અપડેટ / હવે આવશે Android અને IOSથી પણ વધુ ફાસ્ટ મોબાઇલ ઓપરેટીંગ સિસ્ટમ

(Credit: attexperience)

મોબાઇલ ફોનમાં હાલ ગુગલની એન્ડ્રોઇડ (android) અને એપલ (apple) ની આઇઓએસ એમ માત્ર બે જ ઓપરેટીંગ સિસ્ટમ છે. માઇક્રોસોફટની વિન્ડોઝ મોબાઇલ ઓએસ હવે ભુતકાળ બની ચુકી છે. જો કે ગુગલ અને એપલની મોનોપોલીને હવે ચાઇનીઝ ટેક જાયન્ટ હુઆવેએ પડકાર ફેંકયો છે. હુઆવેએ નવી મોબાઇલ ઓપરેટીંગ સિસ્ટમ હોન્ગમેન્ગ ડેવલપ કરી છે. હુઆવેનો દાવો છે કે તે એન્ડ્રોઇડ અને આઇઓએસ કરતા પણ વધુ ફાસ્ટ છે. ઉલ્લેખનીય છે કે તાજેતરમાં અમેરિકાનાં પ્રમુખ ડોનાલ્ડ ટ્રમ્પે હુઆવે સાથે કોઇપણ અમેરિકન કંપની બિઝનેસ કરી શકશે નહીં તેવો પ્રતિબંધ મુકી દીધો હતો. 

જેના પગલે ગુગલે હુઆવેને એન્ડ્રોઇડ તેમજ તેની એપનો સપોર્ટ નહીં મળે તેવી જાહેરાત કરી દીધી હતી. જોકે અત્યારે ટ્રમ્પે આ પ્રતિબંધ પાછો ખેંચ્યો છે. હુઆવે અમેરિકાની સરકારનું તેના પ્રત્યેનું વલણ જોતા છેલ્લા કેટલાક વર્ષોથી પોતાની ઓપરેટીંગ સિસ્ટમ ડેવલપ કરવા પર કામ કરી રહ્યું છે. હુઆવે (Huawei) ના ફાઉન્ડર અને સીઇઓ રેન ઝેન્ગફેઇ (Ren Zhengfei)એ હોન્ગમેન્ગ ઓએસ અંગે જણાવ્યું હતું કે તે એપલની મેક ઓએસથી પણ ફાસ્ટ છે.

તેમણે જણાવ્યું કે હોન્ગમેન્ગ ઓએસ મોબાઇલ સહિતના તમામ ડિવાઇસમાં કામ કરશે. હુઆવે અમેરિકા ગમે ત્યારે ફરી પ્રતિબંધ મુકે તેવા સંજોગોમાં માત્ર ગુગલ પર આધારિત રહેવા માગતું નથી. હુઆવેની ડેવલપર કોન્ફરન્સ આગામી નવ ઓગસ્ટથી શરુ થઇ રહી છે. જેમાં હેન્ગમેન્ગ ઓએસની વિગતો જાહેર કરાય તેવી શકયતા છે. ટેકનો વર્લ્ડમાં હોન્ગમેન્ગ અંગે ભારે ભારે ઉત્સુકતા છે. એવી પણ શકયતા છે કે હુઆવે ચાલુ વર્ષે જ આ ઓએસ સાથેના કેટલાક મોબાઇલ લોન્ચ કરી શકે છે.