વરસો વરસ દિવાળી કૈંક અલગ રીતે ઉજવાતી જાય છે. ઉજવણીની રીતો અને રિવાજો પણ બદલાતાં જાય છે અમુક લોકો ફરિયાદ કરતાં હોય છે કે હવે દિવાળી પહેલા જેવી નથી રહી. શું ફરક પડ્યો છે હવે?
- મયૂર સોલંકી
''આ વખતે દિવાળી જેવું કંઈ લાગતું જ નથી ને!''...
એક મિત્રએ દિવાળીના એક બે દિવસ પહેલા જ ફોન પર ચર્ચા છેડી!
''ફટાકડા તો મેં ઘણા સમયથી ફોડવાનું બંધ કરી દીધેલું.અને આપણા રીલીજીયસ રિચ્યુઅલ્સ તો હવે ઓલ્ડ ફેશન્ડ અને આઉટ ડેટેડ થઈ ગયા. આ તો બા ને બધી આરતીઝ એન્ડ શ્લોકાઝ મોઢે આવડતા એટલે એ કરતા એ બધું...
અને હવે એમાં શ્રદ્ધા કરતા તો અંધશ્રદ્ધા વધી ગઈ છે. આપણને શ્રધ્ધા ખરી પણ એ બધું નથી કરતા ભાઈસાબ.ખોટું શું બોલવું ભૈ! એ શું વડા ને ભજીયાં બનાવીને ચોકમાં મુકવાના એન્ડ ઓલ.વળી એ તો કુતરાઓ ખાઈ જાય પાછા. અને એવું ઓઈલી પાછું આપણે પણ ખાવાનું. અને હું તો માનું છું કે ખરેખર હૃદયમાં રામ હોવા જોઈએ! બાની કોઈ જૂની ચોપડી બોપડી પડી હોત તો આપણેય બધી પૂજા કરી નાખત પણ દિલમાં રિસ્પેક્ટ હોય તો લક્ષ્મી પૂજન ધન્વંતરિ પૂજન અને સરસ્વતી પૂજન ન કરો તોય ચાલે...
બા હતાં ત્યારે એ બધી માથાકૂટ કર્યા કરતા. દિવાળી આવે એટલે થોડા દિવસ અગાઉથી બધો સામાન ઉતારી ઉતારીને સાફ કરે અને અમનેય સાથે જોડી દે. બધા માળીયા ઉપર ચડાવી ચડાવીને સાફ કરાવે. આપણીય કસરત થઈ જાય અને આપણાં જ ઘરના ખૂણેખૂણા જે આપણે કદાચ જોયા પણ ન હોય તે જોવા મળે. આ વખતે તો એવી કંઈ જંજટ કરી જ નથી ને ભાઈસાબ. બા હતાં ત્યારે તો રાત્રે મોડે સુધી જાગીને ઘૂઘરા મઠીયા અને ચોળાફળી બનાવતા. પણ આ વખતે તો અમે બધું જ બહારથી લઈ આવેલા.રેડીમેઇડ! હવે તો સ્વીટશોપ્સવાળા પણ ઘર જેવો જ સરસ નાસ્તો બનાવી આપે છે. કોણ કરે એ બધી માથાકુટ!
બા તો પેલા રસ્તે કોડિયા વેચવા બેસતાં છોકરાઓ પાસેથી ગામ આખાના કોડિયા લઈ આવતા. પણ હવે એ બધું ઓલ્ડફેશન્ડ થઈ ગયું. હવે તો અદ્દલ કોડિયા જેવી જ લાગતી સિરીઝ આવી ગઈ છે. કોડિયામાં તેલ પૂર્યા કરવાની કાઈ ઝંઝટ જ નહીં.અને અમેં તો એક સિરીઝ સ્પેરમાં રાખેલી. કારણકે આવી ચાઈનીઝ સીરિઝોનો કૈં ભરોસો નહિ. ગમે ત્યારે બગડી જાય. દિવાળીના દિવસે જ જો બગડી જાય તો આપણા ઘરે તો દિવાળી જેવું લાગે જ નહીં ને!
પણ તોરણ તો અમે અસ્સલ આસોપાલવના પાનના લાવેલા.આપણને ઘેર બનાવતા તો આવડે નહિ, પણ માર્કેટમાં બહુ સસ્તામાં મળતા હતા.એ છોકરો પણ બે પૈસા કમાય ને..
બાને રંગોળી પૂરતા સરસ આવડતું હોં! કહેવું પડે! અમે કાચા મકાનમાં રહેતા ત્યારે પણ ગાર લીંપીને મધરાત સુધી જાગીને રંગોળી બનાવતા.આખા મહોલ્લામાં સૌથી સરસ રંગોળી અમારાં આંગણે હોય.બાના ગયા પછી કોઈને એવી રંગોળી આવડતી જ નથી ને. આ રંગોલી બનાવવાના કોઈ કોર્સિસ થતાં હશે શું? બા તો કોઈ કોર્સ કર્યા વગર જ ચિત્રકાર જેવી રંગોલી બનાવી નાખતા! પણ હવે તો સ્ટીકર્સ મળે છે ને સરસ સરસ ડિઝાઈનવાળા. રંગો શોધવાની,ડિઝાઇન શોધવાની,લીંપણ કરવાની અને રાત રાત સુધી જાગવાની કંઈ માથાકુટ નહિ.
એમ તો બધા કઝીન્સ અને અમુક સંબંધીઓ ઘરે આવતા પણ બાનાં ગયા પછી એ પણ થોડું ઓછું થઈ ગયું છે. ગયા વર્ષે તો અમે રજાઓની મજાઓ લેવા માથેરાન જઈ આવેલા પણ આ વખતે ક્યાંય જવાય એવું લાગતું નથી.કામનું પ્રેશર છે યાર! મેં તો વર્ક ફ્રોમ હોમ લઈ લીધું છે. ઘરે નેટફલિકસ એન્ડ ચીલ કરીશું બીજું શું!
પણ આ વખતે દિવાળીમાં કૈં સ્પેશ્યલ નથી લાગતું . ઇન્ફેકટ આ વખતે દિવાળી જેવું કશું લાગતું જ નથી ને!
(Disclaimer : આ આર્ટિકલમાં લખાયેલા અને રજૂ કરાયેલા વિચારો અને મંતવ્યો લેખકના પોતાના અંગત છે. VTVGujarati.com આ વિચારો સાથે સહમત કે પ્રોત્સાહન આપતું નથી. માત્ર લેખક અને વાચકોના વિચારો રજૂ કરવાનું પ્લેટફોર્મ પૂરું પાડે છે.)