દુનિયાભરમાં કરોડો લોકો ડિપ્રેશન (depression) થી પિડાય છે ડિપ્રેશનના દર્દીઓની સંખ્યાની રીતે જોઇએ તો દુનિયામાં ભારતનો નંબર છઠ્ઠો છે. વર્લ્ડ હેલ્થ ઓર્ગેનાઇઝેશનના રિપોર્ટ મુજબ સાડા નવ કરોડ લોકો વિવિધ પ્રકારના ડિપ્રેશનથી પિડાય છે. શરુઆતના લક્ષણો ખબર પડે તો દર્દીને ડીપ ડિપ્રેશનમાં જતો બચાવી શકાય છે. વિજ્ઞાનીઓએ હવે મોબાઇલ સહિતના ડિવાઇસમાં અત્યારે જેનો વધુને વધુ ઉપયોગ થઇ રહ્યો છે તે આર્ટિફિશિયલ ઇન્ટેલિજન્સ (એઆઇ) ટેકનોલોજી (Artificial intelligence technology) ડેવલપ કરી છે.
અવાજ સાંભળીને આ ટેકનોલોજી કહી દેશે કે તે વ્યકિત ડિપ્રેશનથી પિડાય છે કે કેમ? કમ્પ્યુટર સાયન્સમાં રિસર્ચ કરતા કેનેડાની આલ્બર્ટા યુનિવર્સિટીના વિજ્ઞાનીઓએ ખાસ એઆઇ ટેકનોલોજી ડેવલપ કરી છે. તેમનું રિસર્ચ પેપર કેનેડામાં આર્ટિફિશિયલ ઇન્ટેલિજન્સ પરની કોન્ફરન્સમાં રજુ થયું હતું. આપણા અવાજ પર આપણા મુડ અને માનસિક સ્થિતિની અસર પડે છે.
આવા અવાજના ઢગલાબંધ સેમ્પલને મશીન લર્નીંગ અલગોરિધમથી ચેક કરીને ડિપ્રેશનની સ્થિતિની એક મેથડ તૈયાર કરે છે. ત્યાર પછી કોઇ પણ વોઇસ સેમ્પલને સાંભળીને કેટલું અને કેવા પ્રકારનું ડિપ્રેશન છે તેનું સ્પષ્ટ અનુમાન કરે છે. વિજ્ઞાનીઓ કહે છે કે આ ટેક્નિકનો ઉપયોગ કરીને મોબાઇલ એપ તૈયાર થઇ શકશે. જે ડિપ્રેશનથી પિડાતા અથવા તો તે સ્ટેજમાં જવાની શકયતા ધરાવતા લાખો લોકો માટે ઉપયોગી સાબિત થશે. કેમ કે આવી સમસ્યાથી પિડાતા મોટાભાગના લોકોને ખુદને તેની ખબર હોતી નથી.
મોબાઇલ તમારા અવાજના આધારે તમારો મુડ પારખીને તમને કહી દેશે કે તમે ડિપ્રેશનમાં છો કે નહીં? વળી ડિપ્રેશની અસર કેટલી તીવ્રતાની છે તેની પણ જાણ થશે વર્લ્ડ હેલ્થ ઓર્ગેનાઇજેશને ડિપ્રેશનને વૈશ્વિક સમસ્યા જાહેર કરી છે. દુનિયાભરમાં થતાં આપઘાતના મોટાભાગના બનાવો પાછળ પણ ડિપ્રેશન જવાબદાર છે.