કામની ટિપ્સ / ચોમાસામાં ડાયરિયા, ફૂડ પોઈઝનિંગ અને અપચાથી બચાવશે આ કારગર ઉપાયો, રાખો આટલી સાવધાની

ચોમાસામાં સામાન્ય રીતે કયા પ્રકારની સમસ્યાઓ થાય છે

ચોમાસામાં મોટાભાગે ઈન્ફેક્શનને કારણે પેટ સંબંધી સમસ્યાઓ થતી હોય છે. પણ જો થોડી સાવધાની રાખવામાં આવે તો આ સમસ્યાઓથી બચી શકાય છે. 

ચોમાસામાં આ 3 સમસ્યા વધુ થાય છે.

પાચનતંત્ર ધીમું થઈ જવું

ચોમાસામાં જઠરાગ્નિ મંદ થઈ જાય છે. જેની અસર પાચન ક્રિયા પર થાય છે. વરસાદના પાણી અને કાદવથી બચવા માટે ઘણાં લોકો ઘરમાં જ રહેતાં હોય છે. જેના કારણે શારીરિક સક્રિયતા ઓછી થઈ જાય છે અને પાચન પ્રક્રિયા પ્રભાવિત થાય છે. તેની ડાઈજેસ્ટિવ સિસ્ટમ પર ખરાબ અસર થાય છે. વરસાદને કારણે જે લોકો વોક પર અથવા જિમમાં જઈ શકતાં નથી. તેમણે ઘરમાં જ વર્કઆઉટ કરવું જોઈએ.

અપચાની સમસ્યા

ચોમાસામાં ડાઈજેસ્ટિવ એન્ઝાઈમની કાર્યક્ષમતા પ્રભાવિત થાય છે. જેના કારણે ખોરાક બરાબર પચતો નથી. વરસાદમાં તળેલાં, મસાલેદાર અને કેફીનયુક્ત પદાર્થો વધુ પ્રમાણમાં લેવાથી પણ અપચો થઈ શકે છે. મોસમમાં ભેજ વધવા પર બેક્ટેરિયા અને વાયરસ સંક્રમણ વધે છે. જેના કારણે પણ અપચો થઈ શકે છે. 

ડાયેરિયા

ડાયેરિયા દૂષિત ભોજન અને પાણીથી થતો રોગ છે. ચોમાસામાં આ સમસ્યા વધુ જોવા મળે છે. પેટમાં દર્દ, મરોડ, તાવ, મળમાં લોહી આવવું, પેટ ફૂલવું ડાયેરિયાના લક્ષણો હોઈ શકે છે. ફૂડ પોઈઝનિંગને કારણે પણ ડાયેરિયા થાય છે. 

ફૂડ પોઈઝનિંગ

જ્યારે પણ બેક્ટેરિયા, વાયરસ, કીટાણુઓથી સંક્રમિત દૂષિત ભોજન લેવામાં આવે ત્યારે ફૂડ પોઈઝનિંગની સમસ્યા થાય છે. ચોમાસામાં ઠંડક અને ભેજ વધવાથી બેક્ટેરિયા અને વાયરસ વધુ સક્રિય થઈ જાય છે. જેથી આ સિઝનમાં ખાનપાનમાં સાવધાની રાખવી જ આ સમસ્યાનો ઉપાય છે. 

ચોમાસામાં કઈ વાતોનું ધ્યાન રાખવું?

• ગરમ ભોજન, સૂપ અને સરળતાથી પચી જાય એવો ખોરાક જ ખાવો. 
• કાચાં શાકભાજી અને સલાડમાં ભેજને કારણે બેક્ટેરિયા પેદા થાય છે. જેથી આ સિઝનમાં તેને ખાવાથી બચો.
• મીટ, ફિશ, ચિકન જેવા નોનવેજ ફૂડ ખાવાથી ફૂડ પોઈઝનિંગનો ખતરો વધી જાય છે. જેથી તેને ખાવાથી બચો. આ સિવાય મશરૂમ અને કાચાં ઈંડાનું પણ સેવન કરવું નહીં. 
• તળેલાં ખોરાક, વધુ મીઠાંવાળી વસ્તુઓ જેમ કે અથાણાં, સોસ ખાવા નહીં. તેના કારણે પેટ ફૂલવાની સમસ્યા થાય છે.