ટિપ્સ / તમારા રોજના મેનુને સંતુલિત કેવી રીતે બનાવશો

તમારા રુટિન મેનુ ચાર્ટમાં એ તમામ પોષકતત્વોનો સમાવેશ થતો હોવો જોઇએ જે આપણી રોજિંદી જિંદગીમાં જરુરી હોય. આ માટે પરિવારની જરુરિયાતોનુ પણ ધ્યાન રાખવુ પડે છે. પરિવારની દરેક વ્યક્તિ માટેના પોષકતત્વોનો સમાવેશ આપણા ખોરાકમાં થવો જોઇએ. સવારે બ્રેકફાસ્ટ અને બપોર તેમજ સાંજની વચ્ચેના સમયગાળાનો સ્નેક્સ પણ મહત્ત્વનો ભાગ ભજવે છે. જે વ્યક્તિ માત્ર લંચ અને ડિનરનું જ મેનુ બનાવશે તે કાં તો બ્રેકફાસ્ટ સ્કીપ કરશે અથવા સ્નેક્સ સ્કીપ કરશે અથવા તેમને ગમે તે વાનગીઓ આરોગશે. તેનાથી સરવાળે તો તેમની હેલ્થને જ નુકશાન થશે.

ગુજરાતી પરિવારોમાં પુરી, ખાખરા, ગાંઠિયા, ચેવડો જેવા નાસ્તાના ડબ્બા ભરેલા હોય છે. આ તમામ વાનગીઓ હેલ્થ માટે યોગ્ય ઓપ્શન નથી. બ્રેકફાસ્ટમાં એકાદ ગરમ વાનગી અને સાંજના નાસ્તામા પોષણથી ભરપુર વસ્તુઓ હોવી જોઇએ. જો તમે મેનુમા એ બાબતનુ પ્લાનિંગ કર્યુ હશે તોજ તમે એલર્ટ રહેશો.

કેવી રીતે નક્કી કરશો મેનુ
ઘરના સભ્યોનુ એજગ્રુપ અને તેમની એક્ટિવિટીના આધારે મેનુ નક્કી થાય છે. ઘરમા પાંચ વર્ષનુ બાળક હોય કે પછી ટીનએજર હોય દરેકની જરુરિયાતો અલગ હોય છે. બાળકોની એક્ઝામ ચાલતી હોય ત્યારે તેમની એક્ટીવિટી ઘટી જાય છે અને મગજ એલર્ટ રહે છે. આવા સમયે તેમને પચવામા હળવી હોય તેવી વસ્તુઓની જરુર પડે છે. જમવામાં વિવિધ પ્રકારની દાળ અને કઠોળનો ઉપયોગ થવો જોઇએ. રોટલી શાક દાળભાત જેવી વાનગીઓમાં પણ વૈવિધ્ય હોવુ જોઇએ. ડિનર હળવુ હોવુ જોઇએ, પરંતુ પોષકતત્વોથી ભરપુર
હોવુ જોઇએ.

આટલી બાબતોનુ ધ્યાન રાખવુ
- ઘરમા સુકા નાસ્તાના ડબ્બા ભરીને ન રાખવા. મહેમાન આવે તેમ વિચારીને રાખેલા નાસ્તાના ડબ્બાનો પોણો ભાગ આપણે જ આરોગી જઇએ છીએ
- ભુખ લાગે ત્યારે ખાઇ શકાય તેવા નાસ્તાના હેલ્ધી ઓપ્શન અવેઇલેબલ રાખો. ચિક્કી, ડ્રાયફ્રુટ્સ, સિંગચણા અને ફ્રેશફ્રુટ ઘરમા રાખો.
- ફણગાવેલા કઠોળ અને ગ્રીન વેજિટેબલ્સનો જરુરી સ્ટોક રાખો, જોકે આખુ ફ્રીજ ન ભરી દો. શાકભાજી તો જેટલા ફ્રેશ ખવાય તેટલુ સારુ
- રસોઇ બનાવતી વખતે ક્વોન્ટીટીની કાળજી રાખો, જેથી બચેલુ ભોજન બીજા ટંકમા ખાવુ ન પડે
- શાકભાજી સલાડ તરીકે ખાવા જરુરી નથી, પરંતુ તેનો ઉપયોગ દરેક વાનગીમાં કરો. દિવસમાં એક બે વાર ફળો ડાયેટમાં લેવા જોઇએ.
- સાંજના સ્નેક્સમાં મુઠ્ઠી ભરીને ડ્રાયફ્રુટ્સ, શિંગચણા, તલ-ગોળની ચિક્કી જેવી ન્યુટ્રિશિયન વાળી વસ્તુઓ લો.