UAE / શારજહાંની બહુમાળી બિલ્ડિંગમાં ભીષણ આગ, કોઇ જાનહાનિના અહેવાલ નહીં

• શારજહાંના મલ્ટીસ્ટોર બિલ્ડિંગમાં આગનો બનાવ
• સિવિલ ડિફેંસ ટીમનો આગ પર કાબૂ મેળવવાનો પ્રયાસ

સ્થાનિક મીડિયાના અહેવાલો અનુસાર મંગળવારે મોડી સાંજે આ બિલ્ડિંગમાં આગ લાગી હતી. જેની જ્વાળાઓ આકાશમાં ચારેય તરફ દેખાઈ રહી હતી અને આખો વિસ્તાર લાલ દેખાઈ રહ્યો હતો.

UAEના સ્થાનિક મીડિયાના જણાવ્યાં અનુસાર આ બિલ્ડિંગમાં ફસાયેલા તમામ લોકોને સિવિલ ડિફેન્સની ટીમે બહાર કાઢયાં છે, પરંતુ આગ પર કાબૂ મેળવવાના પ્રયાસો ચાલુ છે. આગને કાબૂમાં લેવા હાઇડ્રોલિક ફાયર મશીન લગાવવામાં આવ્યા છે. પ્રાપ્ત માહિતી સુધી આગને કાબૂમાં લેવામાં આવી છે અને આ ઘટનામાં કોઈનું મોત નીપજ્યું નથી.

આ બિલ્ડિંગમાં આગ કયા કારણોસર લાગી તે જાણી શકાયું નથી. મળતી માહિતી મુજબ બિલ્ડિંગમાં રહેતા તમામ લોકોને સુરક્ષિત બહાર કાઢવામાં આવ્યા છે.

ઉલ્લેખનીય છે કે શારજાહ સંયુક્ત આરબ અમીરાતનું ત્રીજું સૌથી વધુ વસ્તી ધરાવતું શહેર છે. આ શહેરમાં મોટી સંખ્યામાં વિદેશી ભારતીયો પણ રહે છે.