામાં લાગ્યા છે. રોબોટિક્સ વિભાગના શિક્ષક ડો.રાહુલ કાલા વિદ્યાર્થીઓનું માર્ગદર્શન કરતા રહે છે. પ્રો. નંદી કહે છે કે હવે કોઇ કામકાજ માટે મજૂર મળતા નથી અને ઘરનું કામ કરવા માટે કામવાળાં પણ મળતાં નથી. આવા સંજોગોમાં ઘરના વૃદ્ધની દેખભાળ માટે આ રોબોટ તૈયાર કરાયો છે. સંસ્થાની પ્રયોગશાળામાં હજુ અન્ય ટેક્નિકથી સજ્જ કરાશે. રોબોટની પકડ હજુ એટલી મજબૂત નથી. આવા સંજોગોમાં કોઇ સામાનને કેવી રીતે પકડવો તે તેને શીખવવામાં આવી રહ્યું છે.
પ્રો. નંદીએ દાવો કર્યો છે કે ભવિષ્યમાં તેઓ આ પ્રકારના રોબોટને બજારમાં પણ ઉતારશે. સફળ પરીક્ષણ બાદ ઓછી કિંમતમાં રોબોટ તૈયાર કરાશે. તેને બજારમાં એવી કિંમતે ઉતારાશે કે મધ્યમવર્ગીય પરિવાર પણ તેને ખરીદી શકે.