મુન્દ્રામાં 21 હજાર કરોડના ડ્રગ્સનો જથ્થો ઝડપાયા બાદ હવે રાજ્યની તમામ સુરક્ષા એજન્સીઓ સતર્ક થઇ ગઈ છે.ગુજરાતના બંદરો પર આવતા દરેક કન્ટેનર્સની ઝીણવટભરી તપાસ થશે
ગલ્ફ કન્ટ્રીથી આવતાં તમામ કન્ટેનર કરશે ચેક
ડ્રગ્સ, સિગારેટ,સોનાની દાણચોરી માટે બંદરો કુખ્યાત
હવે તમામ બંદર પર હવે ઝીણવટપૂર્વક ચકાસણી
ગુજરાતનાં તમામ બંદર હંમેશાં દાણચોરી તેમજ તસ્કરી મામલે વિવાદોમાં રહ્યાં છે પછી તે 1992માં થયેલા ગોસાબારા હથિયાર લેન્ડિંગ હોય કે પછી તાજેતરમાં મુન્દ્રા પોર્ટ પરથી પકડાયેલું 21 હજાર કરોડની કિંમતનું ત્રણ હજાર કિલો હેરોઇન કેમ ના હોય. દાણચોરી અને તસ્કરી મામલે ગુજરાતનાં બંદરો તસ્કરોનાં હોટ ફેવરિટ રહ્યાં છે. જોકે 21 હજાર કરોડનાં હેરોઇન બાદ હવે સુરક્ષા એજન્સીઓ સતર્ક થઇ ગઇ છે અને ગલ્ફ કન્ટ્રીથી માલ ભરીને ઇમ્પોર્ટ થતાં તમામ કન્ટેનરને બારીકાઇથી તપાસવામાં આવશે અને ત્યારબાદ તેને રિલીઝ કરવામાં આવશે.
ગલ્ફમાંથી આવે છે દરિયાઈ રસ્તે ડ્રગ્સ
મુન્દ્રામાં અદાણી પોર્ટ પરથી અંદાજિત 21 હજાર કરોડની કિંમતનું ત્રણ હજાર કિલો હેરોઈન જપ્ત થયું હોવાના ચકચારી કિસ્સામાં સુરક્ષા એજન્સીઓ ચિંતામાં આવી ગઇ છે. ડ્રગ્સ આંતકીઓ ગલ્ફ કન્ટ્રી મારફતે દેશના દરિયાઇ રસ્તે હજારો કરોડ રૂપિયાનું ડ્રગ્સ ધુસાડી રહ્યા છે. ડ્રગ્સના ધંધામાં થયેલ કરોડો રૂપિયા આતંકવાદી પ્રવૃત્તિમાં ઉપયોગ થતો હોવાનો પણ ઘટસ્ફોટ થયો છે. સુરક્ષા એજન્સીઓએ દરિયાઇ રસ્તે આવતાં કરોડો રૂપિયાનાં ડ્રગ્સના અનેક જથ્થા ઝડપી પાડ્યા છે. પાકિસ્તાનની આ હરકતો પર સુરક્ષા એજન્સીઓ બાજ નજર રાખીને બેઠી છે ત્યારે ટૂંકા સમયમાં ડ્રગ્સની દુનિયામાં નામ કરી દેનાર કચ્છના શાહિદ સુમરાની એનઆઇએ (નેશનલ સિક્યોરિટી એજન્સી)એ ટ્રાન્સફર વોરન્ટના આધારે ધરપકડ કરી છે. જેમાં ડ્રગ્સ મામલે તેની પૂછપરછ કરવામાં આવશે.
મુન્દ્રાની ઘટના બાદ હવે સતર્કતા
મુન્દ્રા પોર્ટથી ઝડપાયેલો વિક્રમી હેરોઈન ડ્રગ્સનો ત્રણ ટન જથ્થો કે જે આંતરરાષ્ટ્રીય બજારની કિંમત અનુસાર એક કિલોના પાંચ કરોડની કિંમત ગણતાં કુલ 21 હજાર કરોડનો જથ્થો સિઝ કરીને કંડલા અને બીએસએફના સુરક્ષિત ક્ષેત્રમાં રખાયો હોવાનું જાણવા મળે છે. તો જપ્ત જથ્થાની શુદ્ધતા અંગે દિલ્હીની મુખ્ય લેબોરેટરીના રિપોર્ટની પણ રાહ જોવાઈ રહી છે.
બીજી તરફ આ પ્રકરણમાં ચેન્નઈથી આયાતકાર દંપતી એમ. સુધાકર અને દુર્ગા વૈશાલીની ધરપકડ કરીને ભૂજની જેલ હવાલે કરાયા બાદ, દિલ્હીથી બે અફઘાનિસ્તાની અને અન્ય એક વ્યક્તિની આ પ્રકરણમાં સંડોવણી માટે અટકાયત કરાયાનું સામે આવ્યું હતું. તો હવે ગાંધીધામથી આ કન્સાઈન્મેન્ટનાં બુકિંગ કરનારા ફોરવર્ડિંગ સાથે જોડાયેલા એક શખ્સને પણ તપાસાર્થે રાતોરાત ઉઠાવાયો હોવાનું જાણવા મળે છે.
સિગારેટ-સોનું અને ડ્રગ્સની તસ્કરી
સૂત્રોના જણાવ્યા અનુસાર ગુજરાતનાં બંદરો તસ્કરી માટે જાણીતા છે. વિદેશથી આવતી કિમતી ચીજ વસ્તુઓની તસ્કરી કરવામાં આવે છે. જેમાં કેટલાક કેસોમાં સુરક્ષા એજન્સીઓને સફળતા મળે છે ત્યારે મોટાભાગનાં કન્ટેનરો બહાર આવી જાય છે. મુન્દ્રા પોર્ટ સહિત ગુજરાતનાં તમામ બંદરો પર વિદેશી સિગારેટ ઇમ્પોર્ટ થાય છે. જે આજે તમામ ગલ્લા પર આસાનીથી વેચાય છે. સિગારેટ પર 100 ટકા ઇમ્પોર્ટ ડ્યૂટી હોવાના કારણે ગલ્ફ કન્ટ્રીથી મોટા પ્રમાણમાં સિગારેટનો જથ્થો કન્ટેનરમાં ભરીને આવે છે. જેનો પર્દાફાશ અનેક વખત DRI સહિતની એજન્સીઓએ કર્યો છે. આ સિવાય સોનું તથા અન્ય ઇમ્પોર્ટેડ ચીજવસ્તુઓની પણ તસ્કરી થાય છે.
ખરડાયેલો ઈતિહાસ
પ્રાપ્ત માહિતી અનુસાર 21 હજાર કરોડનાં ડ્રગ્સ પહેલાં પણ કરોડો રૂપિયાનું ડ્રગ્સ કન્ટેનર મારફતે ગુજરાતમાં ઘૂસ્યું છે. જે નાના નાના ડીલરો સુધી પહોંચી ગયું છે. મુંબઇના ડોન હાજી મસ્તાન દમણ તેમજ વલસાડના દરિયાઇ રસ્તે દાણચોરી કરતા હતા આ સિવાય ઇન્ડિયા મોસ્ટ વોન્ટેડ દાઉદ પણ જ્યારે આંતકવાદી પ્રવૃતિમાં ન હતો જોડાયો અને માત્ર દાણચોર હતો ત્યારે તેણે ગુજરાતનાં બંદરો પર દાણચોરી કરી હતી. જ્યારે તેણે મુંબઇમાં બ્લાસ્ટ કરાવ્યા ત્યારે જામનગરના ગોસાબારાના દરિયા કિનારે આરડીએક્સ તેમજ હથિયાર લેન્ડિંગ કરાવ્યાં હતાં. વલસાડના દરિયા કિનારે પણ હથિયાર લેન્ડિંગ થયાં હતાં.
એજ્ન્સીઓ બની સતર્ક
ગુજરાતના દરિયાઇ મારફતે થતી તસ્કરીને રોકવા માટે સુરક્ષા એજન્સીઓ સતર્ક બની છે અને ગલ્ફ કન્ટ્રીથી આવતાં તમામ કન્ટેનરની ઝીણવટભરી રીતે તપાસ કરવા માટેનું શરૂ કરી દેવાયું છે. આવનારા સમયમાં કોઇ પણ કન્ટેનર ગલ્ફ દેશથી આવશે તો તેને ખોલીને ચેક કરવામાં આવશે ત્યારબાદ રિલીઝ કરવામાં આવશે.