પ્રધાનમંત્રી નરેન્દ્ર મોદી તેમની વિદેશ યાત્રાને લઇને હંમેશા વિપક્ષના નિશાને રહ્યા છે. હવે લોકસભાની ચૂંટણી નજીક આવી રહી છે ત્યારે પીએમની વિદેશ યાત્રા અંગે એક વીડિયો વાયરલ થયો છે. આ વીડિયો દ્વારા દાવો કરવામાં આવ્યો છે કે ચાર વર્ષમાં પ્રધાનમંત્રીએ 52 દેશોની યાત્રા કરી. તેના પર 355 કરોડ રૂપિયાનો ખર્ચ આવ્યો. હવે ખર્ચનો દાવો કેટલો સાચો છે તે અંગે અમે તપાસ કરી.
જાણો શું સત્ય સામે આવ્યું?
પ્રધાનમંત્રી મોદીની છવી છેલ્લા કેટલાક વર્ષોમાં એક આંતરરાષ્ટ્રીય તેના તરીકે ઉભરી છે. તેનું કારણ છે પ્રધાનમંત્રી મોદી દ્વારા કરવામાં આવતી વિદેશ યાત્રા. જી20 સમીટ હોય, બ્રિક્સ સંમેલન હોય કે પછી કોઇ દેશ સાથે દ્વીપક્ષીય વાર્તા કરવી હોય. પ્રધાનમંત્રીએ હંમેશા આગેવાની કરી. હવે ચૂંટણી નજીક છે ત્યારે સોશિયલ મીડિયા પર આ વીડિયો વાયરલ થઇ રહ્યો છે. ન્યૂઝ રિપોર્ટની જેમ વાયરલ થયેલા આ વીડિયોમાં પ્રધાનમંત્રીની વિદેશ યાત્રાનો ખર્ચ અને તેનાથી દેશને શું મળ્યું તે જણાવવામાં આવ્યું છે.
દાવો છે કે પ્રધાનમંત્રી મોદીએ તેમના કાર્યકાળના ચાર વર્ષમાં 52 દેશની મુસાફરી કરી. જેના કારણે દેશની તિજોરીમાંથી 355 કરોડ રૂપિયા ખર્ચ થયા. આ પ્રવાસ દરમિયાન એટલે કે કુલ 165 દિવસ સુધી પ્રધાનમંત્રી મોદી ભારત બહાર રહ્યા. હવે સાંભળો કે પ્રધાનમંત્રીની વિદેશ યાત્રાથી દેશને શું ફાયદો થયો તે અંગે કેવો દાવો વીડિયો મારફતે થઇ રહ્યો છે.
પ્રધાનમંત્રી મોદીના વિદેશ પ્રવાસ અંગે વાત કરી રહેલો આ શખ્સ વીડિયો ક્લિપ મારફતે જાણકારી આપી રહ્યો છે કે પ્રધાનમંત્રીની વિદેશ યાત્રાના કારણે દેશમાં 15 લાખ કરોડ રૂપિયાનું એફડીઆઇ એટલે કે ફોરેન ડાયરેક્ટ ઇનવેસ્ટમેન્ટ આવ્યું. આ રૂપિયાનો દેશમાં ઉદ્યોગ ક્ષેત્રે ઉપયોગ થયો. સોશિયલ મીડિયા પર વાયરલ થઇ રહેલી 2 મિનિટ કરતા પણ વધુ સમયની વીડિયો ક્લિપમાં પ્રધાનમંત્રીના જોરદાર વખાણ કરવામાં આવ્યા છે. બની શકે કે આ વીડિયો રાજકીય લાભ માટે કોઇકે વાયરલ કર્યો હોય.
એટલે જ સવાલ ઉભા થાય છે કે....
શું પ્રધાનમંત્રીએ ચાર વર્ષમાં 52 દેશોની યાત્રા કરી ?
શું પ્રધાનમંત્રીની વિદેશ યાત્રા પર 355 કરોડ રૂપિયા ખર્ચ થયા ?
શું પ્રધાનમંત્રીના કાર્યકાળ દરમિયાન 15 લાખ કરોડ રૂપિયા FDI આવ્યું ?
વાયરલ વીડિયો સાથે કરવામાં આવેલો દાવો કેટલો સાચો છે ?
સોશિયલ મીડિયા પર વાયરલ થઇ રહેલી આ ક્લીપમાં જે પણ આંકડા હતા તે માન્યામાં આવે તેમ ન હતા. એટલે અમે વાયરલ વીડિયોની તપાસ કરવાનું નક્કી કર્યું. સૌથી પહેલા અમે પ્રધાનમંત્રીના વિદેશ પ્રવાસ અને તેની પાછળ થયેલા ખર્ચની વિગત જાણવા માટે પ્રધાનમંત્રીની સરકારી વેબસાઇટ પર પહોંચ્યા. અહિંયા 25 મે 2014 બાદ પ્રધાનમંત્રીએ જ્યાં જ્યા વિદેશ પ્રવાસ કર્યો તેની માહિતી આપવામાં આવી હતી અને ખર્ચ પણ લખ્યો હતો.
વેબસાઇટ પર જાણકારી હતી કે પ્રધાનંમંત્રીએ સૌથી પહેલા ભૂટાનની યાત્રા કરી હતી. જ્યાં 15 અને 16 જૂન 2014 દરમિયાન થયેલી આ યાત્રામાં 2 કરોડ 45 લાખ 27 હજાર 465 રૂપિયા ખર્ચ આવ્યો હતો. આ જ પ્રમાણે અન્ય પ્રવાસના ખર્ચની પણ માહિતી હતી. જો કે પ્રધાનમંત્રીની જે યાત્રામાં ભારતીય વાયુસેનાના વિમાન ગયા હતા તેના ખર્ચની વિગત સામેલ નથી. હવે વાયરલ વીડિયો ક્લીપમાં જે આરટીઆઇ અને મીડિયા રિપોર્ટનો ઉલ્લેખ હતો તે અમે શોધી કાઢ્યો. લખ્યું હતું કે સરકારે એક આરટીઆઇનો જવાબ આપતા માહિતી આપી છે કે પ્રધાનમંત્રીએ 41 વખત વિદેશ પ્રવાસ કર્યો અને 52 દેશોની યાત્રા કરી. જેમાં 355 કરોડ રૂપિયા ખર્ચ આવ્યો.
આટલી જાણકારી મળ્યા બાદ હવે સવાલ એ હતો કે શું છેલ્લા ચાર વર્ષમાં ભારતને 15 લાખ કરોડ રૂપિયા એફડીઆઇ મળ્યું. આ સવાલના જવાબ શોધતા સમયે અમને સરકારનો આ રિપોર્ટ મળ્યો.
જેમાં લખ્યું હતું કે....
વર્ષ 2014-15 માં 45.14 બિલિયન ડોલર
વર્ષ 2015-16 માં 55.55 બિલિયન ડોલર
વર્ષ 2016-17 માં 60.08 બિલિયન ડોલર
વર્ષ 2017-18 માં 61.96 બિલિયન ડોલર
એફડીઆઇ ભારતને મળ્યું. જેનો સરવાળો 222.75 મિલિયન ડોલર થાય છે. એટલે ભારતીય રૂપિયામાં તેને ફેરવવામાં આવે તો 15 લાખ કરોડ રૂપિયાથી પણ વધુ એફડીઆઇ મળ્યું કહેવાય. જેથી કહી શકાય કે પ્રધાનમંત્રી મોદીની 52 દેશોની વિદેશમાં 355 કરોડ ખર્ચ થયો અને 15 લાખ કરોડ રૂપિયા એફડીઆઇ મળ્યું હોવાનો દાવો સાચો હોવાનો અમારી તપાસમાં સાબિત થાય છે.