આજકાલ બજારમાં નિતનવા ભેળસેળવાળા ઘી મળે છે. જેથી તેને ખાવામાં પણ ડર લાગે છે. જ્યારે તમે ઘરે જ ખૂબ જ સરળ પ્રોસેસથી વલોણાનું દાણેદાર અને ચોખ્ખું ઘી બનાવી શકો છો. જેની રેસિપી આજે અમે તમને જણાવવાના છે. ચાલો જાણીએ.
સામગ્રી
ઘરની 10 દિવસની મલાઈ
રીત
સૌથી પહેલાં જાડાં તળીયાવાળી તપેલીમાં બધી મલાઈ લઈને તેને ગરમ કરવા મૂકો. હલાવતા રહેવું, મલાઈ જેમ જેમ ગરમ થતી જશે એટલે ઓગળતી રહેશે અને જાડું દૂધ હોય એવું દેખાશે. પછી ગેસ બંધ કરીને સહેજ ગરમ રહે એટલે તેમાં 3 ચમચી દહીં મિક્સ કરી લો. પછી મિશ્રણને બરાબર હલાવી લો. ઢાંકીને 10 કલાક માટે એક બાજુ મૂકી દો. પછી તમે જોશો તો મલાઈમાંથી દહીં તૈયાર થઈ જશે. તેમાંથી માખણ બનાવવા માટે હવે એક વાસણમાં મિશ્રણ લઈને તેમાં એક લીટર નોર્મલ પાણી નાખી દો. હવે તેમાં વલોણું કે ગ્રાઈન્ડર ફેરવો. હવે તેનું ક્રીમ જેવું ટેક્ચર દેખાશે. પછી તેમાં 4 ટ્રે બરફના ટુકડા નાખીને ફરી ગ્રાઈન્ડર ફેરવો. એટલે તેમાંથી માખણ છૂટું પડેલું દેખાશે. પછી માખણને નિતારીને એક કડાઈમાં લઈ લો. હવે સ્લો ગેસ પર માખણ ઓગાળો અને તેને હલાવતા રહો. આ મિશ્રણને મીડિયમ ફ્લેમ પર 20થી 25 મિનિટ ચડવા દો. અંદરનું કીટું છૂટું પડે એટલે ગેસ બંધ કરી દો. પછી ઠંડુ થાય એટલે ગાળી લો. તૈયાર છે તમારું ચોખ્ખું હોમમેડ વલોણાનું દાણેદાર ઘી.